ئایار 16, 2021

پاریس سان جێرمان به‌ دوو وشه‌ پرسی نێیماری كۆتایی پێ هێنا

مامەیارە ئەحمەد - هەولێر

 

رۆژنامەی هەولێر، لە چوارچێوەی كۆهەواڵدا، رۆژانە تازەترین و گرینگترین هەواڵ و پێشهات و دەنگوباسە وەرزشییەكان بۆ گوێ و هزری خوێنەرانی دەگوازێتەوە، كە تێیدا پێشینهەواڵ بۆ گرینگترین و تازەترینیانە و بە هۆی فراوانیی بواری تۆپی پێ و فرەیی جەماوەر و هەواداری ئەو یارییەوە، پشكی شێر و زۆر بەر هەواڵەكانی ئەو یارییە دەكەون و لە كات و ئانوساتی پێشهات و هەواڵ و پاڵەوانیەتیی یارییەكانی دیكە، تیشكیان دەخرێتە سەر و پشكیان پاشگوێ ناخرێ، ئامانج لێی دانەبڕانی خوێنەرانە لە هەواڵ و ئاگەییە وەرزشییەكان و پەیبردنە بە سووچ و پەناكانی هەواڵە شاراوە و ئاشكرانەكراوەكان.

هانده‌رانی میلان له‌ دۆناڕۆما نیگه‌رانن
ڕاپۆرتێكی مێدیایی ئیتاڵی بڵاوی كرده‌وه‌، كه‌ كێشه‌ و ناخۆشی و گرژی كه‌وتووه‌ته‌ نێوان هانده‌رانی یانه‌ی میلان و گۆڵپارێزی یانه‌كه‌ جیانلویجی دۆناڕۆماوه‌.
بۆندی دۆنا ڕۆمای گۆڵپارێزی یانه‌ی ئه‌ی سی میلان، له‌ كۆتایی ئه‌م وه‌رزه‌دا ته‌واو ده‌بێ و تا ئێسته‌ ئه‌و یاریزانه‌ له‌سه‌ر نوێكردنه‌وه‌ی بۆنده‌كه‌ی ڕازی نه‌بووه‌.
مێدیای سكای سپۆرتسی ئیتاڵی بڵاوی كرده‌وه‌، كه‌ ئۆ‌ڵتراسی میلان چووه‌ته‌ یانه‌كه‌ و داوای ئه‌وه‌ی كردووه‌ دیدارێك له‌گه‌ڵ دۆناڕۆمادا بكه‌ن.
ئاماژه‌ی به‌وه‌ش كردووه‌، كه‌ به‌رپرسانی یانه‌ی ئه‌ی سی میلان ئه‌و كاره و داوایه‌یان ڕه‌ت كردووه‌ته‌وه‌، به‌ڵام دۆنا ڕۆما به‌ هه‌ر دۆخێك بێ ده‌رچووه‌ بۆ ئه‌وه‌ی قسه‌یان له‌گه‌ڵدا بكا.
ئۆ‌ڵتراس به‌ دۆنا ڕۆمای وتووه‌: ئه‌گه‌ر هه‌فته‌ی دادێ واژۆی نوێكردنه‌وه‌ی بۆنده‌كه‌ت نه‌كه‌ی، پێویست ناكا به‌شداریی یارییه‌كه‌ی نێوان میلان و یوڤی بكه‌ی، كه‌ بڕیاره‌ یه‌كشه‌ممه‌ی دادێ كاتژمێر 09:45 له‌ چوارچێوه‌ی یارییه‌كانی گه‌ڕی 35ـی خولی ئیتاڵیا به‌رێوه‌ بچێ.
ئۆڵتراس میلان، تیمێكی هانده‌رانی یانه‌ی میلانه‌ و زۆر هۆگر و وابه‌سته‌ی یانه‌كه‌یانن، به‌رده‌وام له‌ په‌یژه‌كانی لای خواره‌وه‌ی یاریگه‌ی سان سیرۆی تایبه‌ت به‌ یانه‌كه‌یانن، زۆر هانی یانه‌كه‌یان ده‌ده‌ن و پاڵپشتیانن و به‌ هه‌ره‌ توندترین و وابه‌سته‌ترین هانده‌ران بۆ یانه‌كه‌یان داده‌نرێن.
