ئایار 26, 2020

زۆرترین بینراو هونه‌ری

Error: No articles to display

میدیا حوسێن، گۆرانییەك لەسەر ژیانی خۆی و بەخششە هونەرییەكانی بە كلیپ بڵاو دەكاتەوە

 عەبدولغەفار عەبدوڵڵا - هەولێر

 

میدیا حوسێن، یەكێكە لە هونەرمەندە دیارەكانی نێو گۆڕەپانی گۆرانیی كوردی، ئەو زیاتر لە (35) ساڵ لە تەمەنی خۆی بەخشیووە بە هونەرەكەی، ئەو هونەرمەندە ناسراوەی كورد لەمیانەی لێدوانێكیدا بۆ خوێنەرانی "هەولێر" تیشك دەخاتە سەر چەند لایەنێك لە كارە هونەرییەكانی، بەتایبەتی بەرهەمهێنانی گۆرانییەكی تازەی خۆی، كە بەشێوەی كلیپ بەنیازە لە نەورۆزی ئەم ساڵدا بڵاوی بكاتەوە، هەروەها لە بەشێكی دیكەی ئەو لێدوانەیدا ئاماژە بۆ ئاستی هونەری گۆرانیی میللیی ئەو سەردەمە دەكات.

لەسەرەتای قسەكانیدا هونەرمەند (میدیا حوسێن) لەبارەی هەبوونی بەرهەمی تازەی گوتی: "بەرهەمی تازە زۆرن، بەڵام چۆن و بە چ شێوەیەك بڵاوی بكەمەوە؟!، ناكرێت دوای (35) خزمەت  بە كاری هونەری، هێشتا هەر لەسەر ئەرك و گیرفانی خۆمان خزمەتی گۆرانیی كوردی بكەین، جگە لەوەش ئەو سەردەمەی ئێستای پێیدا تێپەڕ دەبین، خزمەتكردنی گۆرانی كارێكی ئەستەم و دژوارە!، چونكە گۆرانییەك ئێستا كاری تۆماركردن و بەرهەمهێنانی لەچاو سەردەمی پێشوو، جیاوازییەكی زۆری هەیە، بەتایبەتی لە رووی خەرجییەوە".
لەبەشێكی دیكەی قسەكانیدا هونەرمەند (میدیا حوسێن) دەربارەی كلیپكردنی گۆرانییەكی تازە بۆ یەكێك لە گۆرانییەكانی، گوتی: "ئەو گۆرانییەم لە ساڵی (2017)ـەوە تۆمار كراوە، بەڵام نەمتوانی بوو كلیپی بكەم، ئەگەرچی گۆرانییەكە تایبەتمەندییەكی زۆری هەیە لەلای من، چونكە ناوەرۆكەكەی لەسەر ژیانی خۆم و بەخششە هونەرییەكانم دامڕشتووە، ئەو گۆرانییە لە ژێر ناوی (دڵم لە زەمانە دێشێ) خۆم ئاواز و تێكستی گۆرانییەكەم ئامادە كردووە.
لەبەشێكی دیكەی قسەكانیدا هونەرمەند (میدیا) لەبارەی بڵاوكردنەوەی كلیپە تازەكەی گوتی: "ئەو كلیپە لە چەند رۆژی رابردوو كاری وێنەگرتنی تەواو بووە، ئێستا لە قۆناغی مۆنتاژكردن دایە، رۆژانی نەورۆز وا بڕیارە بڵاو كرێتەوە.
هونەرمەند (میدیا حوسێن) لەبارەی ئەو تێكستەی بۆ "هەولێری پایتەختی"نووسیوە و گوتی: "من لەگەڵ هەولێری پایتەخت ساڵانێكی زۆرە یادەوەری زۆر جوانم هەیە، لەگەڵ چەندیین هاوڕێی هونەرمەند و كەسایەتی ناوداری ئەو شارە ئازیزە ئاشنایەتیم باشم هەیە، لەو ماوەیەدا (جێگر)ـی كوڕم داوای لێكردم هۆنراوەیەك بنووسم بۆ ئەوەی بیكاتە گۆرانییەك بۆ هەولێری پایتەخت، منیش هۆنراوەیەكی جوانم بۆ نووسی، لە بەشێكی ئەو هۆنراوەیەدا هاتووە (لە شام شیرینتر جوانتر لە لوبنان... هەولێری دێرین بووكی كوردستان.....بەوێنەی مەجنوون بەدوای لەیلاوە...هەر چاو ئەگێڕم بەسەر قەڵاوە.. تەیراوە خۆشە لەوێ بێ ماڵم... شۆڕە لاسەكەی كوشتەی خەزاڵم) دیارە ئەو گۆرانییەش دەكەمە چەپكە گوڵێكی نێرگزی ئەو بەهارەو، دەیكمە دیاری بۆ هەموو كوردێك و بۆ هەموو هەولێرییە ئازیزەكان، بەتایبەتی هونەردۆستان و خۆشەویستانم لەو شارە".
لە كۆتاییدا هونەرمەند (میدیا حوسێن) لەبارەی ئاستی هونەری میللی ئێستا روونی كردەوەو گوتی: "هونەری میللی هونەرێكی بەرزو تیژڕەوە، زوو دەچێتە ناو خەڵك و جەماوەرەوە، ئێستا هونەری میللیش تاڕادەیەك بێسەروبەریی پێوە دیارە، وەك زۆرێك لە هونەرەكانی دیكە پشكی ئەوەیان بەر كەوتووە، بەڵام ناكرێ هەمووی بە خراپ لە قەڵەم بدەین، بەشێكی باش لەو گۆرانیبێژە میللیانە توانایەكی باشیان هەیەو كاری جوان پێشكەش دەكەن، لەگەڵ ئەوەشدا دەبێ ئەوەی هونەری میللی لە باوەش دەگرێ بزانێت چی دەڵێت و چی پێشكەش دەكات.

© 2017 Hawler