ئایار 16, 2021

ئەرشیفی گەڕەكی تەیراوەی هەولێر لە پرۆژەیەكدا كۆدەكرێتەوە

ئاریان  دەرگەڵەیی - هەولێر

 

هونەرمەندی كورد "قادر ئەسعەد" حەیرانێكی لەسەر گەرەكی تەیراوەی شاری هەولێر بڵاوكردەوە ، كە 41 خولەكە و دەبێـتە درێژترین حەیران لە مێژووی كورد و یەكەمین جاریشە حەیران و لاوك لە پرۆژەیەكی هونەریدا كۆبكرێـتەوە و ژمارەیەكی وشەی كۆنی كوردیش كە خەریكبوو لە ناودەچوون لەم حەیرانەدا نوێ كراوەتەوە

ئەم حەیرانە و لاوكە لە نووسین و ئامادەكردنی خۆدی قادر ئەسعەد ، نەجمەدین بابەكر ئامێری كەمانی ژەنیوە، سەفەر عەلی بە ئامێری جەمبوش ، ئازاد خەیلانی بە ئامێری شمشاڵ، یونس باڵەبان بە ئامێری باڵەبان و دلێر بە ئامێری عود بەشداریان لەم بەرهەمدا كردووە".
هەرچەندە حەیرانەكە لە سەر گەڕەكی تەیراوە گوتراوە بەڵام باس لە چەندین كەسایەتی ناوداری شاری هەولێر دەكات ، هەندێك لەو كەسایەتییانە هەندێكیان لە ژیاندا نەماون و هەندێكیان ماون
ژمارەیەكی زۆر لە كەسایەتییە ناودارەكانی كوردستان لەسەر بەرهەمەی قادر ئەسعەدیان نووسیویە لەوانە ماموستانی فولكلۆرناس ( ئەسعەد عەدۆ ) نووسیویەتی جارێكیان زوو زوو كاك سعداللە پەرۆش وەڵامی چەند پرسیارێكی برای بەڕێزمان عبداللە پەشێو دەداتەوە كە لە سۆڤیەتەوە لە غوربەتی تەیراوە هوڕێنان دەكا سعداڵلاش زۆر بەجوانی باس لە شامینۆك ولۆبیای مام سەید دەكات ، باس لە چارپایەو كوڵلەو شەربەی سەربانان دەكا واتە بە وشە دیمەنی تەیراوەی بۆ تەسویر دەكات ، ئەوەتە دوای هێندە ساڵە هونەرمەندی دەنگخۆش كاك (قادر ئەسعەد) لە نامۆیی (سویدە)وە ، سۆزو غوربەتی بۆ تەیراوە قەقنەس ئاسا خۆی دەیسوتێنێ و بەم پەخشانە چیڕۆكە ئاوازدارە دەیەوێ لە خۆڵە مێشكەیدا سەرلەنوێ هەڵسێتەوە تاكو جارێكی دیكە بە 360 كوونە دەندووكەكەی خۆی بە ئاوازەكە بسوتێنتەوە لەبەرهێندێ پڕ بە دڵ بەحەزەوە پەنا بۆ یەكەیەكەی خەڵكی تەیراوە دەوڵەمەند ، هەژار ، هونەرمەند ، ڕۆشنبیران و دوكانداران و مامان و لاچەكبەسەران دەبا تا لە ڕێگای ئەوانەوە دڵی خۆی ساكین بكات كەمێك لە سووتانی غوربەتی وڵاتی ئەسكەندناڤیای ساردوسڕ هێور بكاتەوە چونكە ئەمجۆرە مرۆڤە دڵناسكانەی وەك كاك قادر ئەسعەد بە كوردستان و تەیراوەی جەرگ نەبێت دڵساكن نابن بۆیە لە نامۆییدا قرپەی گریانیان وەك بوڕكان دەتەقێتەوە ، هەرچەند لەسەر ئەمجۆرە بابەتانە بنووسم دڵ ئۆقرە ناگرێ بۆیە لێرەوە دەستخۆشی لە كاك قادر دەكەم و دەڵێم دەستخۆش تۆ توانیت پووختەی ژیانی خۆت و برادەرانت بنووسیەوە هەربمێنی
هەروەها فەرهەنگ غەفوور، بەڕێوەبەری گشتی رۆشنبیری و هونەری هەولێری لەبارەی ئەم حەیرانەوە نووسیویەتی " حەیران و لاوك و فۆرمەكانی دیكەی میوزیك لەناو ئەدەبی كوردییدا، تەواوكەری ئەدەبی زارەكین، بۆ پاراستن و زیندووهێشتنەوەی بەسەرهات و روودا و كارەساتەكان، كە لە مێژوودا بەسەر كورد هێندراون، ئەو بەرهەمەی هونەرمەند قادر ئەسعەدیش كە بەشێوەی لاوك و حەیران بڵاو كراوەتەوە، دەچێتە چوارچێوەی ئەو هەوڵە و دەستخۆشیی لێ دەكەم و بەرهەمەكەی بە هەنگاوێكی باش دەبینم".
هەروەها رەشاد كوردەی هونەرمەندی لە نووسینیكیدا سەبارەت بەم بەرهەمە نووسیویەتی ھونەرمەند قادر ئەسعەد مێژوێكی گەورە بۆ تەیراوە تۆمار دەكات تەیراوە ئەو گەرەكە هەژار نشینەیە بووە بە سیمبولێكی پڕ لە شانازی شاری هەولێر ی دێرین و لە دڵ و ڕەحمی ئەم گەڕەكەدا بەدرێژایی مێژو هەزاران كەسایەتی لە هەموو بوارەكان پێشكەش بە ژیاندا كراوە، هەربۆیە گەر دیقەتی مێژوی هەولێر بدەیت ئەبینیت زۆربەی كەسایەتیە ناسراوەكانی شاری هەولێر پەروەردەی دەستی تەیراوەن، قادر ئەسعەد لە ناخی چامەحەیرانێكدا لە شەریتێكی درێژ وێنای فیلمێكمان دەخاتە بەرچاوو ھێدی ھێدی بە نێو كورەو فورای كوچەو كۆڵانەكانی تەیراوە شۆڕمان دەكاتەوە.
لەم بارەیەشەوە هونەرمەند قادر ئەسعەد بۆ رۆژنامەی هەولێر دواوە دەڵێت: دوای سەركەوتنی ئەم كارەم ، چاوەڕوانی بەشی دووەمی ئەو حەیرانە بن هەوڵ دەدەم لە ماوەیەكی نزیكدا دەست بە تۆماركردنی بكەم.

© 2017 Hawler