سەرچاوەیەكی ئاگادار ڕایگەیاند كە نوێنەرانی قەوارە سیاسییەكان لە كۆبوونەوەی ڕۆژی سێشەممەدا، بڕیاریان دا دانیشتنی كراوەی پەرلەمان دوابخەن تا ئەو كاتەی لایەنەكان دەكەنە ڕێككەوتنێك بۆ دەستنیشانكردنی پاڵێوراوی سێ پۆستە سەرۆكایەتییەكە. سەرچاوەكە ڕاگەیاند: "لەو كۆبوونەوەیەدا نوێنەرانی قەوارە سیاسییەكان ڕێك كەوتن كە پەرلەمان دانیشتنی خۆی ساز نەكات و هاوكات قەوارە سیاسییەكان لە گفتوگۆكانیان بەردەوام بن بۆ ڕێككەوتن لەسەر وردەكاریی دانیشنی داهاتوو كە بڕیارە لە ماوەی چەند ڕۆژێكدا ساز بكرێت". لە لایەن خۆیەوە (فوئاد مەعسووم) سەرۆكی كاتیی پەرلەمانی عێراق، دواخستنی دانیشتنی كراوەی پەرلەمانی ڕاگەیاند و ئاشكرای كرد كە قەوارە سیاسییەكان نەگەییشتوونەتە ڕێككەوتنێك سەبارەت بە سەرۆكایەتیی پەرلەمان. (فوئاد مەعسووم) لە كۆنگرەیەكی ڕۆژنامەوانیدا گوتی: "بە ئامادەبوونی نوێنەرانی قەوارە سیاسییەكان، دانیشتینێكمان ساز كرد بۆ ئەوەی هەلێكی دیكە بدەینە لایەنەكان بۆ گەییشتن بە ڕێككەوتنێك سەبارەت بە هەڵبژاردنی سەرۆكی پەرلەمان و هەردوو جێگرەكەی، بەڵام لەبەر ئەوەی لایەنەكان نەگەییشتنە هیچ ڕێككەوتنێك لەو بارەیەوە، بڕیار درا دەستپێكردنەوەی دانیشتنە كراوەكە بۆ كاتێكی دیكە دوابخرێت". جێی ئاماژەیە ئەمە جاری سێیەمە دانیشتنی پەرلەمانی عێراق دوا دەخرێت و تا ئێستا لایەنە سیاسییەكان نەگەییشتوونەتە ڕێككەوتنێك سەبارەت بە دابەشكردنی سێ پۆستە سیادییەكە و پێكهێنانی حكوومەت. لەم بارەیەوە، (سەردار عەبدوڵا) ئەندامی پەرلەمانی عێراق لە فراكسیۆنی گۆڕان، ڕایگەیاند، نوێنەری قەوارە سیاسییەكان لە كۆبوونەوەی ڕۆژی سێشەممەدا لە بەغدا، بڕیاریان دا حكوومەتی ئێستای عێراق ببێتە حكوومەتی كاربەڕێكردن تا ئەو كاتەی لایەنەكان دەگەنە ڕێككەوتنێك لەسەر دانانی هەر سێ سەرۆكایەتییەكە. (سەردار عەبدوڵا) ئاماژەی بەوەیش دا: "هەوڵی فراكسیۆنەكان بۆ دەربازبوونی عێراق لەم قەیرانە بەردەوامە و گفتوگۆكانیش سەبارەت بە پێكهێنانی حكوومەت درێژەیان دەبێت". لە لایەكی دیكەوە و بە گوتەی سەركردەیەكی دەوڵەتی یاسا، هاوپەیمانیی نیشتیمانی چەند ڕێوشوێنێكی گرتووەتەبەر و لە چەند ڕۆژی داهاتوودا كاندیدی سەرۆكوەزیران لە ناوخۆیدا یەكلا دەكاتەوە. (خالید ئەسەدی)ـی ئەندامی ئیئتیلافی دەوڵەتی یاسا لە لێدوانێکی ڕۆژنامەوانیدا ئاشكرای كرد لەو گفتوگۆیانەدا كە بەم دواییانە ئەنجامیان