شوبات 27, 2020

دلێر عەبدولقادر: تا نەورۆزی ئەو ساڵ ئەلبوومی "سێوەخان" بڵاو دەکەمەوە

دلێر عەبدولقادری گۆرانیبێژ، ئەلبوومێكی تازەی گۆرانیی ئامادەیە و، بەنیازە نەورۆزی ئەمساڵ بڵاوی بكاتەوە، هەروەها یەكێك لە گۆرانییە تازەكانی نێو ئەلبوومەكەی لە شاری سلێمانی كلیپ كردووە، لە لێدوانێكدا بۆ خوێنەرانی "هەولێر" تیشك دەخاتە سەر چەند لایەنیك لە ناوەرۆكی بەرهەمهێنانی كارەكانی نێو ئەلبوومە تازەكەی.

لەبارەی بەرهەمهێنانی ئەو ئەلبوومە تازەی (دلێر عەبدولقادر) گوتی: "ئەو ئەلبوومە تازەیەم ماوەی زیاتر لە ساڵێكە ئامادەكاریی بۆ دەكەم، سەرجەم گۆرانییەكانم هەڵپەڕكێن، تەنها یەك گۆرانیەكیان نەبێت، ئاوازەكانی بەشێكی فۆلكلۆرن، هەندێك لە گۆرانییەكانیشم خۆم ئاوازم بۆ داناوە، چەند گۆرانییەكیش ئاوازی (ئاكام ئەحمەد)ـە".
لە بەشێكی دیكەی قسەكانیدا (دلێر) لەبارەی كاری ئامادەكاریی میوزیكی سیدیە تازەكەی روونی كردەوە و گوتی: "سەرجەم گۆرانییەكان لە رۆژهەڵاتی كوردستان لە ئێران بە دەست و پەنجەی میوزیكژەنێكی كورد (داڤید نیازی) جێبەجێ كراون، دیارە مەبەستیشم لەو كارە ئەوە بوو، لە كاری ئەو جارەمدا ویستم فۆرمێكی تازە تاقی بكەمەوە، هیوادارم كارێكم كردبێت بە دڵ و، ویستی جەماوەر و گوێگران بێت".
هونەرمەندی گۆرانیبێژ (دلێر عەبدولقادر) لەبارەی بەرهەمهێنانی كلیپ بۆ یەكێك لە گۆرانییەكانی نێو ئەلبوومەكەی بەم شێوەیە روونی كردەوە و گوتی: "ئەو گۆرانییە لە ژێر (هەر تۆی مەبەست) بەرهەمەكە ئاواز و تێكستی لەلایەن (ئاكام ئەحمەد) دانراوە، لە شاری سلێمانی كلیپمان كرد و، لەلایەن دەرهێنەر (شوان جەبار) وێنەگر (دیار ئەسكەندەر) كاری بەرهەمهێنانی ئەو ڤیدیۆ كلیپە جێبەجێ كراوە".
لەبارەی كاتی بڵاوكردنەوەی كلیپەكەی (دلێر) ئەوەشی راگەیاند: "بەنیازم لە مانگی داهاتوو لە (14/ شوبات) رۆژی ڤاڵانتایین بڵاوی بكەمەوە، ئەگەرچی گۆرانییەكە هەڵپەڕكێیە بەڵام تێكستەكەی زۆر جوان و پڕە لە وێنەی شیعری جوان و رۆمانسی، هیوادارم تا ئەو كاتە بارودۆخە لەبار بێت بۆ ئەوەی بتوانم بڵاوی بكەمەوە".
لەكۆتاییدا (دلێر عەبدولقادر) لەبارەی بڵاوكردنەوەی ئەلبوومە تازەكەی ئەوەشی راگەیاند: "ئەو ئەلبوومە لە (9) گۆرانی پێكهاتووە، لەژێر ناوی (سێوەخان)ـە، ئەو بەرهەمە یەكێكە لەو گۆرانیانەی لەسەرەتای دەركەوتنم وەك گۆرانیبێژ، ساڵی (1998) تۆمارم كرد و بڵاوم كردەوە، دەتوانم بڵێم ئەو گۆرانییە و چەند گۆرانییەكی دیكە بوون بە ناسنامەی هونەری من،هیوادارم بتوانم لە نەورۆزی ئەم ساڵ ئەو ئەلبوومە تازەیەم بڵاو بكرێتەوە".

 

عەبدولغەفار عەبدوڵڵا - هەولێر

© 2017 Hawler