ئەیلول 21, 2019

ناجی سەلیمی سیناریۆی فیلمێكی دەربارەی ژیانی بڕیار ئامادە كردووە

خانمە سینەماكار و گۆرانیبێژی رۆژهەڵاتی كوردستان ناجی سەلیمی، سیناریۆی فیلمێكی ئامادە كردووە دەربارەی ژیانی بڕیار كە بەر لە ماوەیەك بەهۆی نەخۆشییەك كۆچی دوایی كرد.

لەم بارەوە ناجی سەلیمی دەرهێنەری دانیشتووی شاری بۆكان بە (ھەولێر)ـی راگەیاند: ئێمەی كورد هەمیشە ژیانمان پڕ بووە لە كارەسات و تراژیدیا كە بە سەدان فیلمیش ناتوانین گوزارشتیان لێ بكەین هەر لە هەڵەبجە و ئەنفالەوە بگرە تا دەگاتە شەڕی نەگریسی تیرۆریستانی داعش و ڕفاندن و كوشتنی هەزاران ئێزیدی، ڕووداوی كۆچی دوایی بڕیاری پەپوولە ناخی هەموو كوردێكی هەژاند، ئەم ڕووداوە زۆر كاریگەریی هەبوو لەسەر من وەك سینەماكار، بۆیە لە چەند ڕۆژی ڕابردوودا سیناریۆیەكم ئامادە كردووە دەربارەی ژیانی بڕیار و باوكی، چونكە كارەساتێكە خۆشەویستی نیشتمان و باوك لەو كارەساتە بە تەواوی ڕەنگی داوەتەوە. سەبارەت بە دەستپێكردنی كاری فیلمەكە ناجی سەلیمی كە یەكەم سینەماكاری كوردە بیری لە بەرهەەمهێنانی ئەم فیلمە كردووەتەوە گوتی: بە نیازم لە چەند ڕۆژی داهاتوودا سەردانی كوردستان بكەم و لە نزیكەوە چاوم بە كەسوكاری بڕیار بكەوێت، چونكە سیناریۆیەكی تۆكمەم ئامادە كردووە، بەڵام پێویستە لە نزیكەوە چاوم بە كەسوكاری بكەوێت بۆ ئەوەی فیلمێك بێت كە جگە لە باس كردنی ژیانی بڕیار و باوكی كە ئەمەش بەشێكی بچووكە لەو كارەساتانەی ڕووبەڕوومان بوونەتەوە.
دەربارەی دوایین كارەكانی خۆیشی ناجی سەلیمی وتی: لە ماوەی ڕابردوودا دوو گۆرانی نوێم تەواو بووە، كە بەم نزیكانە بڵاویان دەكەمەوە، لەلایەكی دیكەوە لەو سەردانەی كە بڕیارە بۆ هەرێمی كوردستان ئەنجامی بدەم سوپرایزێكم ئامادە كردووە بۆ جەماوەر هیوادارم بە دڵیان بێت.

 

شیڤان شێرزاد - هەولێر

© 2017 Hawler