ئاب 09, 2020

شۆفێران گلەیی لە نەبوونی هێما و ڕێنمایی هاتووچۆ لە رێگە گشتییەكان دەكەن

بەهۆی سەختی و خراپی و نەبوونی هێمای رێنوێنی و تابلۆكانی هاتووچۆ و هێڵی سپی لە رێگە گشتییەكان كاری شوفێرانی زەحمەت كردووە و زۆرجار بەهۆی نەبوونی هێمای هاتووچۆ رووداوی ترسناك روویداوە، بەو هۆیەوە چەندین هاووڵاتی گیانیان لە دەستداوە و بریندار بوونە. گوتەبێژی بەڕێوەبەرایەتی هاتووچۆی سۆران، دەڵێ، ساڵانە بە هەزاران هێما لە رێگە گشتییەكان دادەنرێن، بەڵام ئەوەی لە هەمووی گرنگتر پابەندبوونی شۆفێرانە بە رێنماییەكان و كاركردنە بە هێماكانی هاتووچۆ، چونكە ئەگەر كار بە رێنماكان نەكەن رووداوەكانی هاتووچۆ هەر زیاتر دەبن.

لە هەرێمی كوردستان لە سەرەتای ساڵی 2019وە تا كۆتایی مانگی 11، چوار هەزار و 217 رووداوی هاتووچۆ تۆماركراون، بەهۆی رووداوەكانی هاتووچۆ لەو 11 مانگەدا 547 كەس لە هەرێمی كوردستان گیانیان لەدەستداوە و شەش هەزار و 363 كەسی دیكە برینداربوون.
كەمال نوری، شۆفێرێكە و رۆژانە لە هێڵی حاجی ئۆمەران – هەولێر كاری تەكسی دەكات، بۆ "هەولێر" دیاركرد:" رێگەی حاجی ئۆمەران لە زۆر شوێن خراپ بووە، بەهۆی سرووشتی شاخاوی ناوچەكە، لە وەرزی زستان بەفر و تەمومژی زۆر دەگرێتەوە، وێڕای رووچوونی رێگەكە لە چەند شوێنێكدا، هاوكات نەبوونی خەتی سپی كێشەی زۆری بۆ شوفێران دروست كردووە، لە كاتەكانی تەمومژ، هەندێكجار مەترێك پێش خۆمان نابینین، بۆیە ئەگەر بێت و هێڵی سپی و هێماكانی هاتووچۆ هەبێت ئەوا ئاسانكاری زۆرمان بۆ دروست دەبێت.
نوری، روونیشیكردەوە:" نەبوونی هێماكانی هاتووچۆ، هۆكارێكی سەرەكییە بۆ دروستبوونی رووداوەكانی هاتووچۆ، بۆیە هیوادارین لایەنە پەیوەندیدارەكان هەموو هەوڵێك بدەن بۆ چارەسەركردنی گرفتەكانی هاتووچۆ لەو رێگەیەدا، چونكە رۆژانە هەزاران ئۆتۆمبێل هاتووچۆی پێدا دەكەن.
ئیبراهیم حەتەم، شۆفێرێكی دیكەیە بۆ "هەولێر" گوتی:" لەزۆربەی رێگە گشتییەكان هێماكانی هاتووچۆ نەماون، یان ئەو نووسینەی لەسەرە نەماوە، ئەوەش سەری لە شۆفێر شێواندووە، بۆیە داوا لە لایەنە پەیوەندیدارەكان دەكەین رێگە گشتییەكان هێما رێژ بكەن، بەتایبەتی لەناوچە شاخاوییەكان، بۆ ئەوەی گیانی شۆفێران و هاووڵاتیان سەڵامەت بێت".
رائید دلاوەر لەتیف، گوتەبێژی بەڕێوەبەرایەتی هاتووچۆی سۆران بە "هەولێر"ـی گووت:" هەموو رێگە سەرەكییەكانی سنووری هەر چوار قەزای سۆران، مێرگەسۆر، چۆمان و رواندز تابلۆ رێژ كراون، لەناو سەنتەی قەزاكانیش تابلۆ دانراوە، هەتا لە ناحیەكانیش تابلۆ دانراوە، هەر شوێنێك پێویستی بە تابلۆ بێت دانراوە، بەڵام لەگەڵ ئەوەش بەهۆی قەیرانی دارایی نەتوانراوە لە هەموو شوێنەكان دابنرێت، بەڵام لە شوێنە قەرەباڵغەكان دانراوە، لە رێگەی حاجی ئۆمەران- تا هەولێر تابلۆ دانراوە، ساڵانە بە هەزاران هێما دادەنرێن، ئەوەش هەموو بۆ ئەوەیە شۆفێران بە پێی رێنمایی ئەو هێمانە هاتووچۆ بكەن، بۆ ئەوەی دوور بن لە رووداوی هاتووچۆ، بەڵام ئەوەی لە هەمووی گرنگتر پابەندبوونی شۆفێرانە بە رێنماییەكان و كاركردنە بە هێماكانی هاتووچۆ، چونكە ئەگەر كار بە رێنماكان نەكەن رووداوەكانی هاتووچۆ هەر زیاتر دەبن.
گوتەبێژی بەڕێوەبەرایەتی هاتووچۆی سۆران دەشڵێ:" رووداوەكانی هاتووچۆ لە شەش مانگی یەكەمی ئەمساڵ بەراورد لەگەڵ شەش مانگی یەكەمی ساڵی رابردوو كەمیان كردووە، ژمارەی قوربانییەكانیش كەمیان كردووە، بەڵام رووداوی ترسناكیش هەبووە و هاووڵاتی بەو هۆیەوە گیانی لە دەستداوە، یان بریندار بووە.
رائید دلاوەر لەتیف، گوتەبێژی بەڕێوەبەرایەتی هاتووچۆی سۆران زیاتر دەڵێ:" بەهۆی ڤایرۆسی كۆرۆنا و قەدەغەی هاتووچۆ سەرپێچییەكان كەمیان كردووە، بەڵام لەگەڵ ئەوەش سەر پێچی هەبووە، بەتایبەتی لە رێگەی كامێراوە تەنیا لە ماوەی 6 مانگی رابردوودا زیاتر لە 2 هەزار شۆفێر سزا دراون".

© 2017 Hawler