ئایار 16, 2021

"سپیكردنەوەی خوێن"، ناونیشانی یەکەم ڕۆمانی نووسەر و چیرۆکنووس فەرهاد مستەفایە کە لە دوتوێی (329) لاپەڕەدا بڵاوکرایەوە. ئەم کتێبە لە بڵاوکراوەکانی ناوەندی رۆشنبیریی ئەندێشەیە.

فەرهاد مستەفا، کە ساڵانێکە وەکو چیرۆکنووس ناسراوە لەم هەفتەیەدا یەکەم رۆمانی بڵاوکرایەوە پرسیارە سەرەكییەكەی ئەم رۆمانە ئەوەیە، بۆچی تاكی (كورد) لە هەڵبژاردنی خواست و چارەنووسی خۆیدا دەستەپاچە و زەلیلە. بەدواكەوتنی وەڵامی ئەو پرسیارە دەمانخاتە بەردەمی فەزایەكی بەربڵاوی (شوێنكات)ەوە و چیرۆکی رۆمانەکە لە گۆرستانی (ئاودە ئایك)ی هۆڵنداوە، دەستپێدەكات تا شەقام و كۆڵانەكانی سلێمانی و شۆرجە و باب ئەلشێخی بەغدا و شێخەڵای هەولێر و پەنجا عەلی كەركوك و ناوچەكانی ژێر دەسەڵاتی شۆڕش. ئەمەش لە ساڵانی حەفتاكانی ڕابردووەوە دەستپێدەكات، تا ئەم سەروەختەی ئێستا.
جیا لەوەی زمانی تێكستی (سپیكردنەوەی خوێن)، خستنەڕوو و نیشاندانە، کە هەر ئەمەش کاری رۆمانووسانە، کە بەکارهێنانی زمانی پەسن و زیادە و حەشوەیی. ڕەنگە جوانترین تایبەتمەندێتی زمانی ئەم تێكستە ئەوەبێ كە درێژدادڕی ناكات. بەڵام خاڵیش نییە، لە زمانی زبر و لە گۆاستنەوەی ئەو زبریەتەدا دەستی نەپاراستووە. وەك چۆن دەركەوتەی هەر كارەكتەرێك، خاوەن بە شوناس و تۆن و دەنگی تایبەت بەخۆیەتی و خاڵی لەیەكچوون كۆیان ناكاتەوە.
ئەوەی بۆ خوێنەر دەبێتە خاڵێکی گرنگ بێلایەنی نووسەرە لە هەمبەر ڕووداوەكاندا، کە خاڵی گەشی تێكستەكەیە. ئەو لەبەركەوتنی دوو زەمەن و دوو نەوە، دادوەری ناكات، بەڵکو ئەو تەنها ڕووداوەکان پیشان دەدات و ئەوە خوێنەرە دەتوانێت داوەری بکات.
نووسەر سەبارەت بە ڕۆمانەکە دەیەوێت بڵێت "مەرج نییە هەموو ئەوانەی كە پەنجە دەخەنە ناو برینەكانەوە، بتوانن بنچینەی ئازارەكانمان بۆ كەشف بكەن. دەستبردن بۆ ئاشكراكردنی دزێوییەكانی پشت ڕواڵە جوانەكان، هونەرێكی قوورسە، بەتایبەت كە پەیوەست بێت بە قۆناغێكی درێژخایەنی شۆڕش و شۆڕشگێڕی و كۆمەڵگای كوردی."

© 2017 Hawler