ئاب 04, 2021

ئه‌مڕۆ یانه‌ی زاخۆ ده‌بێته‌ میوانی یانه‌ی مینای به‌سڕه‌

ئه‌مڕۆ دووشه‌مه‌، له‌ گه‌ڕی 32ـی یاریه‌كانی خولی نایابی تۆپی پێی عێراق، له‌ شاری به‌سڕه‌، یانه‌ی زاخۆ ده‌بێته‌ میوانی مینا، یارییه‌كه‌ش كاتژمێر (9:30) به‌ڕێوه‌ده‌چێت، میناش چاوی له‌وه‌یه‌ پێگه‌كه‌ی زاخۆ داگیربكات و پێشی بكه‌وێته‌وه‌.
یانه‌ی زاخۆ له‌م وه‌رزه‌ی خولی نایابی عێراقی ئاستێكی نایابی پێشكه‌ش كردووه‌، له‌ خانه‌كانی پێشه‌وه‌ ریزبه‌ندییه‌كه‌ دێت، به‌ڵام كێشه‌ی گۆڕینی راهێنه‌ری هه‌بووه‌، عه‌بدولوه‌هاب ئه‌بولهێل له‌ دوای سامی به‌حت و ئه‌حمه‌د سه‌ڵاح هاتووه‌، ده‌یه‌وێت جێ چه‌نجه‌ی خۆی له‌ تیپه‌كه‌ بنه‌خشێنێ، بۆ ئه‌م گه‌ڕش له‌ تواناكانی لیماوی به‌رگریكه‌ری به‌رازیلی بێبه‌ش ده‌بێت، كه‌ به‌ ره‌زامه‌ندی هه‌ردوولا تیپه‌كه‌ی جێهێشت، به‌ڵام زاخۆ پشتی به‌ یاریزانه‌كانی ئه‌حمه‌د زیادی هێرشبه‌ر و ئه‌حمه‌د زێڕۆ و موئه‌یه‌د عه‌بدولواحد و گه‌یلان لوقمان و محه‌مه‌د جه‌واد، له‌ هێلی پێشه‌وه‌ به‌ستووه‌، تا ئه‌نجامی باش به‌ده‌ستبهێنێت، محه‌مه‌د جه‌واد و ئه‌حمه‌د زیاد به‌ 7 گۆڵ گۆڵكه‌ری تیپه‌كه‌ن.
زاخۆ له‌ 31 یاریی رابردوو، 9 بردنه‌وه‌ و 14 یه‌كسان و 8 دۆڕانی هه‌یه‌، 41 خاڵی كۆكردووه‌ته‌وه‌ و له‌ خانه‌ی هه‌شته‌می ریزبه‌ندییه‌كه‌ دێت، 28 گۆڵی كردووه‌ و 30 گۆڵی لێكراوه‌.
مینا، دوای گۆڕینی راهێنه‌ر ئه‌نجامه‌كانی باشتربووه‌، یاسین ته‌های گۆڵپارێزی تیپه‌كه‌ش، دوای گه‌ڕانه‌وه‌ی له‌ پێكان سوودێكی زۆری به‌ تیپه‌كه‌ گه‌یاندووه‌، به‌ بردنه‌وه‌یان له‌ زاخۆ پێگه‌ی زاخۆ وه‌رده‌گرن و دێنه‌ خانه‌ی هه‌شته‌م، له‌ 31 یاریی رابردوو، 9 بردنه‌وه‌ و 11 یه‌كسان و 11 دۆڕانیان هه‌یه‌، به‌ 38 خاڵ له‌ خانه‌ی نۆیه‌می ریزبه‌ندییه‌كه‌ دێن، 34 گۆڵیان كردووه‌ و 35 گۆڵیان لێ كراوه‌، حوسێن یونسی هێرشبه‌ری یانه‌ی مینا به‌ 9 گۆڵ گۆڵكه‌ری تیپه‌كه‌یه‌.
له‌ كۆی 10 یاریی رابردووی نێوانیان زاخۆ ته‌نها یه‌ك یاری بردووه‌ته‌وه‌ و میناش 3 یاریی بردووه‌ته‌وه‌، له‌ 6 یارییش یه‌كسان بوونه.
یانه‌ی قوه‌ی جه‌ویه‌ 69 خاڵ له‌ 31 یارییدا پله‌ی یه‌كه‌می ریزبه‌ندییه‌كه‌ی گرتووه‌، ئه‌یمه‌ن حوسێنی هێرشبه‌ریشی به‌ 17 گۆڵ گۆڵكه‌ری خوله‌كه‌یه‌.

 

بارزان ئەکرەم - هەولێر

© 2017 Hawler