داوە، هاوپەیمانیی نیشتیمانی لەسەر گرتنەبەری ژمارەیەك ڕێوشوێن ڕێك كەوتووە كە لە توانایدایە كۆتایی بە پڕۆسەی هەڵبژاردنی كاندیدی سەرۆكوەزیران لە ناو هەموو كوتلەكاندا بهێنێت. (ئەسەدی) گوتیشی: "هاوپەیمانیی نیشتیمانی لە ماوەی چەند ڕۆژی داهاتوودا كێشەی هەڵبژاردنی كاندیدی سەرۆكوەزیران لەنێو خۆیدا یەكلای دەكاتەوە و سەرۆكوەزیرانی داهاتووی عێراق كەسێك دەبێت لە هاوپەیمانی نیشتیمانی". لە لایەن خۆیەوە جێگری سەرۆككۆماری عێراق (عادل عەبدولمەهدی) ڕایگەیاند كە ئیئتیلافی نیشتیمانی، (مالیكی) ڕەت دەكاتەوە و بە هۆكاری پێكنەهێنانی حكوومەتی دادەنێت. (مەهدی) هۆكاری ڕەتكردنەوەكەی ڕون كردەوە و گوتی: "حكوومەتی پێشووی (مالیكی) لە هیچ ڕوویەكەوە سەركەوتوو نەبوو، نە لە ڕووی ئەمنی و نە لە ڕووی ئابووری و نە خزمەتگوزاری، هەروەها كۆمەڵێك شتی دیكەیش". گوتیشی: "پێكنەهێنانی حكوومەت تاكوو ئێستا دەكەوێتە ئەستۆی لیستی دەوڵەتی یاسا، چونكە لەگەڵ هیچ لیستێكدا ڕێك ناكەوێت و نایەتە سەرمێزی گفتوگۆ لەگەڵ لیستەكانی دیكەدا و تەنیا ڕەچاوی بەرژەوەندییەكانی خۆی دەكات". لە لایەكی دیكەوە ئەندامێكی فراكسیۆنی كوتلە كوردستانییەكان ڕایگەیاند، ئەوان ڕۆڵی ئەرێنی دەگێڕن بۆ نزیكخستنەوەی كوتلە و لایەنە سیاسییەكان لە یەكتری. لەم بارەیەوە، ئەندامی ئیئتیلافی فراكسیۆنە كوردستانییەكان (موحسین سەعدوون) ڕایگەیاند: "گرێی پڕۆسەی سیاسیی وڵات، پۆستی سەرۆكوەزیرانە، ئەوەیش لای كورد نییە و لایەنەكانی دیكە لەسەری كێشمەكێشیانە، ڕۆڵی ئێمەیش ئەرێنییە بۆ نزیكخستنەوەی كوتلە و لایەنە سیاسییەكان لە یەكتر".ئەندامەكەی فراكسیۆنی كوتلە كوردستانییەكان، ئەوەیشی خستە ڕوو كە پێویستە لە زووترین كاتدا حكوومەت پێك بهێنرێت و كۆتایی بەو گرفتە بهێنرێت. لە لایەن خۆیەوە ئەندامێكی لیستی تەوافوق ڕایگەیاند: "نابێت حكوومەت هەموو دەستەڵاتەكانی لە دەستدا مابێت و بەكاریان بێنێت، كەچی پەرلەمان ڕۆڵی خۆی نەگێڕێت." لەم بارەیەوە، (محەممەد ئێقبال) ئەندامی ئیئتیلافی تەوافووق ڕایگەیاند: "ئێمە وەكوو لیستی تەوافووق، پشتگیریی هەر بڕیار و داواكارییەك دەكەین كە داوای كاراكردنی ئەنجوومەنی نوێنەران بكات". ئەوەیشی خستە ڕوو كە پێویستە پەرلەمان ڕۆڵی یاسادانان و چاودێریی خۆی بگێڕێت، چونكە ناكرێت حكوومەت هەموو دەستەڵاتەكانی هەبێت و كاری خۆی بكات، كەچی ئەنجوومەنی نوێنەران ڕۆڵی خۆی نەگێڕێت.
