کانونی یەکەم 08, 2019

كاترین دینۆف، بەهۆی جەڵتەوە كەوتە نەخۆشخانە

ئەستێرەی سینەمایی فەرەنسی خاتوو كاترین دینۆف بەهۆی جەڵتەوە كەوتە یەكێك لە نەخۆشخانەكانی پاریسی پایتەختی وڵاتی فەڕەنسا، ئەو هەواڵەش هەموو لایەكی دڵتەنگ كرد، چونكە ئەو خانمە هونەرمەندە خاوەنی گەلێك بەهرەیە، بۆیە هەر دوای پشكنین ئەو دكتۆرانەی كە سەرپەرشتی دەكەن هەواڵی ئەوەیان ڕاگەیاند كە خۆشبەختانە جەڵتەكەی دینۆف سووك بووە و هێندە كاریگەری نەبووە كە كۆتایی بە ژیانی بهێنێ یان پەكی بخات، بۆیە دكتۆرەكان گوتوویانە دەبێ بۆ ماوەیەك پشوو بدات و هیچ جۆرە چالاكیەك نەكات تا باری تەندروستی دێتەوە دۆخی جارانی و كەمێك ئاسایی دەبێتەوە، جێی وەبیرهێنانەوەیە كاترین دینۆف لە 22 ی ئۆكتۆبەری ساڵی 1943 لە پاریسی پایتەخت لەدایك بووە و ئێستا تەمەنی گەیشتۆتە 76 ساڵ، ئەو خانمە هەر لە ساڵی 1957ـەوە تا ئێستا لە كاری هونەری بەردەوامە و هێندە وچانی نەداوە و چەندین بەهرەی گەشی هەبوە وەك نواندن و گۆرانیگوتن و بەرهەمهێنانی فیلمی سینەمایی و نەخشەساز و نمایشی جلوبەرگ، بۆیە هەمیشە لە ژیاندا ماندوو و شەكەت بووە و بۆیە بەو تەمەنە گەورەیەوەش تووشی ئەو بارە تەندروستیە ناهەموارە بۆتەوە.

 

محەمەد سەعید كوردە - هه‌ولێر

© 2017 Hawler