ئەم پەڕەیە چاپ بکە

ئەو چاكەی هونەرمەندی گەورەی كورد، عەباس كەمەندی لە تەمەنی ١٥ ساڵاندا لەگەڵی كردم، بووە هۆكاری ئەوەی من ببمە ئەو هونەرمەندەی ئێستا

گۆرانیبێژی بەئەزموونی رۆژهەڵاتی كوردستان (نەجمە غوڵامی) هونەرمەندێکی هەرە دیارە كە بە درێژایی نیو سەدەی رابردوو بەبێ دابڕان خزمەتی هونەری گۆرانیی كردووە؛ وەک لەو دیدارەی رۆژنامەی "هەولێردا ئاماژەی پێ دەكات لە تەمەنی منداڵییەوە دەستی بە گۆرانیگوتن كردووە و دەڵێت:

"لە تەمەنی ١٣ ساڵاندا لە رێگەی هونەرمەندی كۆچكردووی كورد (عەباس كەمەندی)یەوە دەستم كرد بە گۆرانیگوتن؛ ئەو لە سەرەتای تەمەنی لاوێتیم دەستی گرتم و منی بردە رادیۆ لە سنە گۆرانیم تۆمار كرد، ئەوە دەستپێكێكی زۆر گەورە بوو لە ژیانی هونەریم، كە تا ماوم بیرم ناچێتەوە. بە شێوەیەكی گشتی من و گۆرانی لە وەتەی هەین بەیەكەوە وەک دوو ئاشقی لێكدانەبڕاوین بەیەكەوە بە چاكی و بە جوانی مێژوویەكی باشمان بۆ خۆمان تۆمار كردووە."
لە بەشێكی دیكەی قسەكانیدا هونەرمەند (نەجمە غوڵامی) دەربارەی بەرهەمی تازەی گۆرانی گوتی: "كۆمەڵێك بەرهەمی تازەم ئامادەیە، خۆی لە پانزە تراك گۆرانی دەبینێتەوە، لە ماڵەوە دامناوە خۆم گوێی بۆ دەگرم، چونكە نازانم چۆن و بەچ شێوەیەك بڵاوی بكەمەوە!، ناشكرێ من گۆرانی لەسەر ئەرك و گیرفانی خۆم تۆمار بكەم، پاشان هەر خۆشم بێم كاری بڵاوكردنەوەی ئەلبومەكەم لە ئەستۆ بگرم و پاشان بڵاوی بكەمەوە!، ئاخر ناكرێ من ماوەی (50) ساڵە خزمەتی هونەری گۆرانی كوردی دەكەم، ئەو خزمەتەش زۆربەی هەر زۆری لەسەر ئەرك و داهاتی خۆم بووە، كەچی تا ئێستاكەش نە كۆمپانیایەك و دەزگایەكی هونەری لە نێو كوردستان بوونی نیە بۆ ئەوەی ئەلبومی گۆرانی هونەرمەندان لە ئەستۆ بگرێت و بڵاوی بكاتەوە!، دیارە ئەوەیان هەر خەمی من نیە بەڵكو بەشێكە لە گرفتی زۆربەی هونەرمەندانی كوردو، هەر ئەو هۆكارەشە وایكردووە زۆربەیان بێدەنگی هەڵبژێرن!".
لە بەشێكی دیكەی قسەكانی دا ئەو هونەرمەندە بە ئەزمونە لە بارەی دووبارە تۆماركردنەوەی بەرهەمێكی خۆی، كە لە ساڵی (1991) تۆماری كردبوو روونی كردەوەو گوتی: "ئەو گۆرانییە بەر لە (30) ساڵ تۆمارم كرد ژێر ناوی (نان)، كە لەناو جەماوەر و هونەردۆستان بە (من ئەو كەسەم هەموو رۆژێ هەی ژین هەی ژین) ناسراوە، لە ئەڵمانیا لەگەڵ هونەرمەندی میوزیكژەن (ئاسۆی سەڵتە) تۆمارم كرد، چونكە كوالێتی تۆمار كرد ئەو كاتە وەكو ئێستا پێشكەوتوو نەبوو، بۆیە جارێكی دیكە تۆمارم كردەوەو، بە هاوكاری كۆمپانیای بابیلۆن میدیا ئەو گۆرانییەم تازە كردەوە و توانیم كاری ڤیدیۆ كلیپی بەشێوەیەكی پرۆفیشناڵ بۆ بە ئەنجام بگەینم، ئەو پاڵپشتیەی ئەو كۆمپانیا بەڕێزە لەو كات و ساتەدا بۆ من زۆر گرنگ و پێویست بوو سوپاسیان دەكەم، لە چەند رۆژی داهاتوودا سەرجەم كارەكانی تەواو دەبێت و بڵاوی دەكەینەوە لە رێگەی سەرجەم كەناڵەكانی راگەیاندن. "
هەروەها لە بەشێكی دیكەی قسەكانیدا (غوڵامی) ئەوەشی گوت: "جگە لەو گۆرانییە لەو سەردانەی ئەمجارە بۆ كوردستان دەرهێنەر (بڕیار فەتاح) گۆرانیی (شێتە گیان) كاری كلیپی بۆ ئەنجامداوە سوپاسی دەكەم، ئەو دوو گۆرانییەم بە شێوەی ڤیدیۆكلیپ دەبن بە دوو بەرهەمی تازەی من لەم ئەمساڵەدا."
لە كۆتاییدا هونەرمەندی بەئەزموون (نەجمە غوڵامی) گلەیی دڵی خۆی نەشاردەوە و لەسەر ئاستی گۆرانی كوردی ئەوەشی گوت: "بەداخەوە بەشێكی زۆر لەو گەنج و لاوانەی ئێستاكە یەخەی گۆرانیی كوردییان گرتووە و دەتوانم بڵێم خۆیان بە گۆرانیی كوردییەوە هەڵواسیوە، نە لە مانای گۆرانیوتن تێگەیشتوون، نە دەزانن كولتوور و فەرهەنگی كوردەواری چییە، نە رێزی ئەو مێژووە گەورەی هونەری كوردییان لەلایە، هەروەها رێزی كۆمەڵگای كوردییشیان شكاندووە و ئەوەتا هونەری گۆرانی كوردییان بەشێوەیەك تێك داوە زۆرجار ئێمەش بە لامانەوە شەرمە بڵێین گۆرانیبێژی؛ چونكە بەڕاستی ئەو هونەرەی ئێمە بە كولەمەرگی و شاخ و بە شاخ و و كێو بە كێو لەسەر گیان و دڵی خۆمان داماننا، پاشان بە ئاوارەیی و نەبوونی تا ئێرەمان هێنا، كەچی مخابن نەكەوتە دەستێكی پاك و ئەمینەوە. دیارە من بە تەنها گۆرانیبێژانی ئەم سەردەمە بە تاوانبار نازانم بەڵكو میوزیكژەنەكانیش بەشێكن لەو پرۆسەیە و ئەوانیش بەشدارن لەو شێواندنە!، ئینجا كەناڵەكانی راگەیاندنیش بەشی خۆیان لەم تاوانكارییە بەردەكەوێ، چونكە میوزیكژەنەكان و كەناڵەكان دەتوانن هیچ نەبێت ئەوان كاریان بۆ نەكەن و پاڵپشتیان نەبن. "

 

عەبدولغەفار عەبدوڵڵا - هەولێر