ئاب 04, 2021

رێوڕەسمی حەجی ئەمساڵ تەنیا بۆ خەڵکی سعودیە دەبێت

وەزارەتی حەج و عومرەی سعودیە ژمارەی حاجییانی ئەمساڵی بە 60 هەزار کەس دیاریکرد و رایگەیاند، ئەمساڵیش بەهۆی کۆرۆناوە رێگە بە حاجییانی دەرەوە سعودیە نادرێت حەج بکەن.
 
لە راگەێندراوێکیدا وەزارەتی حەج و عومرەی سعودیە رایگەیاند، شانشینی سعودیە هەمیشە گرنگی بە تەندروستی و سەلامەتی حاجییانی داوە، ئەوەش لەسەر بنەمای شەریعەتی ئیسلام کە فەرمانی پاراستنی گیانی خەڵکی پێکردووین. 
 
وەزارەتی حەج و عومرە راشیگەیاند، ئەمساڵ رێگە بە 60 هەزار کەس دەدرێت بەشداری لە رێوڕەسمی حەج بکەن و مافی حەجکردنیش تەنیا بە حاجییانی خەڵکی سعودیە و ئەوانەی کە نیشتەجێی وڵاتن دەدرێت و دەشڵێت، ئەوەی کە نیازی هەیە حەج بکات دەبێت هەڵگری هیچ نەخۆشییەک نەبێت و تەمەنی لەنێوان 18 و 65 ساڵان بێت. 
 
وەک لە راگەیێندراوەکەدا هاتووە، ئەو کەسانەی کە خەڵکی سعودیەن یان نیشتەجێی سعودیەن و دەیانەوێت حەج بکەن، دەبێت ڤاکسینی دژە کۆرۆنایان وەرگرتبێت.
 
وەزارەتی حەج و عومرەی سعودیە راشیگەیاند، حکومەتی وڵات هاوشێوەی ساڵانی رابردوو هەمیشە بەردەوامە لە پێشکێشکردنی ئاسانکارییەکان بۆ حاجییان کە لەماوەی 10 ساڵی رابردوودا پێشکێشی زیاتر لە 150 ملیۆن حاجی نێوخۆیی و بیانی کردووە.
© 2017 Hawler