ئەم پەڕەیە چاپ بکە

لە ئیستەنبۆڵ 45 داعش دەستگیر كران

هەفتەی رابروو لە ئیستەنبۆڵ ئۆپەراسیۆنێكی زۆر فراوان بۆ دەستگیركردنی ئەندامانی گروپی تیرۆرستی داعش دەستی پێكرد و، تاوەكو ئێستایش 45 داعشیان دەسگیر كردوە.

ئاژانسەكانی هەواڵی توركیا بڵاویان كردەوە، هەفتەی رابروو لە ئۆپەراسیۆنێكی زۆر فراواندا، پۆلیسی ئیستەنبۆڵ بە هاوكاری ئاساییش، توانیان لە چەندین گەڕەك هەڵبكوتنە سەر شانە نووستوەكانی داعش.
تاوەكو ئێستا 45 داعش دەستگیر كراوە، كە زۆربەیان بە رەگەز سووری و عیڕاقین. هەر لە هەواڵەكەدا هاتوە، حكوومەتی توركیا بە نیازە ئەو داعشانە سنوورداش بكاتەوە بۆ وڵاتی خۆیان و رادەستی حكوومەتی عێڕاق و سووریایان بكاتەوە.
جگە لە ئیستەنبۆڵ هەر لەم مانگەدا زیاتر لە 100 داعش لە شاری هەتای لە توركیا دەستگیر كران. لەوێش لە ئەنجامی ئۆپەراسیۆنێكی دەزگای ئاساییشی شاری هەتای توانرا ئەو ئەندامانەی داعش دەستگیر بكرێن.

جەلادەكەی داعشیش هەر لە توركیا دەستگیر كرا
تیرۆرست (مەحموود ئا) كە بە جەلادەكەی گروپی تیرۆرستی داعش ناوی دەركردبوو، لە هەتای شاری توركیا لە لایەن ئاساییشەوە دەستگیر كرا.
رۆژنامەی (خەبەر تورك) بڵاوی كردەوە، ئەمڕۆ ئاساییشی شاری هەتای لە توركیا، توانیان تیرۆرست (مەحموود ئا) كە بە جەلادەكەی داعش ناوی دەركردبوو دەستگیر بكەن.
ئەو تیرۆرستە بە رەگەز سوورییە و تەمەنی 28 ساڵانە، ویستویەتی بە رێگەی قاچاغ لە توركیا بگاتە یۆنان، بەڵام لە هەتای دەستگیر كراوە.
(مەحموود ئا) بۆ رۆژنامەی (خەبەر تورك) دان بەوەدا دەنێت سەر بە گروپی تیرۆرستی داعش بوە و چەندین تاوانیشی ئەنجام داوە.
ئەو دەڵێت: "2 برا و خێزانەكەشم لە پێناو داعشدا شەڕیان دەكرد. یەكێك لە براكانم كوژرا و دایكی خێزانەكەشم كاری هەواڵگری بۆ داعش دەكرد و هەر شتێكی ببیستایە بە نهێنی بۆ داعشی دەگواستەوە. جگە لەوەیش 2 برای خێزانەكەشم هەر چەكداری داعش بوونە".
باس لەوەیش دەكات دوای ئەوەی بۆی دەركەوتوە، كە ئیتر ژیان بۆ داعش لە سووریا زەحمەت بوە، بۆیە پارچە زەوییەكی هەبوە و فرۆشتویەتی و بەو پارەیش بە رێگەی قاچاغ خۆی گەیاندوەتەوە شاری هەتای.