کانونی یەکەم 08, 2019

هونەرمەند (بەهجەت یەحیا) لە كوێیە؟

هونەرمەندێكی سه‌نگین و خاوەن ستایل و فۆڕمێكی جوانی گۆرانیگوتنە. ئەو هونەرمەندە بە جوانترین ستایلی گۆرانی، لە ناوەڕاستی ساڵانی هەشتاكانی سەدەی رابردوودا دەستی بە گۆرانیگوتن كردووە. ئێستاكە ماوەی نزیكەی (4) ساڵە نادیارە! ئەو بەو هەموو جۆشوخرۆشەوە دوای چەندیین ساڵ لە غوربەت و ئاوارەیی هەندەران گەڕایەوە باوەشی نیشتمان، بەوپەڕی هێز و جوانییەوە لەو ماوەیەی كە لە كوردستان بوو، چەندیین بەرهەمی ناوازەی هێنایە بەرهەم، بەڵام بەداخەوە (بەهجەت یەحیا)ـی هونەرزان جارێكی دیكە گەڕایەوە و ڕێگەی تاراوگەی گرتەوە بەر!، ئەرێ بەڕاست ئەو وڵاتە جێگەی ئەو هەموو لێشاوە لە خەڵكی جۆراوجۆریە، جێگەی دەیان هونەر و دەنگبێژی بیانییە، كونجێ نەبوو بۆ هونەرمەندێكی وەكو (بەهجەت یەحیا)؟!
یان سەردەم و ستایلە جوانەكەی (بەهجەت) بەسەر چوو! لەبەر ئەو هەموو بەناو گۆرانیبێژەی، كە بەرهەمەكانیان (2) هەفتە بڕ ناكات و، هەر دەڵێی قسەیە بەدەنگی بەرزەوە دەری دەبڕن، بەڵام گۆرانییەكانی (بەهجەت یەحیا)ـی هونەرمەند زیاتر لە (30) ساڵە چەندین نەوە گوێی لێگرتووەو تا ئێستاكەش (ئێكسپایەر) نەبووە!.
ئەرێ بەڕاست بیرتان چوو هونەری (بەهجەت یەحیا) و پۆلێك لە هونەرمەندانی هاوڕێی ئەو سەردەمە بوون، لەژێر چەپۆكی حكوومەتی بەعسی لەناو چوودا، بە فیراری و ڕاوەدوونان و ئاوارەیی و ترس و تۆقاندن، ئەنفال و كیمیاباران هاتە بوون، حەیف نەبوو ئاوا زوو لەبیر كران؟!.
دەزانن ئەو هونەرمەندانەی ئەو سەردەمە تا گۆرانییەكیان تۆمار دەكرد، بە هەزار كولەمەرگی و قەرز و قۆڵە لە ژوورێكی تاریكی ماڵێكدا بە میوزیكێكی سادەو بەبێ ماسترینگ و ستۆدیۆ و میكسەری دیجتال، بەبێ كامێرای (HD و 4K) ڤیدیۆ كلیپ و كچی ڕووت دەهاتە بوون، بەڵام هونەرێكیان دەهێنایە بوون لە دڵەوە بۆ دڵ سەرچاوەی گرتبوو، هونەرێك بوو وەكو گوڵێك سور لەسەر بەردێكی ڕەق دەڕوا..!
ئەرێ ئەوانەی وایان كردووە (بەهجەت یەحیا) و هاوڕێگایانی ئەو دڵیان لە هونەر و ئەو خاكە بتۆرێ لە كوێین، كوا ئەو (40) كەناڵە ئاسمانییە، كوا وەزارەتی رۆشنبیری؟ كوا موستەشار و ڕاوێژكارانی هونەری لە كوێن؟ ئەرێ بیری (بەهجەت یەحیا) ناكەن؟! یان ئێوەش لە بەر ئەو گۆرانیانەی كە هەر دەڵێی لە (سین) دروست كراون، بیری گۆرانییە جوانەكانی ئەو هونەرمەندانە ناكەن؟!
 یاخوود لەبەر گۆرانییە ناخۆشەكانی ئەو سەردەمە ئێوەش كوێچەكەتان كاس بووە و هونەری گۆرانیتان لەبەر چاو كەوتووە!.
دڵنیام رۆژێك دێت زۆر پەشیمان دەبنەوە بۆ هونەرە ئاست\بەرزەكانی وەكو (بەهجەت یەحیا)ـو ئەو هونەرمەندانەی هونەرەكەیان بوون بە ناسنامەی هونەرێكی ئاست بەرز، من دڵنیام چۆن ئێستا لەكەناڵەكان بە سووتفەش گۆرانییەكی جوان و پڕ لە هەست نابیستین، مێژوو رەحم بەكەس ناكات و زۆرینەی گۆرانیی ئێستاش وەك بڵقی سەر ئاوی لێدێت، وەك چۆن لەسەردەمی (حەسەن زیرەك، محەمەدی ماملێ، عەلی مەردان، سەید عەلی ئەسغەری كوردستانی) بە سەدان و هەزاران گۆرانیبێژ هەبوون، فەرموون سەیری ئەو مێژووە بكەن، بزانن كامە گۆرانیی كامە هونەرمەند ناویان چووەتە ناو مێژوو و بە جوانی مانەوە! بۆیە مزگێنی بێت بۆ بەشێكی زۆر لەو بەڕێزانەی یەخەی گۆرانیی كوردییان گرتووە، ئێوەش ناوتان ناچێتە ناو ئەو مێژووەو گۆرانییەكانتان بەشێوەی كاتی بۆ سەردەمێك زەمەنێك بوو بەس!
من زۆری بیری (بەهجەت یەحیا) هونەرە جوانەكەی دەكەم.

 

عەبدولغەفار عەبدوڵڵا

© 2017 Hawler