ئەیلول 19, 2019

ڕێبین جەمال بە ئیشقەوە كلارنێتەكەی ماچ دەكات

بە پەنجەی دەست ئەژمار دەكرێن ئەوانەی كە لە بواری موزیكەوە بەرەو گۆرانی گوتن و هونەرە جوانەكانی دیكەوە هەنگاو دەنێن و لە هەمان كاتیش سەركەوتنی تەواو بەدەستەوە دەدەن و دەبنە جێگای سەرنجی هەموو لایەك كە هەمیشە باس بكرێن یان لە هەموو كات و ساتێكدا دەستخۆشیان لێ بكرێ و چەپڵەیان بۆ لێ بدرێ، ئەوەتا موزیكژەن و گۆرانی بێژی دەنگخۆش ڕێبین جەمال ساڵانێك كە خاوەن ئەزموونێكی دوور و درێژە لەو بوارەدا، بە تایبەتی كاتێ لە گروپی موزیكی نالی كاریدەكرد و دنیایەك بەرهەمی جوان و ناوازەیان پێشكەش بە هەموانكرد، پاشان بەهۆی قەیرانی داراییەوە ئەو گروپە موزیكیە چالاكیەكانی خەفە بەوە، بەڵام لە ئێستادا وەك مژدەیەكی خۆش بۆ هەموان خەریكە بەرهەمەكانی ئەو گروپە بەدیار دەكەوێتەوە و جارێكی دیكە بە گوڕ و تینەوە دەست بە كار و چالاكیەكانی خۆی دەكاتەوە و هەموو لایەك دڵخۆش دەكات.
ڕێبین و كلارنێتەكەی
هەر هونەرمەندێكی موزیكژەن لە پاڵ بەهرە گەشەكەیدا چیرۆكێكی خۆشەویستی لەگەڵ ئامێرێكی موزیكیدا هەیە كە هۆگری بوە و هەمیشە لەگەڵیدا دەژی، هەروەك خۆشەویستیەكەی هونەرمەندی بە ئەزموون ڕێبین جەمال بۆ كلارنێتە جوان و باڵاكەی كە خۆشەویستیەكی بێ ئەندازە و لەڕادەبەدەرە، بۆیە لە دیمانیەكدا دەڵێ كلارنێتەكەم ماچ دەكەم، چونكە ئەو ڕیتم و ستایلە جوانەكانی گۆرانی ئاشناكردم و كلارنێتەكەم ڕەنگدانەوەی لەسەر دەنگی من هەیە، ئێمەش سەد دەر سەد لەگەڵ ئەوەداین و دەڵێن بەڕاستی ڕایەكی زۆر جوانە و ئەوپەڕی میهر و وەفاداری لێ دەتكێ.
ڕێبین و(ئێوارە سەراب)
 یەكەمین نۆبەرە بەرهەم لای هەر هونەرمەندێك ڕێز و شكۆی و یادگاری خۆی هەیە، بۆیە هەمیشە بەوپەڕی كاریگەرییەوە باسو خواسی لەبارەوە دەكرێ و یاد دەكرێتەوە و بە نموونەی بەرز و باڵا دەهێندرێتەوە، بێگومان دەنگی ڕێبین جەمال یش جیاوازە لە هەموو دەنگەكانی دیكە، بۆیە لەهەركێ بێ بە جوانی دەناسرێتەوە و چێژی لێ وەردەگیرێ و دەچێتە دڵەوە، بۆیە ئەوە وەبیر دەهێنینەوە كە یەكەم دەركەوتنی ڕێبین وەك گۆرانی بێژ بە گۆرانی (ئێوارە سەراب) بوو كە هۆنراوەی هەر سێ شاعیر حەمە عەلی و كەریم دەشتی و ڕێدار سابیر بوو، ئەوەیان وەك سێ شیعری تێكهەڵكێشراو بوە هۆی سەركەوتنی ئەو بەرهەمە، دەبێ بگوترێ ئەو بەرهەمەش تامو چێژێكی زۆری هەبوو ئێستاش خەڵكی بەتاسەوە گوێی لێ دەگرن و چێژی لێ دەبینن و هەر حەز دەكەن لە گوێچكەیاندا بزرنگێتەوە.
ڕێبین و ئاواز دانان
ئاواز دانانیش هونەرێكی یەكجار بەرزە و كەم كەس دەوێرێ و زاتی ئەوە دەكات خۆی لەقەرە بدات، هەروەها لە پاڵ ئەوەشدا زەوق و سەلیقەیەكی زۆری پێویستە تا بە شێوەیەكی هونەری ڕاست و دروست لە دایك ببێت و چاوەكانی هەڵبێنێ، بۆیە دەتوانین بڵێین ڕێبین جەماڵ وەك گەورە هونەرمەندانی دیكە جگە لە موزیك ژەنین و گۆرانی گوتن لە ئاواز دانانیش ئەزموون و دەستێكی باڵای هەیە و ئاوازی بە زۆر گۆرانی بێژ داوە تا بیكەن بە گۆرانی، بەڵام وەك خۆی هێمای بۆ دەكات و دەڵێ ئاوازم بە عەدنان كەریم و ئەیوب عەلی و گۆران ساڵح و هی دیكە داون، بەڵام ئاوازەكانی هەردوو گۆرانی بێژی دەنگخۆش عەدنان كەریم و ئەیوب عەلی تا ئێستا دیار نین كە بكرێن بە گۆرانی، ئێمەش لە چاوەڕوانی ئەو دەنگ و ئاوازە بە جۆش و خرۆشەین.
ڕێبین گەوهەرێكی مەزنە
دوور لە وەسف و پیاهەڵدان هونەرمەندی خاوەن ئەزموون ڕێبین جەماڵ بەهۆی كارە جوان و ناوازەكانی گەوهەرێكی مەزنە لە نێو گۆرانی و موزیك و ئاوازی كوردی ڕەسەندا و توانیویەتی لە ماوەی دەركەوتنیدا شوێن پێی خۆی لە كاروانە هونەرییەكەدا بدۆزێتەوە، بۆیە ئەگەر بایەخ و گرنگی زیاتری پێ بدرێ و پتر لەگەڵ كلارنێتەكەی ئاوێزان بێت ئەوا چاوەڕوانی بەرهەمی جوانتر و بەپێزتری لێ دەكرێ، ئێمەش لەو چاوەڕوانیەداین.

 

محەمەد سەعید كوردە - هه‌ولێر

© 2017 Hawler