ئەیلول 21, 2019

تا ئێستا 10 هەزار وێنەی سروشتی كوردستانم ئەرشیف كردووە

هونەرمەندی فۆتۆگراف شێرزاد كەریم ئەحمەد كە لە نێوەندی هونەریدا بە شێرزاد هیرانی ناسراوە، پتر لە 30 ساڵە لەگەڵ ئەشقی وێنەی فۆتۆگرافە و لەگەڵ كامیرا و فۆتۆگرافدا دەژی و تا ئێستا 13 پێشانگای تایبەت بە گرتەكانی كردۆتەوە وەك خۆی هێمای بۆ دەكات و دەڵێ من ئەشقی سروشتم و هەموو وێنەكانیشم لەو تەوەرەدا دەسووڕێنەوە.

13 پێشانگا لەسەر سروشت
شێرزاد هیرانی هونەرمەند وەك خۆی دەڵێ: تا ئێستا 13 پێشانگای فۆتۆگرافیم سەبارەت بە سروشتی كوردستانی ڕەنگین كردۆتەوە، لە دوا پێشانگاشمدا كە ماوەیەك لەمەوبەر بە ناونیشانی (سروشت وەك) لە ئەمنە سوورەكەی سلێمانی كردمەوە تێیدا 50 تابلۆی قەبارە 50 بە 75 م خستبووە ڕوو كە گوزارشتیان لە سروشتی هەر چوار وەرزەكە دەكرد، بۆیە بەخۆشحاڵیەوە دەڵێم خەڵكێكی زۆر هاتبونە دیدەنی وێنە فۆتۆیەكان و ئەوپەڕی خۆشحاڵیی خۆیان بۆ دەردەبڕی.

سروشتی هەموو وەرزەكان
هیرانی وێنەگر جەخت لەوە دەكاتەوە و دەڵێ: تێكرای وێنەكانم گرتەی سروشتی هەموو وەرزەكان پێشان دەدات، ئەویش بۆ ئەوەی گرتەكان وەكو یەك بخەمە ڕوو و ستەم لە هیچ وەرزێك نەكەم، چونكە هەر یەكەیان جوانی و قەشەنگی خۆی هەیە، هەر ئەوەش بۆتە پاڵدەرێك كە من زیاد لە پێویست ئاوێتە و ئاوێزانی سروشت بم و كارم لەسەر شوێنە دوورە دەستەكانیش كردوە، تەنانەت جێگای وا هەبووە شەو و ڕۆژێك سەفەرم بۆی كردوە تا گرتەیەكی جوان و سروشتی واتا بەخشم چركاندوە، هەتا بۆ ئەو كارە چوومەتە ئەودیو سنووریش تا بتوانم داهێنانێك لە كارەكانم بكەم.

چاوی خۆت و زوومی كامێرا
ئەو هونەرمەندە دەڵێ: ئێمە خۆمان لە نێو سروشتداین، هەموو كەسێكیش دڵی بە سروشت دەكرێتەوە، بەڵام دەبێ ئەوە ڕاستیەش بزانین كە چاوی خەڵكی ئاسایی و چاوی هونەرمەند بۆ گواستنەوەی گرتەكان زۆر جیاوازە، وێنەگرتن لای من وەك ڕاوكردنە بە دوای نێچیر، بۆیە ئەگەر سەعاتێك بووەستم بۆ چركاندنی گرتەیەك باكم نیە، ئەگەرچی زۆر جار دیمەنی وا دێنە بەرچاوم كامیراكەم ناتوانێ بیانگواستەوە و سروشتەكە زۆر لەوە جوانتر بووە كە من بتوانم بە زوومی كامیراكەم مامەڵەی لەگەڵدا بكەم، لە كاتێكدا وێنەگر حەز دەكات ئەوەی بە چاوی سەر دەیبینێ ئەوە بگوازێتەوە، بەڵام هەندێ شتیش سنووردارە و لە توانای مرۆڤ بەدەرە.

سروشت وەكو خۆی
بێگومان هەموو شتێك بەبێ ڕتووش و بە هەقیقەتی خۆیەوە جوانە، بۆیە لەمبارەیەوە هونەرمەند شێرزاد هیرانی دەڵێ: كە دەڵێم سروشت وەك خۆی بە واتای ئەوەی نابێ لە هیچ ڕووە وە دەستكاری بكرێ بۆ ئەوەی جوانی و قەشەنگی خۆی ون نەكات، هەر لەژێر ڕۆشنایی ئەوەشەوە ناونیشانی دوا پێشانگام كردە (سروشت وەك خۆی) بەو ئومێدەی هەموومان بەو شێوەیە مامەڵە لەگەڵ سروشت بكەین.

