تشرینی یەکەم 21, 2020

حاڵی هونەرمەندانی گەورەی كورد ئاوابێ ئیدی دەبێ گۆرانی كوردی حاڵی لەوەی ئێستای باشتر بێت؟!

هونەرمەندی بە ئەزموونی گۆرانبێژ (دانا عەبدولجەبار) یەكێكە لەو هونەرمەندە بە ئەزموونانەی زیاتر لە (32) ساڵە خەریكی هونەری گۆرانی گوتنە، ئەو خاوەنی ئەرشیفێكی جوانی گۆرانییە، وەك دیارەو دەركەوێت بەشێكی زۆر لەبەرهەمەكانی بوون بە ناسنامەیەكی جوانی هونەری بۆ ئەو هونەرمەندە لەلای گوێگران و جەماوەری هونەردۆست، (دانا) لەسەرەتای كاروانی هونەریی دا زۆر داناو لێزان بووە بۆ دروستكردنی بەرهەمەكانی، ئەوەتا جگە لەوەی خۆی بۆ بەشێكی زۆر لە گۆرانییەكانی ئاواز و تێكستی داناوەو هەروەها چیرۆكی باشی بۆ گۆرانییەكانی هۆنیوەتەوە، لە هەمان كاتیشدا گۆرانی هەندێك لە هونەرمەندە نەمرەكانی دووبارە چڕیووەتەوە، یەكێك لەو گۆرانیانەی بە شێوەیەكی باش دووبارە تۆماری كردۆتەوە، گۆرانی (ئەی شەمی شەوان)ـی هونەرمەندی گەورە (قادر كابان)ـە، كە لە ئەلبومی گۆرانی ساڵی (2010) بڵاوی كردۆتەوە، بەڵام تا ئێستاكە ئەو بەرهەمەی كاری ڤیدیۆ كلیپی بۆ نەكردووە، لەمیانەی پەیوەندییەكی تەلەفۆنی من و ئەو هونەرمەندە گەورەیە لێم پرسی ئەرێ برا لەبەرچی ئەو گۆرانییەت كلیپ نەكردووە، تا ئێستاكە؟!

لەوەڵامی ئەو پرسیارەدا ئەو هونەرمەندەی پتر لە (32) ساڵی خۆی بەخشیووە بە هونەرەكەی پێی گوتم : "بڵێم چی و باسی چی بكەم؟! یان لە كوێیەوە دەست پێ بكەم!، ئەوەتا ئەو گۆرانییەی بەر لە (42) ساڵ بە دەنگی هونەرمەندێكی كوردی بێچارەی وەك (قادر كابان) گوتراوە، كە لەسەردەمی رژێمی لەناوچووی بەعس چۆن بردیان بۆ زیندانەكانی بەغداد و هەر نەگەڕایەوەو گۆڕ غەریب كرا!، دیارە وەك چۆن خاوەنی گۆرانییەكە، لە ژیان بەد بەخت و بێچارە بوو!، ئاواش گۆرانییەكەی لای من بەد بەخت بوو!، ئاخر من بە دڵ و بەگیان ئەو گۆرانییەم دووبارە تۆمار كردەوە باشتریین موزیك و كاری ستۆدیۆم بۆ ئەنجامدا كەچی ئەوەتا (10) ساڵ تێپەڕ دەبێت بەسەر تۆمار كردنەكەی، ناتوانم كاری كلیپی بۆ بكەم، ڤیدیۆ كلیپێك شایانی شاكارێكی گەورەی وەك (شەمی شەوان) بێت، ئیدی چی بكەم لە سەردەمێكدا ئێمە هونەرمەندین كاری بەرهەم هێنانی ڤیدیۆ كلیپ و سپۆنسەر بۆ ئێمە بوونی نیە!".

لەبەشێكی دیكەی قسەكانی دا هونەرمەند (دانا عەبدولجەبار) ئەوەشی گوت : "من نەك دە ساڵ بەڵكو (30) ساڵە لەگەڵ ئەو گۆرانییە دەژیم، لە دوای ساڵی (1990)ـەوە لە هەر شوێنێك ئاهەنگێك كۆنسێرتێك یا بۆنەیەكی هونەریی هەبوو بێت ئەو گۆرانییەم پێشكەش كردووە، تا ساڵی (2010) كە دوایین ئەلبومی گۆرانییم لەو ساڵەدا بڵاو كردەوە، بڕیارمدا ئەو گۆرانییە بەشێوەیەكی جوان تۆمار بكەم، ئەوەبوو پەیوەندییم بە مامۆستا (خالید سەركار)ـی هونەرمەند كرد، كە دیارە كاری دابەشكردنی میوزیكی ئەو بەرهەمەی لە ئەستۆ گرتبوو، پرسم پێی كرد ئەو گۆرانییە لە رووی میوزیكەوە دەمەوێ هەمان بابەت و شێواز بێت، ئەویش رازی بوو هیچ گرفتێكی نەبوو، هەروەها پرسم بە بەڕێز (كاروان)، كوڕی هونەرمەندی كۆچكردوو ( قادر كابان) كرد، دیار بوو ئەویش بە خۆشحاڵیەوە رێگەی ئەوەی پێدام بۆ ئەوەی ئەو گۆرانییەی باوكی دووبارە تۆمار بكەمەوە!".

لە كۆتایی دا هونەرمەند (دانا عەبدولجەبار) ئەوەشی گوت : "نازانم دڵی چیمان بە هونەر و كاری هونەری خۆشبێت لەم وڵاتە، ئەوەتا من (10) ساڵە تەنها یەك ئەلبومی گۆرانییم تۆمار كردووە، ئایا چەند (10) ساڵی لە ژیانی مندا بوونی هەیە بۆ ئەوەی دە ساڵ جارێك ئەلبومێك بەرهەم بهێنم، كە ئەوەتا دە ساڵەكەش تێپەڕ بوو، كێ دەڵی چەند ساڵی دیكە دەتوانم ئەلبومێكی گۆرانی ببێت بە نەسیبم، لە كاتێكدا ئەوەتا نازانم چۆن گۆرانییەك كلیپ بكەم!!!؟؟".

 

عەبدولغەفار عەبدوڵڵا - هەولێر

© 2017 Hawler