کانونی دووەم 19, 2021

بۆچی كورد نەیتوانیوە بژاردە دروست بكات؟

مەشخەڵ كەوڵۆسی

 

هەمیشە گوێبیست و خوێنەری هەزاران ڕەخنە و ناڕەزایی دەبین كە ئێمەی قەڵەم بەدەست و نوسەر ئاراستەی كۆمەڵگە و حوكم و سیاسەتی كوردستانی دەكەین، بەجۆرێك هیچ دیاردە و هەنگاوێك نەماوە لەژێر تیرو نەشتەری ڕەخنەكانی ئێمە قوتارببن و، ئێمە نوكی نەشتەری ڕەخنە لەهەناویان گیرنەكەین!.
ئەم نەهجە ڕەخنەكارییە، ئەگەرچی بەشێكی ڕاست و دروست بێت و بەزمانی بیناكارانە بنوسرێت و بگوترێت، بەڵام بەشەكەی تری بەزمانی برینداركەر و بێزراو، بەنیەتی تێكدان و كاولكاری و شكاندنی ئێسكەكانی یەكتر بڵاودەكەینەوە. ئەوەش بووەتە هۆی دروستبوون و هاتنە پێشەوە نەوەیەك، كە لەسۆسیالمیدیا دەبینین، جگەلە جنێودان و سوكایەتی كردن بەپیرۆزییەكان و دەستدریژی بۆ سەر ژیانی تایبەتی تاكەكان، هیچ بەرنامە و خویەكی تری نیە.
پەتای بێ ئومێدی و خەونی تێكدان و سوكایەتیكردنی بەهەموو شتێك، ئەگەر بەشێكی زۆری پەیوەندی بە شێوازی حوكم و قەیرانەكانی كۆمەڵگە و كێشەی داراییەوە هەبێت، بێگومان بەشی هەرە زۆرتری پەیوەندی بەو پرۆژەیەوە هەیە كەلە كۆتایی نەوەدەكانی سەدەی ڕابردووەوە چەند پرۆژەیەكی ڕۆشنبیری بەبەرنامە كاریان لەسەر دەكرد و میدیاكانیش برەویان پێدەدا و، ئەستێڕەسازییان لەسەر دەكرد، تاكو حاڵ گەیشتە ئەوەی ئەمڕۆ دەیبینین و، پێم وانیە تاكو چەندین دەیەی تر كۆمەڵگەی كوردی بتوانێت ئەم دیاردە زۆر خراپە بنەبڕ بكات، یان لانی كەم بچوكی بكاتەوەو ئاسەوارەكانی هەڵبمژێت.
لەكۆی هەموو سەرنجەكان، بۆیەكجاریش نەمان بینی، ڕەخنەیەكی جیدی ئاراستەی خودی ئەو ڕەخنەگرانە بكرێت كە بوونەتە ماكینەی بەرهەمهێنانی بێ ئومێدی. بۆیەكجاریش نەمان پرسی: ئایا ئەو ڕەخنەگر و ڕۆشنبیرانە، خۆیان چییان پێشكەشی كۆمەڵگە و فەرهەنگ و سیستەم كردووە؟ ئەوان جیاوازییان چییە لەو كۆمەڵگە و حوكم و سیستەمەی كە داونیانەتە بەر نەشتەری ڕەخنە؟ كوا بەهەرمیان و كوا جیاوازییان؟.
پەندێكی كوردی هەیە دەڵێت: قسە هەژارە، هەموو كەس دەتوانێت بیكات!. بەمانایەكی ڕوونتر: ڕۆشنبیران و ڕەخنەگران، تەنها قسەیان هەیە، ئەی كوا كردەوەو بەرهەمێكی جیاواز لەو كۆمەڵگەیەی كە شەوتا بەیانی و ڕۆژتا ئێوارە ئێوە ڕەخنەی لێدەگرن؟ جیاوازی بابایەكی قاوەخۆری قەڵەم بەدەست چیە لەگەڵ ئەو كەسە هەژارە مەحرومەی كە ناتوانێ زیاتر بكات لەوەی كە كردوویەتی؟
لەمێژە بڕوای تەواوم هەیە بەوەی ئەوانەی زۆرترین ڕەخنە دەگرن، خۆیان زۆرترین ڕەخنەیان تێدایە و بۆلادانی سەرنج لەسەر خۆیان، پێش دەستی دەكەن و ڕەخنە لەدەوروبەر دەگرن، بەجۆرێك ئەگەر هاوكێشەكە پێچەوانە بكەینەوەو، قەڵەم و میدیا بدەینە دەستی ئەوانی تر و بێن ڕەخنە لەڕۆشنبیرەكان بگرن، ئەوەندەی بارستایی گەردوون ڕەخنە و كەموكوڕیی لە بابای ڕەخنە گری قاوەخۆردا هەیە!.
لەمڕۆژانەدا لەسلێمانی بۆیادی دەزگای مەودا میدیا، ڕۆشنبیران بانگهێشتكرابووین، ئەوەی لەوێ بینیمان، تەواو ئەو باوەڕەی سەلماند كە پێم وایە كۆمەڵگەی كوردی نەیتوانیوە نوخبە دروست بكات و، ئەوانەی خۆیان بەڕۆشنبیر و ڕەخنەگر دەزانن، هیچ جیاوازییەكیان نیە لەو گەندەڵ و یاسا شكێنانەی كە شەوتابەیان ڕەخنەیان لەسەر دەنوسن.
ڕۆشنبیرەكانی شار، بۆ وەرگرتنی كتێبەكانی مەودا، غەوغایەكیان دروستكرد، بەهیچ داواكارییەكی بەڕێوەبەرانی هۆڵەكە كۆنترۆڵ نەكرا، ڕۆشنبیرە گەورەكانی شار! فڕكان فڕكانیان بوو بۆ وەرگرتنی كتێب، وەك ئەوەی لەسەر شەقامەكان دەبینین بۆ وەرگرتنی بچوكترین پێداویستی خەڵكی سادە نۆرە بڕی و یاسا شكێنی دەكەن.
لەدوای بینینی ئەو دیمەنە شەرمهێنەرە كەبووبەهۆی ئەوەی مەراسیمەكەش بوەستێت، تەنها ئەم پرسیارە بووەتە مۆتەكە بۆم: ئەگەر ڕۆشنبیران بۆ وەرگرتنی كتێبێك كەنرخەكەی كەمتر لە 5000 دینارە، ئەوە بكەن كە كردیان، ئەبێ بۆ ئیمتیازی بەلاش و خانەنشینی و ئیفاد و دۆلار و پلەو پۆست، چییان كردبێت و چۆن بازیان بەسەر ملی هەموو یاسا و دۆستایەتی و ئەخلاقێكدا دابێت؟.
* سەرۆكی ناوەندی چاوی كورد

© 2017 Hawler