تشرینی دووەم 30, 2021

شانیا ئاسۆ په‌رتووكێك له‌سه‌ر هونه‌رمه‌ند خالید سه‌ركار بڵاو ده‌كاته‌وه‌

هونه‌رمه‌ند و توێژە‌ر شانیا ئاسۆ ئەحمەد لە ٢٧/٢/١٩٩٧ لە شاری سلێمانی له‌دایك بووه‌. بڕوانامەی بەکالۆریۆس لە کۆلیژی ھونەره‌جوانه‌كان بەشی میوزیک هه‌یه‌ له‌ ساڵی (2017-2018)، ماوی چوار ساڵه‌ مامۆستای ھونەره‌ لە قوتابخانه‌یه‌كی ئامادەیی، له‌و بواره‌دا خزمه‌ت به‌ هونه‌ر ده‌كات.

شانیا جگه‌ له‌ كاری هونه‌ری ماوەی ٧ساڵە کاری دۆبلاژ ئەکات و، لە بواری موزیكدا له‌ چەندین کۆنسێرت و چالاکی ھونەری وەک ژەنیار و دەنگبێژ بەشداری كردووه‌.
شانیا سه‌باره‌ت به‌ ده‌ستپێكی چالاكی هونه‌ری و هاتنه‌ ناودونیای هونه‌ره‌وه‌ به‌و جۆره‌ بۆ ڕۆژنامه‌ی هه‌ولێر دوا:
خولیام بۆ میوزیک ھەر لە منداڵیەوە بووە و لە قۆناغی پینجه‌می سەرەتاییەوە چومه‌ته‌ خولی میوزیک و له‌سه‌ر ئامێری ڤایۆلین ده‌ستم به‌ ژەنینكردووه‌، لە قۆناغی نۆیه‌م ویستم بچمه‌ پەیمانگەی ھونەرە جوانەکان بەشی میوزیک، ئه‌وه‌ كات ده‌رفه‌ت نه‌ڕه‌خساو له‌ كۆلیژ ده‌ستم به‌ خوێندن له‌ بواری هونه‌ر كرد، لەسەر ئامێری ڤایۆلین.
شانیا به‌و جۆره‌ باس له‌ پرۆژه‌و توێژینه‌وه‌ی خۆی ده‌كات له‌ كۆتا قۆناغی خوێندن له‌ كۆلیژ:
پڕۆژەی کۆتا ساڵی خوێندنم لەو کۆلێژە توێژینەویەک بوو لەسەر ھونەرمەند خالید سەرکار، له‌ توێژینه‌وه‌كه‌دا سه‌ركه‌وتوو بووم، بۆیه‌ بیرم لەو کردەوه‌ کە ئەم توێژینەویە بکه‌م بە په‌رتووکێك و پێشکەشی کتێبخانەی کوردی بكه‌م، لە دوای ٣ ساڵ لە ئه‌نجامدانی توێژینەوەکە توانیم بە ھەوڵ و ماندوبونێکی زۆر بیكه‌مه‌ په‌رتووكێك و لە ٢١/٩/٢٠٢١ بڵاوی بکه‌مه‌وە، ھونەرمەند خالید سەرکار باشترین سەرچاوە بووە بۆئه‌و په‌رتووکەم، کە تەواوی زانیارییەکان لە خۆیه‌وه‌ وەرمگرتووە، په‌رتووکه‌كه‌م ناو نا (ژیان و بەرھەمەکانی ھونەرمەند خالید سەرکار)، له‌و په‌رتووکه‌دا لەگەڵ باسکردنی ژیان و بەرھەمەکانی ئەم ھونەرمەندە زۆر بابەتی تری ھونەری ورووژاوە و باس کراوە.
شانیا باس له‌ ئامانجی ئه‌و هه‌وڵه‌ باشه‌ی خۆی ده‌كات و ده‌ڵێ:
ئامانج له‌و کارەم خزمەتکردنە بە کتێبخانەی کوردی لە ڕووی ھونەریەوە، پێم وایە کتێبخانەی کوردی لە ڕووی سەرچاوەی ھونەریەوە ھەژارە بە تایبەت لە بواری میوزیک.
شانیا ده‌ڵێ: ئەم په‌رتووکەم یەکەم ئەزمونه‌ لە بواری نوسین. هیوادارم توانیبێتم خزمه‌تێك به‌ ماندووبوون و توانای هونه‌ری مامۆستا خالید سه‌ركار بكه‌م.

 

سەرکەوت بورهان

 

© 2017 Hawler