ئه‌و هانده‌رانه‌ هیچ دروشمێكی ڕه‌گه‌زپه‌رستانه‌ و وابه‌سته‌ی بیروباوه‌ڕ پره‌نسیپانه‌ دژی هیچ یاریزانێك ناڵێنه‌وه‌.
پاریس سان جێرمان به‌ دوو وشه‌ پرسی نێیماری كۆتایی پێ هێنا
هه‌رچه‌نده‌ یانه‌ی به‌رشلۆنه‌ له‌ هه‌وڵ و كۆششه‌كانی بۆ گه‌ڕانه‌وه‌ی نێیمار دا سیلڤا بۆ ریزه‌كانی به‌رده‌وامه‌ و ده‌یه‌وێ له‌ هاوینی دادێ ئه‌و كاره‌ سه‌ر بگرێ، به‌ڵام یانه فه‌ڕه‌نسییه‌كه‌، به‌ ته‌واوی ده‌رگای به‌ رووی ئه‌و هه‌وڵه‌ی یانه‌ی به‌رشلۆنه‌دا داخست.
رۆژنامه‌ی ماركا بڵاوی كردووه‌ته‌وه‌، كه‌ كارگێریی به‌رشلۆنه‌ به‌م دواییه‌ پێوه‌ندییان به‌ به‌رپرسانی یانه‌ی پاریس سان جێرمانه‌وه‌ كردووه‌ بۆ ئه‌وه‌ی نێیماری 29 ساڵان ببه‌نه‌وه‌ ریزه‌كانیان.
به‌ڵام یانه‌ی پاریس سان جێرمان، به‌ پوختی وه‌ڵامی داونه‌ته‌وه‌ كه‌ نێیمار "بۆ فرۆشتن نییه‌".
پێشتر نێیمار ئاره‌زوو و خواستی خۆی بۆ گه‌ڕانه‌وه‌ بۆ یانه‌ی به‌رشلۆنه‌ نه‌شاردبووه‌وه‌، تا جارێكی تر له‌ ریزه‌كانی به‌رشلۆنه‌ و له‌ هاوشانی مێسی و هاوڕێكانی دیكه‌ یاری بكا، ئه‌ویش ئه‌و بۆنده‌یه‌، كه‌ خوان لاپۆرتای سه‌رۆكی یانه‌كه‌ پێی خۆش ده‌بێ.
سه‌ره‌ڕای ئه‌وه‌ی نوێكردنه‌وه‌ی بۆندی نێوان نێیمار و یانه‌كه‌ی، كه‌ له‌ هاوینی 2022ـدا كۆتایی پێ دێ، كێشه‌ و به‌ربه‌ستی تێ كه‌وتووه‌، به‌ڵام یانه‌كه‌ وابه‌سته‌یی ته‌واوی خۆی بۆ هێشتنه‌وه‌ی نێیمار و یاریكردنی له‌ هاوشانی كیلیان ئمباپێ ده‌ربڕیوه‌، كه‌ بوونه‌ته‌ دوانه‌یه‌كی مه‌ترسیدار.
له بارێكیشدا ئه‌گه‌ر بیه‌وێ بگه‌ڕێته‌وه‌ به‌رشلۆنه‌، له‌سه‌ر نێیمار پێویسته‌ كه‌ رازی بێ به‌ كه‌مكردنه‌وه‌ی مووچه‌كه‌ی، به‌و پێیه‌ی یانه‌ی به‌رشلۆنه‌ كێشه‌ی دارایی هه‌یه‌ و ڕه‌وشی كۆرۆنا وای كردووه‌ دۆخی یانه‌كه‌ له‌ رووی داراییه‌وه‌ نه‌گاته‌ بارێكی جێگیر.
نێییمار له‌ ساڵی 2017ـدا به‌ گرانترین بۆند له‌ مێژووی تۆپی پێدا كه‌ بڕه‌كه‌ی 222 ملیۆن یۆرۆ بوو، له‌ یانه‌ی به‌رشلۆنه‌وه‌ په‌یوه‌ندیی به‌ یانه‌ی پاریس سان جێرمان كرد، به‌ڵام ئه‌و ئاست و ئه‌نجامانه‌ی نه‌بوو كه‌ چاودێرانی وه‌رزشی لێیان چاوه‌ڕێ ده‌كرد، بۆیه‌ هه‌م یانه‌ی به‌رشلۆنه‌ و هه‌م خودی نێیماریش هه‌وڵی پێكشادبوونه‌وه‌یان داوه‌ و تا ئێسته‌ هه‌وڵه‌كانیان سه‌ركه‌وتوو نه‌بووه‌.

© 2017 Hawler