کانونی دووەم 27, 2021

(مقۆمقۆ) ئەزمونێكی جیاوازەو كارێكی یەكجار سەختە بۆ من وەك نووسەرو دەرهێنەر!

 

نوسەرو هونەرمەند (ئومێد كەمال) دەرچوی كۆلێژی هونەر ساڵی 2012 كاری نوسین و دەرهێنانم بۆ زیاتر لە 35كاری شانۆیی كردووە، یەكێكە لەو نووسرانەی ساڵانێكە لە چەند بەرهەمێكی تەلفزیۆنی دا، توانیویەتی دەستێكی باڵای هەبێ لەسەر خستن و بەرهەم هێنانی كۆمەڵێك پرۆگرامی تەنز و كۆمیدی و هەروەها چەند كارێكی درامی، لە میانەی لێدوانێكی بۆ خوێنەرانی "هەولێر" تیشكدەخاتە سەرچەند لایەنێك لە كاری نوسین و بەرهەمە هونەرییەكانی، هەروەها ئاماژە بۆ ئەوەشدەكات ئاستی كاری هونەری نواندن و دەقی نووسراوی بەرهەمەكان لە چ ئاستێكدایە

 

لەبارەی ئەزموونی كاری نوسینی و مێژووی كارەكانی (ئومێد كەمال) گوتی : "ئەزموونی نوسینی من دەگەڕێتەوە بۆ ساڵی 2002 بەنوسینی تێكستی شعری دەستم پێكرد كە تا ئێستاش لەو بوارە بەردەوامم، تا ساڵی 2012وە بەشداری چەندین ڤیستڤاڵ و كۆڕی شعریم كردووە لە هەولێر و سلێمانی پیرەمەگروون و دوكان، و چیرۆك و شانۆم نوسیوەو لە گۆڤارو ڕۆژنامەكانی (خەبات، دووكان، ڕامان،پێشكەوتن، ئەدەب و هونەری ڕێگای ئازادی)بڵاوم كردۆتەوە، و زیاتر لە 35 دەقی شانۆیم نوسیوەو كاری دەرهێنانم بۆ كردووە و زۆربەیان شانۆیی جاد بوون و كۆمەڵێكیان كۆمیدیا بووە، یەكەم كاری نوسینی من وەك دراما، درامای قاقا بوو ساڵی 2013 بۆ كەناڵی كوردستان لە دەرهێنانی هونەرمەند (ئەحمەد ڕەئوف بوو)".

لە بارەی ئەو كار و بەرهەمە تەنزانەی لە تەلەفزیۆن نیشان دراوە بە تایبەتی كاری لەگەڵ بەزمی بەزم (ئومێد) گوتی : "ئەزموونی من لەگەڵ بەزمی بەزم ئەگەڕێتەوە بۆ وەرزی یەكەمی ئەو پڕۆگرامە ماوەی دوو مانگ بوو دەست پێ‌ كردبوو، لەڕێگەی هونەرمەند ئەحمەد ڕەوفەوە پەیوەندیان پێوە كردم و گەیشتمە ڕێكەوتن لەگەڵیان، وەرزی یەكەمی بەزمی بەزم ئەو كاتە بوو كە لەبەر زۆری بینەر لە هۆڵی چالاكی قوتابخانەكانەوە گوازریەوە بۆ هۆڵی میدیا، ماوەی ساڵێك بەردەوام بووم و ڕازیم لەو ئەزمونەم چونكە ئەو كات بەزمی بەزم تاكە پڕۆگرام بوو زۆرترین بینەری هەبوو، خەڵكیش لێی ڕازی بوو، بەڵام دواتر بەهۆی لەیەك تێنەگەشتنەوە یان ڕاستر بڵێم بەهۆی نەگەیشتنی پەیامەكانمەوە من وازم هێنا و لە پەتریپۆت یش نوسەری هەندێ‌ بڕگە بووم".

(ئومێد) لەبارەی پرۆگرامی مقۆ مقۆ كە یەكێكە لە پرۆگرامە بەناوبانگەكان گوتی : " پرۆگرامی (مقۆمقۆ) بۆ من ئەزمونێكی جیاوازبوو وەك چۆن كارێكی سەخت بوو، چونكە بۆیەكەمجار بوو لەگەڵ كۆمەڵێك هونەرمەندی بەئەزمونی سلێمانی و هەولێر بەریەك كەوتنم هەبێ‌ هەم وەك نوسەر هەم وەك ئەكتەر لەوەرزی یەكەما و ئامادەبوونم لەكاتی تۆماركردنی ئەڵقەكانا ئەمە وای كردووە پەیامەكانم وەك خۆی بگا چونكە هەرەیەك لەو هونەرمەندانە خۆیان قوتابخانەیەكن، و لەوەرزی دووەما كاری من سەختر و بەرپرسیارانەترە چونكە وەك نوسەرو دەرهێنەر كار ئەكەم كە ئەمە بەڕای من كارێكی باشە نوسەر كە توانای هەبێ‌ خۆی دەرهێنان بۆ نوسینەكانی خۆی بكا، و ئەمانەش بونەتە هۆی ئەوەی مقۆمقۆ لە ئەزمونەكانی ترم جیاوازبێ‌ و خۆشەویشتر بێ‌ .

