ئەیلول 18, 2020

میدیا حوسێن:هونەری میللی هونەرێكی بەرز و تیژڕەوە، زوو دەچێتە ناو خەڵك و جەماوەرەوە

هونەرمەندی گۆرانیبێژ میدیا حوسێن یەكێكە لە هونەرمەندە دیارەكانی نێو گۆڕەپانی گۆرانیی كوردی، ئەو زیاتر لە 35 ساڵ لە تەمەنی خۆی بەخشیووە بە هونەرەكەی، ئەو هونەرمەندە ناسراوەی كورد لەمیانەی لێدوانێكیدا بۆ خوێنەرانی "هەولێر" تیشكدەخاتە سەر چەند لایەنێك لە كارە هونەرییەكانی، بەتایبەتی بەرهەمهێنانی گۆرانییەكی تازەی خۆی، كە بەشێوەی ڤیدیۆ كلیپ بەنیازە بڵاوی بكاتەوە، بەڵام چەند كارێكی وردەكاری ماوە بۆیە بڵاوكردنەوەكەی دواخستووە، هەروەها ئاماژە بۆ ئەوەشدەكات، بەر لە نزیكەی دوو مانگ هونەرمەندی هاوڕێی عەتا چاوشین بە ڤایرۆسی كۆرۆنا كۆچی دوایی كرد، كۆچی ئەو خەمێك و كۆستێكی گەورە بوو، بۆیە بەنیازە گۆرانییەك بۆ كۆچ و یادی ئەو هونەرمەندە ئامادە بكات و تۆماری بكات.

لەسەرەتای قسەكانیدا هونەرمەند میدیا حوسێن لەبارەی هەبوونی بەرهەمی تازەی گوتی: "بەرهەمی تازە زۆرن، بەڵام چۆن و بە چ شێوەیەك بڵاوی بكەمەوە؟!، ناكرێت دوای 35 خزمەتكردن بە كاری هونەریی، هێشتا هەر لەسەر ئەرك و گیرفانی خۆمان خزمەتی گۆرانی كوردی بكەین، جگە لەوەش ئەو سەردەمەی ئێستای پێیدا تێپەڕ دەبین، خزمەتكردنی گۆرانی كارێكی ئەستەم و دژوارە!، چونكە گۆرانییەك لە ئێستادا كاری تۆماركردن و بەرهەم هێنانی بە بەراورد لەگەڵ سەردەمی پێشوو، جیاوازییەكی زۆری هەیە، بەتایبەتی لە رووی خەرجییەوە".
لەبەشێكی دیكەی قسەكانیدا هونەرمەند میدیا حوسێن دەربارەی كلیپكردنی گۆرانییەكی تازە بۆ یەكێك لە گۆرانییەكانی، گوتی: "ئەو گۆرانییەم لە ساڵی 2017ـەوە تۆمار كراوە، بەڵام نەمتوانی بوو كلیپی بكەم، ئەگەرچی گۆرانییەكە تایبەتمەندییەكی زۆری هەیە لەلای من، چونكە ناوەرۆكەكەی لەسەر ژیانی خۆم و بەخششە هونەرییەكانم دامڕشتووە، ئەو گۆرانییە لە ژێر ناوی دڵم لە زەمانە دێشێ خۆم ئاواز و تێكستی گۆرانییەكەم ئامادە كردووە، سوپاس بۆ كۆمپانیای هێلی دەنگ و بەڕێز عیسا مێرگەسۆری توانیان كاری ڤیدیۆ كلیپی ئەو گۆرانییە بخەنە ئەستۆی خۆیان، دیارە ئەوەشیان لە دوای ئەو دوو كلیپەی لە ساڵی 2016 ـدا لەلایەن كۆمپانیای بابیلۆن دوو گۆرانییان بۆ كلیپ كردم و بەرهەمیان هێنرا، لەدوای ئەوە هیچ بەرهەمێكی گۆرانییم كلیپ نەكردووە".
لەبەشێكی دیكەی قسەكانیدا هونەرمەند میدیا لەبارەی بڵاوكردنەوەی كلیپە تازەكەی گوتی: "ئەو كلیپە لە چەند مانگی رابردوو كاری وێنەگرتنی بۆ كراوە،بەڵام هەندێ ووردەكاری پێویست مابوو بەداخەوە لەبەر ئەو بارودۆخە دوامان خستووە، لە داهاتوودا هەوڵ ئەدەین تەواوی بكەین، پاشان لەلایەن كۆمپانیای هێلی دەنگ كاری بڵاوكردنەوەی بۆ سەرجەم كەناڵەكانی دەكرێتە بواری جێبەجێكردنەوە".
هونەرمەند میدیا حوسێن لەبارەی ئەو گۆرانییەی بەنیازە بۆ كۆچی هونەرمەندی هاوڕێی عەتا چاوشین ئامادەی بكات گوتی: "بەداخەوە ئەم ساڵ ساڵێكی شووم و پڕ لە خەم و ناسۆری بوو، چەندیین رۆشنبیر و نووسەر و شاعیر و هونەرمەند تێیدا كۆچیان كرد و بەجێیان هێشتین، بەتایبەتی پەتای كۆرۆنا بووە هۆی كۆچی زۆرێك لە خەڵكی كوردستان بەداخەوە، لای من كۆچی هەموو كوردێك بەو پەتایە جێگەی داخ و كەسەرە، بەڵام كۆچی هونەرمەند و برای خۆشەویستم عەتا چاوشین داخ و كەسەرێكی زۆر گەورە بوو!، بۆیە بڕیارم داوە گۆرانییەك بۆ كۆچی ئەو بەشێكی زۆر ئەو ئازیزانە بچڕم ئەگەر خوای گەورە یار و یاروەر بێت، بەو هیوایەم ئەو پەتایە چیتر ئازیزانمان ئاوا لەگەڵ خۆی نەبات.
لە كۆتاییدا هونەرمەند میدیا حوسێن لەبارەی ئاستی هونەری میللی ئێستا روونی كردەوە و گوتی: "هونەری میللی هونەرێكی بەرزو تیژڕەوە، زوو دەچێتە ناو خەڵك و جەماوەرەوە، ئێستا هونەری میللیش تاڕادەیەك بێ سەرو بەری پێوە دیارە، وەك زۆرێك لە هونەرەكانی دیكە پشكی ئەوەیان بەر كەوتووە، بەڵام ناكرێ هەمووی بە خراپ لە قەڵەم بدەین، بەشێكی باش لەو گۆرانیبێژە میللیانە توانایەكی باشیان هەیەو كاری جوان پێشكەش دەكەن، لەگەڵ ئەوەشدا دەبێ ئەوەی هونەری میللی لە باوەش دەگرێ بزانێت چی دەڵێت و چی پێشكەش دەكات.

 

عەبدولغەفار عەبدوڵڵا - هەولێر

© 2017 Hawler