تشرینی دووەم 12, 2019

یاد و وەفایەك بۆ هونەرمەندی كۆچكردوو سوبحی كۆیی

بە دەست خۆم نیە، دەبێ هەموو ساڵێك یادی هونەرمەندی هەڵكەوتوو سوبحی كۆیی بكەمەوە و هەر هیچ نەبێ چەند دێرێكی لەسەر بنووسمن چونكە لە ماوەی 25 ساڵی تەمەندا توانی وەك ئەكتەرێكی كارامە و لێزان بوونی خۆی بسەلمەێنێ و ڕابردوویەكی پرشنگدار لە دوای خۆی جێ بهێڵێ كە هەموو لایەكمان شانازیی پێوە بكەین.

پرۆڤایلی سوبحی كۆیی
ڕاستە ئەو هونەرمەندە لە بواری هونەریدا بە سوبحی كۆیی ناسراو بوو، بەڵام ناوی تەواوی سوبحی ئەحمەد عەبدوڵڵایە و لە ساڵی 1955 لە دایك بوە و دەرچووی قۆناغی ناوەندیە و سەرەتای كاری هونەری لە ساڵی 1972 بە ئەشق و خۆشەویستیەكی بێ ئەندازەوە دەستی پێكرد و تا ئەو ڕۆژەی ڕۆح لە جەستەیدا بوو، هەر لە مەیدانی هونەردا بەردەوام بوو، هەمیشە بۆ ئەو ئەشقە چەشنی مۆمێك دەسووتا تا چوار دەوری خۆی ڕۆشن بكاتەوە و جەماوەرەكەی لە خۆی ڕازی بكات.
تەمەنێكی كەم و بەرهەمێكی زۆر
ئەوەی كە زۆر بەرچاوە و دەبێ هەوڵوەستەی لەسەر بكرێ ئەو هونەرمەندە تەمەنێكی كەمی هەبوو، بەڵام خاوەن بەرهەمێكی زۆر بوو، بۆیە تەنیا 25 ساڵ بەبێ زیاد و كەم ژیا، بەڵام توانیی بەشداری لە چەندین كاری هونەری بكات وەك مارەیی و ساختەچی ئاخر زەمان و چڵپاو و نەخۆشیی ددان و مەسەلەی شارێك و هەور و ساماڵ و پانتۆمایم و كاوەی ئاسنگەر و مەعقول و كاروانی خەبات و لە پێناو ڕوناكیدا و ئۆپەرێتی ڕووباری ژیان و شانۆگەرییەكانی داستانی شۆڕش و نەخۆشیی لەبیرچوونەوە و سەركەوتنی جووتیار و خەملی پەمۆ و بێ مێشك و نرخی ئازادی و بەگدرووی ئاخر زەمان و چاڵی جەرگی پیرەژن
دامەزرێنەری تیپی هەڵپەڕكێی سەندیكای كرێكاران بوو
ئەو هونەرمەندە بلیمەتە وێڕای كارە هونەرییەكانی دیكەی سەلیقەیەكی هونەری زۆری هەبوو بە جۆرێك لە هەموو لایەكەوە خزمەتی دەكرد و یەكێك بوو لە دامەزرێنەری تیپی هەڵپەڕكێی سەندیكای كرێكاران و لەو ڕێگایەوە بەشداری كارای هەبووە لە تابلۆ هونەرییەكانی وەك تابلۆكانی كوێستان و شوان و بادینی و لۆركێ و نەورۆز و دروونە، بێگومان هەر یەك لەو تابلۆیانەش جاران و ئێستاش جەماوەری تایبەت بە خۆی هەیە كە بە ئەشق و خۆشەویستیەوە گوێی لێدەگرن و لەگەڵیدا كاتەكانیان بەسەر دەبەن.
سوبحی و مەسەلەی شارێك
هەروەك لە پێشەوە هێمامان بۆ كرد كە ئەو هونەرمەندە كۆچكردووە چالاكی هونەری لە چاو هاوكوفانی خۆی یەكجار زۆر بوو، بۆیە دەتوانین بڵێین بە گوێرەی تەمەنەكەی نەبوو، چونكە ئەو هەر زوو ماڵئاواییكرد و هەموومان جێهێشت، كەچی بەرهەمێكی بێ ئەندازەی لە دوای خۆی جێهێشت، بەڵام لە هەموویان بەرچاوتر تەمسیلی (مەسەلەی شارێك) بوو كە ئەو ڕۆڵی (مەنیجی بەربوك) ی تێدا دەبینی و لەو ساوە تا ئێستا ئەو تەمسیلیە و ڕۆڵی سوبحی جوانەمەرگ لەبەر دلانن و هەرگیز كۆن نابن و ئێستا خەڵكی لە نێو خۆیاندا قسە و باسی لەبارەوە دەكەن، بە جۆرێك لەگەڵ هەموو كات و سەردەمێكدا دەگونجێ، ئەوا داهێنان و ئیبداعەكەی ئەو هونەرمەندە كۆچكردووەش لەولاوە بوەستێ كە زۆر زیرەكانە شان بە شانی سەلام كۆیی و جەلال بەیاری كۆچكردوو و عەلی ئەحمەد و هۆشیار عەبدولڕەحمان تەمسیلی دەكرد كە دەتگوت بۆ ئەو ڕۆڵە خولقاوە.
دوا وێستگە و دابڕان
هەموو مرۆڤێك چەندی بژێ دوور لە ویستی خۆی دەبێ لە دوا وێستگەدا بوەستێ و ئیدی ماڵئاوایی لە هەموو ئازیز و خۆشەویستانی بكات و لەبەر چاو و دیدەمان ون بێ، ئەوەتا ئەو هونەرمەندە مەزن و پڕ بەرهەمە، ڕۆژی 13 ی تشرینی یەكەمی ساڵی 1980 جوانەمەرگ بوو و، بۆ دوا جار ماڵئاوایی لێكردین، هەزار ڕەحمەتی لێ بێ و ڕۆحی شاد بێ. 

 

محەمەد سەعید كوردە - هه‌ولێر

© 2017 Hawler