ئایار 16, 2021

عێراق هونه‌رمه‌ندێكی مه‌زنی له‌ده‌ستدا به‌ڵام كورد دۆستێكی گه‌وره‌

سه‌ره‌تای ساڵی (2014) میوانی وه‌زاره‌تی ڕۆشنبیری عێراق بووین له‌ به‌خدا، به ‌مه‌به‌ستی به‌شداری كردن له‌ پێشانگه‌ی شێوه‌كارانی عێراق، كه‌ له‌ سه‌رتاسه‌ری جیهان هونه‌رمه‌ندانی عێراقی و عه‌ره‌بی داوه‌تكرابوون بۆ ئه‌م نمایشه‌ مه‌زنه‌. له‌ یه‌كێك له‌ دیداره‌كان، كه‌ له‌ هۆڵی حیوار سازكرابوو سودفه‌ له‌ ته‌نیشت دوو كه‌سه‌وه‌ دانیشتبووم یه‌كیان هونه‌رمه‌ند دكتۆر (سه‌بیح كه‌له‌ش) و ئه‌وی تریشیان دكتۆر (بلاسم محه‌مه‌د) بوو (دواتر ناسیمن)، یه‌كێك له‌ هونه‌رمه‌نده‌كانی هاوڕێم منی به‌وان ناساند، منیش خۆشحاڵی خۆم بۆیان ده‌ربڕی و هاوڕێكه‌شم (خه‌ڵكی به‌خدا بوو) گوتی هه‌ست ده‌كه‌م نایانناسیت! منیش له‌وه‌ڵامدا گوتم به‌داخه‌وه‌ پێیان نه‌گه‌یشتووم، ئه‌م وه‌ڵامه‌ دكتۆر (سه‌بیح كه‌له‌شی) زۆر توڕه‌ كرد و یه‌كسه‌ر گوتی كاكه‌ گه‌نجه‌كان ئێمه‌ ناناسن، جا چۆن بمانناسن؟ یه‌كسه‌ر دكتۆر (بلاسم محه‌مه‌د) هه‌ڵی دایه ‌و گوتی، كاكه‌ توڕه‌مه‌به‌، ئه‌م كاكیه‌ له‌ باكوره‌وه‌ هاتووه‌ و دڵنیام (24) ساڵ ده‌بێت به‌غدای هه‌ر نه‌دیتووه‌، ڕووی كرده‌ من و به‌ تیله‌ی چاوه‌كانی پێی گوتم وانییه‌؟ منیش گوتم به‌ڵێ وایه‌، من له‌ ساڵی (1990)ـه‌وه‌ به‌غدام نه‌دیتووه‌، دواتریش به‌ هۆی جه‌نگ و گه‌مارۆی ئابوورییه‌وه‌ ئێمه‌ له‌ كوردستان و ئێوه‌ش له‌ ناوه‌ڕاست و باشوور به ‌ده‌ردی خۆمانه‌وه‌ ده‌مان ناڵاند، كێ ئاگای له ‌یه‌كتربوو؟ گوتم كاكه‌ من هه‌ر له‌ڕێگه‌ی نووسینه‌كانتانه‌وه‌ پێتان ئاشنابووم، خۆ به‌یه‌كتر نه‌گه‌یشتووین؟ دواتریش یه‌كسه‌ر منیش پرسیارێكم له‌ دكتۆر (سه‌بیح كه‌له‌ش) كرد و پێم گووت، ئایا تۆ چه‌ند ساڵ ده‌بێت كوردستانت نه‌دیتووه‌؟ ئه‌ویش به ‌پێكه‌نینه‌وه‌ گوتی كاكه‌ كوردستانی چی؟ بڵێ چه‌ند ساڵه‌ به‌خداد نه‌دیتووه‌؟ ئیدی دانیشتنه‌كه‌ بوو به‌ پێكه‌نین و هونه‌رمه‌ند و نووسه‌ری گه‌وره‌ی عێراق دكتۆر (بلاسم محه‌مه‌د) زۆر به‌شان و شه‌وكه‌تی هونه‌رمه‌ندانی كوردی هه‌ڵدا و خستنییه‌ خانه‌ی ڕێز و ستایشه‌وه‌ و شانازی به‌ نووسه‌ر و هونه‌رمه‌نده‌ شێوه‌كاره‌ كورده‌كانه‌وه‌ ده‌كرد و به‌ فه‌خره‌وه‌ ناوی هونه‌رمه‌ندی گه‌وره‌ی كورد (ئیسماعیل خه‌یات)ـی هێنا و یه‌كسه‌ر هه‌ستا سه‌ر پێ و گوتی ئه‌مه‌ش، وه‌ك ڕێزێك بۆ ئه‌م پیاوه‌ مه‌زنه‌.
به‌ڵام مخابن، ئه‌م هونه‌رمه‌نده‌ مه‌زنه‌ له‌ 9-4-2021 دڵه‌ گه‌وره‌كه‌ی له‌ شاری به‌غدا له‌لێدان كه‌وت و له‌ 10-4-2021 له‌ ڕێوڕه‌سمێكی ته‌واو شایسته‌دا و به‌ كه‌شاوه‌ی نیشتمانی به‌ پیاده‌ ماڵئاوایی به‌ره ‌و دوا مه‌نزڵگای لێكرا.
شایانی باسه‌، دكتۆر (بلاسم محه‌مه‌د) له‌دایكبووی (1954)ی شاری كوفه‌یه‌ و دواتر خێزانه‌كه‌یان ماڵیان ده‌چێته‌‌ به‌غدا. ساڵی (1975) په‌یمانگه‌ی هونه‌ره‌جوانه‌كانی به‌غدا به‌شی گرافیك و خۆشنووسین ته‌واو ده‌كات و دواتر درێژه‌ به‌ خوێندن ده‌دات له‌ كۆلیجی هونه‌ره‌جوانه‌كانی به‌غدا و هه‌ر له‌وێش بڕوانامه‌ی ماجستێر به ‌ده‌ست ده‌خات له‌ هونه‌ری ئیسلامی و دواتریش بڕوانامه‌ی دكتۆرا له‌ بواری ڕه‌خنه‌ی سینه‌مایی چنگ ده‌خات.
ئه‌م هونه‌رمه‌نده‌ به‌ یه‌كێك له‌ ڕه‌خنه‌گره‌ مه‌زنه‌كانی بواری هونه‌ری شێوه‌كاری، هونه‌ری گرافیك، هونه‌ری ته‌لارسازی، فه‌لسه‌فه‌ی جوانناسی داده‌نرێت و توێژینه‌وه‌كانی له‌ گۆڤاره‌ به ‌ناوبانگه‌كانی جیهاندا بڵاوكراونه‌ته‌وه‌. هه‌روه‌ها به‌ سه‌رچاوه‌ی هونه‌ر داده‌نرێت له‌ عێراق و زۆربه‌ی توێژینه‌وه‌كانیشی، وه‌ك لێكۆڵینه‌وه‌ی زانستی به‌های خۆیان هه‌یه‌ له ‌نێو شێوه‌كار و لێكۆڵه‌راندا. له‌گه‌ڵ ئه‌وه‌شدا له ‌دوای خۆی چه‌ندین كتێبی ناوازه‌ی بۆبه‌جێهێشتووین، كه‌ شایه‌تی هه‌ڵوه‌سته‌ له‌سه‌ركردنن. له‌ گرنگترین چاپكراوه‌كانیشی:
(الفن والقمامة، تبدل الذوق الجمالي- الفن والعمارة- الفن المعاصر ... اسالیبه‌ و اتجاهاته‌- الفن التشكیلي قراءة سیمیائیة في انساق الرسم- عزلة الفن في الثقافة العراقیة- تأویل الفراغ في الفنون الاسلامیة- شغب الفن .. القبول و الرفض)

© 2017 Hawler