سەركردە لە لیستی ئەلعێراقییە (ئوسامە نوجەیفی) ........ فۆتۆ ئەرشیڤ

سەركردە لە لیستی ئەلعێراقییە (ئوسامە نوجەیفی) ڕایگەیاند كە سەرۆكی دەستەی ئەركانی هاوبەشی ئەمەریكا (مایك مولن) لەگەڵ سەركردەی لیستی ئەلعێراقییە (ئەیاد عەللاوی)ـدا كۆبووەتەوە و پرسی پێكهێنانی حكوومەتیان تاوتوێ كردووە .

(نوجەیفی) ڕایگەیاند كە (مۆلن) هیچ پێشنیازێكی لە بارەی پێكهێنانی حكوومەت نەخستووەتە ڕوو و دوپاتی كردووەتەوە كە وڵاتە یەكگرتووەكانی ئەمەریكا ڕەتی دەكاتەوە كە لە كاروباری ناوخۆی عێراق دەستێوەردان بكات .

لە بەشێكی دیكەی گوتەكانیدا (نوجەیفی) ڕەتی كردەوە كە ئەمەریكا لە بەرانبەر هێزە سیاسییەكانی عێراقدا بیرۆكەی تایفی پێشنیاز كردبێت .

سەركردەكەی لیستی ئەلعێراقییە ئاماژەی بەوە كرد كە دەستێوەردانی وڵاتی ئێران لە كاروباری ناوخۆی عێراق لە لایەك و پێكهێنانی هاوپەیمانی نیشتیمانی لە لایەكەی دیكەوە بوونەتە هۆكاری دواكەوتنی پێكهێنانی حكوومەتی نوێی عێراق .

لە كۆتایی گوتەكانیدادا (نوجەیفی) گوتی "شرۆڤەی دادگای فیدراڵی بۆ گەورەترین كوتلەی پەڕلەمانی و ناكۆكییەكانی تایبەت بە دەسەڵاتەكانی سەرۆكوەزیران، لە هۆكارە سەرەكییەكانی شكست هێنانی پێكهێنانی حكوومەتە .

شاخەوان جەلال
Hawler.in