ئەیلول 19, 2021

٤١ ناوچەی توركیا، دارستانی لێ دەسووتێت و بنەدارێکی زۆر و دەیانهەزار سەر مەڕوماڵات لەناو چوونە

بەبێ ئەوەی هۆكارەكەی بزانرێت، ئاگر لە ٤١ ناوچەی توركیا هەڵبوو، كە ٨١ دارستانی سووتاندووە، ئەو ئاگرەش بە جۆرێك گەورە بوو و تەشەنەی كرد، بە دەیان هەلیكۆپتەر و فڕۆكەی بێفرۆكەوان نەیانتوانیوە ئاگرە دامرکێننەوە، بۆیە ئاگركەوتنەكە زیانی بە دەیان دارستان و گوند و مەڕوماڵات و خانوو گەیاندووە و، تاوەكو ئێستاش حەوت هاووڵاتی گیانی لە دەست داوە.

وەزیری كشتوكاڵی توركیا، رەخنەی توندی لە دامەزراوەی فڕۆكەوانی توركیا گرت، چونكە وەكو پێویست نەیانتوانیوە ئاگرەكان بكوژێننەوە و، جگە لەوەی دوا كەوتوون، لەسەرەخۆ و خاویش بوونە لە چۆنیەتی كوژراندنەوەی ئاگرەكە.
بەكر پاكدەمیرلی وەزیری كشتوكاڵی توركیا لە هەژماری تایبەتی خۆی لە تویتەر نووسیویەتی: ”بە شەش فڕۆكە و، نۆ فڕۆكەی بێفڕۆكەوان، ٥٤ هەلیكۆپتەر و چوارهەزار كەس خەریكی كوژاندنەوەی ئاگرەكە بوونە."
بە گوێرەی گوتەی پاكدەمیرلی بێت، لە كۆی ٨١ ئاگركەوتنەوە لە ٤١ ناوچەی توركیا، توانیویانە ٧٠ی کۆنترۆڵ بكەن و ١١ی تریش تاوەكو ئێستا هەر ئاگری لێیە و کۆنترۆڵ نەكراوە.
پاكدەمیرلی وەكو رەخنەیەك بۆ ئەو فڕۆكانەی لە توركیا بۆ ئاگر كوژاندنەوە بەكار دەێت دەڵێت: ”فڕۆكەكان وەكو ئەوە وایە، دوكانێكی فڕۆشتنی كەلوپەلی ئانتیكت هەبێت ئەوەندە كۆنە. ئێمە كە دەڵێین فڕۆكە، دەبێت تازە بێت و تەكنەلۆژیای بەرز بێت و ئامفیبیك بێت."
جەناب ئاشچی سەرۆكی دامەزراوەی فڕۆكەوانی توركیا، لە دیمانەیەكیدا لەگەڵ كەناڵی تەلەڤزیۆنی (سی ئێن ئێن)ی توركی، دەڵێت بە هۆی قەیرانی داراییەوە نەیانتوانیووە فڕۆكەكانیان تازە بكەنەوە و چاكی بكەنەوە.
ئاشچی دەڵێت: ”لە ٢٠١٠ەوە فڕۆكەكانمان چاك نەكردووەتەوە، هۆكارەكەشی نەبوونی پارە بووە. ئەم فڕۆكانە دەبێت بەردەوام چاودێری بكرێت لەگەڵ ئەو كۆمپانیایەی دروستی كردووە و دەبێت لەسەر هێل بین تا ساڵانە ئەو كەلوپەلانەی بۆ بهێنرێت كە پێویستە، بەڵام ئێمە ئەوەمان نەكردووە، بۆیە لە كاتی ئاگر كەتنەوەیەكی لەو شێوەیە نەمانتوانیووە بەكاری بهێنین“.
ئەو دامەزراوەیە ملیارێک و ٥٠٠ملیۆن دۆلار قەرزارە، بۆیە ناتوانن بە هیچ شێوەیەك تەندەری كڕینی فڕۆكەی ئاگر كوژاندنەوە، یاخود چاككردنی ئەو فڕۆكانەی لەبەردەستن رابگەیەنن.
تاوەكو ئێستا نەزانراوە زیانە مادییەكانی ئەو ئاگرە چەندە، بەڵام وەكو ئەوەی میدیاكانی توركیا باسی دەكەن، زیانەکە سەدانملیۆن دۆلارە، چونكە بەرهەمی كشتوكاڵی سەدان جوتیار لەناو چووە و چەندین لادێ بوونەتە خەڵووز و دەیانهەزار داریش سووتاون.

© 2017 Hawler