تشرینی دووەم 26, 2020

(حەمید عوسمان) : "سیدیە تازەیەم لە (16) گۆرانی پێكهاتووە، بەشێكیان پێشتر بڵاوم كردۆتەوە! "

 

هونەرمەندی گۆرانیبێژ (حەمید عوسمان) یەكێكە لەو گەنجە دەنگخۆشانەی، كە بەشێوەیەكی خێرا لە رێگەی چەند تراكێكی گۆرانی و ڤیدیۆ كلیپێك لەنێو كۆڕی گۆرانی كوردیی دا خۆی ناساند، ئەو گۆرانیبێژە لاوە لەسەر تاوە ئەگەرچی لەژێر كاریگەری چەند هونەرمەندێكی كورد هاتە نێو گۆرانی گوتنەوە، بەڵام هەر زوو رێچكەیەكی بۆ خۆی دیاری كرد بۆ ئەوەی كاری هونەریی تیا ئەنجام بدات، لەمیانەی دیدارێكی دا بۆ خوێنەرانی "هەولێر" تیشكدەخاتە سەر چەند لایەنێك لە كارە هونەرییە تازەكان بەتایبەتی بەرهەم هێنانی ئەلبومێكی تازەی گۆرانی، لەگەڵ گوتنی (2) گۆرانی تازە بەشێوەی دوێت لەگەڵ دوو هونەرمەندی ناوداری كورد تۆمار كردووە.

 

لە دەستپێكی قسەكانی دا هونەرمەند (حەمید عوسمان) لەبارەی ئامادەبوونی ئەلبومێكی تازەی گۆرانی خۆی بەم شێوەیە گوتی : "ئەو سیدیە تازەیەم دەتوانم بڵێم بەرهەمی چوار بۆ پێنج ساڵی منە، دەمێكە خەریكی كۆكردنەوەی ئەو كۆمەڵە گۆرانییەم، بەتایبەتی شێواز و ستایلەكان و تێكستی گۆرانییەكان هەوڵی زۆرمدا، بۆ ئەوەی كارێكی جوانی لێ بهێنمە بوون، بەشێوەیەكی گشتی توانیم ئەلبومێكی هەمجۆر لەگۆرانی میلۆدی سەرنج راكێش تازە بهێنمە بەرهەم".

هەروەها لەبارەی ناوەرۆكی ئەو سیدیە تازەیەی ئەوەشی گوت : "ئەو سیدیە تازەیەم لە (16) گۆرانی پێكهاتووە، ناوم لێناوە (ئاوێنە) چونكە گۆرانی ئاوێنە دەستپێكی باشبوو بۆ ناساندنی من لەكاتی دەستپێكی كاری هونەرییمدا، هەروەها چەند گۆرانییەكم بەشێوەی "دوێت" لەگەڵ چەند هونەرمەندێكی ئازیز تۆمار كردووە، بەشێوەیەكی گشتی ئەلبومەكەم هەوڵێكی زۆرمداوە لە ئایندەیەكی زوو بڵاوی بكەمەوە، بەتایبەتی پلانی ئەوەم هەیە تا ناوەڕاستی ئەم ساڵ ئەو ئەلبومە بڵاو بكەمەوە، چونكە ئەو بەرهەمە یەكەم ئەلبومی گۆرانی منە و ئومێدی ئەوەم هەیە، بەشێوەیەكی باش بگاتە دەستی هونەردۆستان و گوێگران".

(حەمید عوسمان)ـی گۆرانیبێژ ئەوەشی نەشاردەوە، كە بیرۆكەی دیكەی لەبەردەستە گۆرانی دیكە بەشێوەی دوێت تۆمار بكات و لەمبارەیەوەش دەڵێت : "جگە لەو چەند گۆرانییەی بەشێوەی دوێت تۆمارم كردوون، بەتایبەی (2) گۆرانی لەگەڵ هونەرمەند (پەیوەند جاف) و گۆرانیەكیش لەگەڵ خاتوونی هونەرمەند (چنار)، لە داهاتووشدا پلانی ئەوەم هەیە لەگەڵ هەریەك لەهونەرمەندان (ناسری رەزازی و كەمال محەمەد) بەنیازم دوو گۆرانی بەشێوەی دوێت تۆمار و كلیپ بكەین، چونكە من پێم وایە گۆرانی دووانە یا دوێت تامو چێژی تایبەتی خۆی هەیە لای گوێگران و هەروها بۆ نزیك بوونەوەش لەهونەرمەندان و ستایلەكانیش كارێكی پێویستە!".

هونەرمەند (حەمید عوسمان) لەبارەی ناوەرۆكی بەرهەمەكانی دیكەی هەروەها رایگەیاند : "یەكێك لەكارەكانی دیكەم بریتیە، لە تۆمار كردنی چەند گۆرانییەك بەشێوەی گەشت، كە من وەك گوڵچنین ناوم لێناوە، دیارە لە گۆڵچنینی یەكەم سەركەوتنێكی باشم بەدەست هێنا، لە ئێستاشدا گوڵچنینی دووەم كارم لەسەر چەند گۆرانییەكی شاری هەولێر و دەوروبەری كردووە، دەمەوێ ئەمجارەیان گوڵچنینەكەم بۆن و بەرامی ئەو دەڤەرە جوانەی لێبێت، هەروەها گۆرانیەكیشم بە شانازیەوە لە هونەرمەندی گەورە (زیاد ئەسعەد) وەرگرتووە، كارم لەسەر ئەو گۆرانییەش بەشێوەیەكی باش كردووە".

 

عەبدولغەفار عەبدوڵڵا - هەولێر

 

© 2017 Hawler