کانونی دووەم 25, 2021

حەمە عەلی خان: درامای كوردی بەو حاڵەی كە پێیدا تێپەڕ دەبێت بەڕاستی جێگەی داخە

هونەرمەندی بە ئەزموونی بواری شانۆ و دراما (حەمە عەلی خان) لەمیانەی دیدارێكی دا بۆ خوێنەرانی "هەولێر" ئاماژەی بۆ چەند لایەنێك لەكارە هونەرییەكانی خۆی و، هەروەها ئەو ڕەوشەی رووی لە هەرێمی كوردستان كردووە، جموجۆڵی كاری هونەریی و رۆشنبیری تاڕادەیەكی بەرچاو پەكخستووە، ئەوەشی خستەروو زۆر ئارەزوو دەكات فیلمێك یا كارێكی دیكۆمێنتاری لەسەر ژیان و كارەكانی شاعیری ناوداری كورد (پیرەمێرد) بهێنێتە بەرهەم و خۆشی رۆڵی ئەو كەسایەتیە بەرجەستە بكات، لە بارەی ئاستی درامای کوردیش دەلیت درامای كوردی بەو حاڵەی كە پێیدا تێپەڕ دەبێت جێگەی داخە لە ئێستادا درامای دۆبلاژكراوی بیانی بووە بە جێگرەوەی درامای كوردی!

 

لە دەستپێكی قسەكانی دا هونەرمەند (حەمە عەلی خان) لەبارەی ئەو بەرهەمەی كە دەیەوێت كاری لەسەر بكات بۆ ژیانی شاعیر و نووسەری كورد (پیرمێرد) گوتی : "یەكێك لە ئاواتەكانی ژیانم ئەوەیە كارێك بكەم، لەسەر ژیان و كەسایەتی شاعیری گەورەو ناوداری كورد (پیرەمێرد) چونكە ئەو شاعیرە لە ژیانی خۆی دا خزمەتێكی زۆر گەورەی بە بزاڤی رۆشنبیری كورد كردووە، هەر لە هێنانی چاپخانە بۆ شاری سلێمانی و دەركردنی گۆڤار و ڕۆژنامە، تا دەگاتە ئەوەی جەژنی نەورۆزی كوردانی بەرز راگرتووەو زیندووی كردۆتەوە، كە یەكێك لە شاكارترین و جوانترین هۆنراوەشی بۆ ئەو جەژنە نەتەوەییە نووسیەوە (ئام رۆژی ساڵی تازەیە نەورۆزە هاتەوە)، بەیەكێك لە دیارترین گۆرانییە جوانەكانی هونەرمەندی گەورەی كوردستان (حەسەن زیرەك)ـە هەژمار دەكرێت، هەروەها ئەو شاعیرە توانیویەتی بەرپەچی هەموو ئەو دەسەڵاتانە بداتەوە، كە نەیان هێشتووە یادی ئەو جەژنە بكرێتەوە، ئینجا لە هەموو خۆشتر ئەوەیە (پیرەمێرد) هەژار نەبووە توانایەكی مادی باشی لەبەردەست بووە، ئەگەرنا نەیدەتوانی ئەو هەموو كارانە بهێنێتە بوون!".

هەروەها لەبەشێكی دیكەی قسەكانی دا (خان) ئەوەشی خستەروو : "كاتی خۆی (فواد مەجید میسری) ئەو نووسەرە خەریك بوو درامایەك لە سەر ژیانی (پیرەمێرد) بنوسێت، بەڵام پێم وایە ئەو كارە بودجەیەكی زۆری دەوێت، ئیتر لەو بێ بودجەیە ئەستەمە ئەو كارە بكرێت، چونكە گێرانەوەی مێژووی ساڵی (1930) ـو هەروەها ئامادەكردنی ئەو لۆكێشنە كارێكی زۆر ئەستەمە، بەڵام ئەگەر بێتە بەرهەم من دڵنیام دەبێتە باب ئەلحارە بۆ كورد و هەموو تاكێكی كورد شانازی پێوە دەكات، بەڵام من زۆر ئارەزوو دەكەم فیلمێكی سینەمای لەسەر ژیانی ئەو پیاو گەورەیە بەرهەم بهێنێت، چونكە زیندوو راگرتنی مێژووی هەندێك نووسەر و كەسایەتی ناوداری كورد زۆر پێویستە بۆ ئەوەی نەوە دەوای نەوە سوود لە ژیان كار و بەرهەمی ئەوانە وەربگرن، لەبەر ئەوە من پێم وایە ئەگەر (پیرمێرد)ـی شاعیر نەبوایە (گۆران)ـی شاعیریش نەدەبوو، چونكە لە رووی زمانەوانیەوە بۆ نووسینی شیعرەكانی زۆر سوودی لە پەند و وشە كوردییەكانی (پیرەمێرد) وەرگرتووە، هەروەها چاپخانەكەی پیرمێرد سوودی زۆری هەبووە بۆ (گۆران) و شیعرەكانی، بۆ شاعیرانی دیكەش سوودێكی باڵای هەبووە!".

هونەرمەند (حەمە عەلی خان) كە زۆربەی كات لە هەولێر دەبیندرێت لەبارەی هاتنی بۆ ئەو شارە گوتی : "من بەشێكی زۆری ژیانم لە هەولێر بووە، خۆشەویستی ئەو شارەو هاوڕێیەكانم لە خوێنمدایە، لە هەولێر ژنم هێنا لە هەولێر (3) منداڵەكەم لە دایك بوون، بۆیە هەولێر و سلێمانی دوو دەستە خوشكن هەمیشە بەیەكەوە جوانن!، هونەرمەندانیان هەمیشە بەیەكەوە  توانیویانە كاری جوان و باش بهێننە بوون".

عەبدولغەفار عەبدوڵڵا - هەولێر

 

© 2017 Hawler