ئەیلول 18, 2020

بەرگریی شارستانی هۆشداری دەداتە هاووڵاتیان و شوفێران

بەڕێوەبەری گشتی كەشناسی و بوومەلەرزەزانی هەرێمی كوردستان ئاشكرای دەكات، شەپۆلێكی گەرما رووی لە هەرێمی كوردستان كردووە و ماوەی هەفتەیەك بەردەوام دەبێت، لە هەندێك ناوچە بەرزترین پلەی گەرما دەگاتە سەرووی 50 پلەی سیلیزی. بەرگریی شارستانی هۆشداری بە هاووڵاتیان و شوفێران دەدات.

بەرزبوونەوەی پلەی گەرما وایكردووە شوێنە گەشتیارییەكانی هەرێمی كوردستان جووڵەیان تێبكەوێتەوە، بەشێكی زۆری كەپرە گەشتیارییەكان بەرناكەون و پڕبوونە لە گەشتیار.
لە ڕاگەیەنراوێكی بەڕێوەبەرایەتی بەرگریی شارستانی هەولێر هاتووە، كۆمەڵێك ڕێنوێنی هەیە دەبێت هاووڵاتیان و شۆفێران ڕەچاوی بكەن.
پێویستە تا دەكرێ لە كاتژمێر 11ـی بەیانی تا كاتژمێر پێنجی ئێوارە لە ماڵەكانتان بمێنەوە و ئەگەر زۆر پێویست نەبوو مەیەنە دەرەوە، هەروەها ئاو و شلەمەنییەكان زۆر بخۆنەوە، چونكە لەش بەهۆی ئارەقكردن شلەی لەشی لە دەست دەدات.
باس لەوەش كراوە، كەسانی بە تەمەن و منداڵان لە كاتی گەرمیدا نابێت بێنە دەرەوە بۆ ئەوەی تەندروستییان تێكنەچێت، ئەوانەی لە دەرەوە و بەر تیشكی خۆر كار دەكەن، هەوڵ بدەن كڵاوێك یان هەر شتێك بێت لەسەر سەریان دابنێن با ڕاستەوخۆ تیشكی خۆر بەریان نەكەوێت.
لە كۆتایی ڕێنوێنییەكاندا هاتووە، زۆر گرینگە لەكاتی نیوەڕۆ ئۆتۆمبێل لێ نەخوڕیت و پاڵەپەستۆ مەخەرە سەر ئامێرە كارەباییەكان و ئاگاداری شۆرتی كارەبا بن، هیچ كەلوپەلێك لەناو ئۆتۆمبێل جێمەهێڵن و هەوڵ بدەن لە ڕۆژێك دوو جار خۆتان بە ئاوی فێنك بشۆن ئەگەر دەرفەت هەبوو.
فازل ئیبراهیم، بەڕێوەبەری گشتی كەشناسی و بوومەلەرزەزانی هەرێمی كوردستان، بە "هەولێر"ـی راگەیاند، هەر وەكو هەفتەی رابردوو رامانگەیاند بوو كە پێشبینی دەكرێت ئەم هەفتەیە شەپۆلێكی گەرما سەرتاسەری ناوچەكە، عێراق بە شێوەیەكی گشتی، هەرێمی كوردستانیش بگرێتەوە، لە رۆژی هەینی كاریگەری شەپۆلی گەرما بە دیار كەوتووە و كاریگەرییەكانی بەردەوام دەبێت تا رۆژی پێنج شەممە، ئەم هەفتەیە 4 تا 6 پلە، پلەكانی گەرما بەرز دەبنەوە، پێشبینی دەكرێت پلەكانی گەرما رۆژی دوو شەممە و سێ شەممە بگاتە بەرزترین پلە و لە سنووری پارێزگای كەركووك، ئیدارەی گەرمیان و قەزای مەخموور بگاتە سەرووی 50 پلەی سیلیزی، لە هەولێر 48 پلە، سلێمانی 45 پلە و دهۆك 44 پلەی سیلیزی بێت.
بەڕێوەبەری گشتی كەشناسی و بوومەلەرزەزانی هەرێمی كوردستان، روونیشیكردەوە :" بە گوێرەی ئەو پێشبینیانەی كە لە بەردەستە لە رۆژانی جەژن كۆتایی بەو شەپۆلە گەرمایە دێت، راستە پلەكانی گەرما هەر بە بەرزی دەمێنەوە، لەبەر ئەوەی ئێمە لەناو وەرزی هاوینداین، بەڵام دەتوانین بڵێین گەرمایەكە ئاسایی دەبێت و هیچ زیانێكی نابێت.
فازل ئیبراهیم، جەختی لەوەشكردەوە:" لەگەڵ دەزگاكانی بەرگری شارستانی لە هەماهەنگی داین رێنمایی بڵاو دەكەینەوە، داواكارین لە هاووڵاتیان ئەم هەفتەیە، بەتایبەتی لە كاتژمێر 11ی بەیانی تا 4ی دوای نیوەڕۆ لەو كاتانە زۆرترین تیشكی خۆر بەر زەوی دەكەوێت، پلەكانی گەرما بەرز دەبنەوە، ئەگەر كارێكی زۆر پێویست نەبێت نەچنە بەر تیشكی خۆر، ئەگەر بچنە دەرەوەش بچنە بەر سێبەر، یان چەتر بەكاربهێنن، بۆ ئەوەی تیشیكی خۆر راستەوخۆ كارنەكاتە سەریان، بەتایبەتی منداڵان و كەسانی بە تەمەن".

ڕائیب جادر - هە‌ولێر

© 2017 Hawler