هەر لەمبارەیەوە (ئومێد كەمال) ئەوەشی گوت : "ئێمە لە مقۆمقۆ لەبەرەی خەڵكی چەوساوەو هەژارین و پەیامی ئەوان دەگەیەنین، باسی ماڵە هەژارەكان و كرێكارو فەرمانبەری بێ‌ موچە و میوەفرۆش و كارمەندی خزمەتگوزاری و پۆلیس و مامۆستاو ئەو كەسانە دەكەین كە خزمەت دەكەن، هەر ئەمەش تاكە هۆكارە بۆ سەركەوتنی پڕۆگرامێك كە چیرۆكەكانی هەڵقوڵاوی كۆمەڵگا بێت، و هەر لایەنێك كەم و كوڕی هەبوبێ‌ بە شێوازێكی هونەری تەنز باسمان كردووە، ئەركی ڕەخنەو تەنز ئەوەیە ناشرینیەكان پیشان بدا".

لە بارەی بەشداریكردنی ئەكتەرانی هەولێر و سلێمانی لە مقۆ مقۆ دا (ئومێد كەمال) گوتی : "كۆكردنەوەی ئەكتەرانی هەولێرو سلێمانی ئەزمونێكی باشە، ئێمە ناڵێین ئەمە پێشتر نەبووە بەڵام لە مقۆمقۆ بەردەوام بوون ی ئەو ئازیزانە بەیەكەوە جیاوازێك دەبەخشێ‌ بەم ئەزموونە، و وەك نوسین هیچ كاریگەری لەسەر من نەبووە هەر هونەرمەندەو بە زاراوەی خۆی دیالۆگ ئەڵێ‌ جگە لەو بڕگانی بە پێی بنەمای هونەری دەبێ‌ بەیەك زاروە دیالۆگ بوترێ‌، دیارە كاركردن لەگەڵ سپێدە پڕە لەڕاستگۆیی لەنێوات ستافی مقۆمقۆو سپێدە، و من لەهەر تیڤیەك كارم كردبێ‌ ڕێز لە نوسینەكانم گیراوە جگە لە هەندێ‌ سانسۆری سادەو گشتی كە دەبێ‌ ئێمەی نوسەر خۆمان

بگونجێنین لەگەڵ كۆمەڵگادا ئەوەش بۆمن كارێك قورس نیەو ئاساییە چونكە من پەروەردەی ئەم كۆمەڵگا پڕ لەداب و نەریتەجوانەم، سەبارەت بەوەی كە سپێدە كەناڵێكی ئیسلامیە، ئەوان سانسۆریان نەبووە بۆیەك وشەش لە نوسینەكانم چونكە من خۆم لە هەر تیڤیەك كاربكەم هەر بەو شێوازە كاردەكەم كە داب و نەریت و ئاینە پیرۆزەكەم بریندار نەكەم".

(ئومێد كەمال) لەبارەی دوایین پرۆژەی گوتی : "دواین پڕۆژەم دوو درامای كۆمیدی و دوو درامای جدیە كە بڕیاربوو كار لەیەكێك لەو درامایانە بكەین لەگەڵ كەناڵی سپێدە، خوا یار بێ‌ لە ئایندەدا كاریان تیا ئەكەین، لەم ساڵانەی دوایشدا ئەو دراما كوردیانەی بەرهەم هاتون نەیانتوانیوە تینوێتی بینەر بشكێن، چونكە زۆریان لە چیرۆكەكانی كۆمەڵگای كوردی دوور كەوتونەوە، یان ڕەنگە هۆكاری ئەو لێشاوە دراما دۆبلاژە بێ‌ كە پەخش كراو وای كرد بینەر بە هەموو كارێك ڕازی نەبێ‌، لەگەڵ ئەوەشدا هەبوونی درامای كوردی باشتربووە لە نەبوونی، بەهیوام لە ئایندەدا ئێمەی هونەرمەندان هونەر بۆ هونەر بكەین، چیرۆكە ڕاستەقینەكانی ناو گەڕەك و كۆڵان و بازاڕاەكانی خۆمان بكەینەوە دراما".

 

 

عەبدولغەفار عەبدوڵڵا - هەولێر

 

© 2017 Hawler