ئەرشیفی گرتە سروشتیەكان
ئەرشیف بۆ كەسی هونەرمەند زۆر گرنگە تا كۆی بەرهەمەكانی تێدا بپارێزێ و بە دیكۆمێنتی بكات و لە داهاتوو كەسانی دیكە سوودی لێ ببینن، بۆیە ئەو هونەرمەندە بە بایەخەوە باس لە سروشتی كوردستانی ڕەنگین دەكات و دەڵێ: دەبێ هەموومان ڕێز لە سروشت بگرین بەوەی هەموومان ئەرشیفێكی دەوڵەمەندمان هەبێت لەمبارەیەوە هەبێت بە تایبەتی ئێمەی هونەرمەند، چونكە من تا ئێستا پتر لە 10 هەزار وێنەی سروشتی كوردستانم ئەرشیف كردوە، ئیدی نازانم لە دوای منیش ئەو ئەرشیفە چی بەسەر دێ؟!

سروشت لای هونەرمەند
دیمەنی سروشت لای هەر تاكێك لە تاكەكانی نێو كۆمەڵ جۆرە تامو چێژێكی زۆر تایبەتی هەیە بەپێی ئەوەی پڕیەتی لە دیمەنی ڕەنگا و ڕەنگ، بۆیە هیرانی دەڵێ: سروشت لای من زۆر مەزن و پیرۆزە، بە تایبەتی سروشتی كوردستانی ڕەنگین، بۆیە من هەر لە منداڵیەوە حەزم كردوە لەسەر ئەو ڕێبازە ئیش بكەم و خودی خۆم زۆر تامو چیژم لێ وەرگرتوە لە هەمووشی گرینگتر من هیچ دەستكاری گرتەكانی سروشتم نەكردوە لە ڕووی ڕەنگ و پاككردنەوە ئەویش بۆ ئەوەی وەكو خۆی دەربكەوێ و جوانیەكەی خۆی لە دەست نەدا.

سروشتی وەرزی پایز
دیارە هەر وەرزێك لە وەرزەكانی ساڵ جۆرە تایبەتمەندی خۆی هەیە و هەر یەكێك لە ئێمەش جۆرە وەرزێكی پێ خۆشە، ئەو هونەرمەندەش سەبارەت بە وەرزی پایز دەڵێ: هەموو وەرزەكانی ساڵ لای من جوانن و هەر یەكەیان جۆرە تایبەتمەندی خۆی هەیە، بەتایبەتیش وەرزی پایز كە بە وەرزی گەڵاڕێزان ناو دەبرێت، من وەك وێنەگرێكی فۆتۆگراف زۆر گرتەم لەو بارەوە چركاندووە و وێنەیەكی زۆرم لەو وەرزەدا گرتوە و پێم وایە ئەو وەرزەش تەمەنی زۆر كوورتە و كەم كەس چێژ لەو وەرزە وەردەگرێ، هەر بۆیە شاعیر و نووسەر و گۆرانی بێژان بەرهەمی بەپێزیان سەبارەت بەو وەرزە هەیە.

قسەی میوانێكی پێشانگا
هەر میوانێك كە دێتە پێشانگایەكی هونەری حەتمەن چەندین سەرنج و تێبینی لەلا گەڵاڵە دەبێت و پێی خۆشە ئەو سەرنج و تێبینیانە بخاتە ڕوو، بۆیە سەبارەت بەو گرتە و تابلۆ جۆرا و جۆرەكان، جا یەكێك لە میوانانی پێشانگاكەی ئەو هونەرمەندە بەو شێوەیە قسەی دەكرد و دەیگوت: كە بە پێشانگاكەی هونەرمەندی فۆتۆگراف شێرزاد هیرانی گەڕام گوڵم بینی بۆنی گوڵم كرد، بەفرم بینی هەستم بە سەرما كرد، هاوینم بینی هەستم بە گەرما كرد، بەهارم بینی هەستم بە سروشتێكی دڵڕفێن كرد، ڕەنگە سەرنجی دیكەش لەلای میوانان هەبووبێ كە بە شێوەیەك لە شێوەكان خرابێتە ڕوو، بەڵام تێكڕای سەرنجەكان لە بەرژەوەندی پێشانگاكە بوو.

 

محەمەد سەعید كوردە - هه‌ولێر

© 2017 Hawler