تشرینی دووەم 20, 2019

ئەستەمە گۆرانییەك بتوانێت سنوورەكانی خەیاڵ تێك بشكێنێت و ئاوێتەی رۆحی مرۆڤ بێت، ئەو دەمەی گۆرانییەك دەبێتە پێناسەی میللەتێك لەوێدا داهێنانی هونەریی هونەرمەندێك دەبێتە مۆرك و پایەی هونەری ئەو میللەتە، گۆرانیبێژی سەركەوتوو بەرهەمی نەمر لەوەدا خۆی دەبینێتەوە، كە سەرجەم خاسیەتە هونەرییەكان لە نێو گۆرانی و بەرهەمە هونەرییەكانیدا بەدی بكرێت و، هەوڵە هونەرییەكانیشی تەنها بۆ سات و كات و سەردەم نەبێت، بەڵكو ڕوانین بێت بۆ ئایندەیەكی دوور، كە ئەمەش بەشێكە لە ڕەسەنایەتی و دەستەبەركردنی ئەو ڕۆحەی كە دەبەخشرێتە بەرهەمە هونەرییەكە. یەكێك لەو هونەرمەندە پێشەنگ و باڵادەستانەی كە بۆ هەمیشە بەرهەمە هونەرییەكانی ڕۆحێكی نوێ بە ئێمەی گوێگر و بینەر دەبەخشێت هونەرمەندی گەورە(مەزهەری خالقی)ـیە. كە توانیویەتی بە بەرهەمە دەگمەن و دانسقەكانی و بە چریكەی پڕ لە سیحری قوڕگی هاوارەكانی سەدا و سۆزی دەنگی بچێتە نێو ڕۆحمان و بۆ هەمیشە لە نێو هزر و خەیاڵ و ئەندێشەمان بە زیندوویی بمێنێتەوە، كە بێگومان ئەمەشیان گەورەیی و زیرەكی و باڵادەستیی هونەریی هونەرمەند خالقی دەگەیەنێت، كە چەندین ساڵ بەر لە ئێستا توانیی لە ڕێگەی ئەو میلۆدییە كوردییە پڕ تام و چێژانەی كە هەرگیز لە ئەندێشەی مرۆڤی كورد جیانابێتەوە كاریگەریی ئەوتۆ بێنێتە نێو گۆرانی و موزیكی كوردی و ئێمەی كوردیش هەست بە بوونی ئەو میلۆدی و ئاوازانە بكەین، كە گوزارشت و بنەمان بۆ گۆرانی و موزیكی كوردی، لە ڕووی هونەرییەوە خالقی توانیی ئەو میلۆدییانە بێنێتە نێو گۆرانیی كوردی، كە ڕەسانەیەتی هونەری كوردی و مۆركێكی تایبەتی كوردی بسەلمێنێت و بە هیچ شێوەیەك كاریگەری موزیك و میلۆدی بیانی لەسەر نەبێت و خاڵێكی دیكەی هونەریی گرنگ كە لە كارە پڕ لە داهێنانە هونەرییەكانی خالقی بەدیار دەكەوێت ئەوەیە، كە هونەرمەند توانیی بە ستایلێكی ئۆركسترایی كارە هونەرییەكانی بە شێوازی هاڕمۆنی و دابەشكردنی موزیكی چڕ و پڕ بەرهەم بێنێت، كە لێرەشدا چەند موزیكزانێكی كورد ڕۆڵ و كاریگەریی ئەوتۆیان هەبووە لە ئەنجامدانی ئەم بەرهەمانە، بە تایبەت موزیكژەن و دانەری بە توانا مامۆستا (موحتەبای میرزادە) و هونەرمەندی موزیكژەن (حەسەن یوسف زەمانی). كە ئەمەش وەك دەستپێكی گرنگ و پڕ بەها دەستنیشان دەكرێت لە بەرهەمە نایابەكانی خالقی.
پاشان دەنگی خالقی ئەو دەنگەیە كە تایبەتمەندی خۆی هەیە و ستایلێكی تایبەتە لە نێو هونەری گۆرانی كوردی و هەموو شێوازە زانستییە هونەرییەكان و خاسیەتەكانی هونەری تێدا بەرجەستەیە. كاتێك گوێ لە گۆرانیەكانی دەگرین، سۆزێكی پڕ لە تام و چێژی كوردی دەبەخشێتە ڕۆحمان و چریكە و سەدای قورگی دەمانباتە نێو دنیایەكی خەیاڵی و گوزارشتە لە دیمەنە جوانەكانی كورد، بۆیە جێگەی شانازییەكی گەورەیە، كە ئێمەی كورد خاوەنی هونەرمەندێكی مەزنی وەك خالقین.
بەرهەمە هونەرییەكانی خالقی بۆ ئێستا و بۆ ئایندەش بوونەتە قوتابخانەیەكی هونەری گرنگ، كە گەیشتن بەو پایە گەورە هونەریەش زیرەكی و ئەوپەڕی توانا و داهێنانی هونەریی گەرەكە، هەر بۆیەش خالقی بەسەدا و چریكەی پڕ لە سیحری قورگی و ئەو ستایلە هێمن و ئارامەی كە هەڵیبژارد توانی باڵادەستی هونەری خۆی بسلمێنێت و تێكەڵی هونەر و خەیاڵمان بێت و بۆ هەمیشە باڵاتر و نەمرتر بەرهەمە هونەرییەكانی لە نێو ڕۆحدا جێگیربن و ببێتە ئایندەیەكی گەش بۆ دوێنێ و ئەمڕۆ و سبەی گۆرانی و موزیكی كوردی...

 

هەڵبەست سەڵاح

© 2017 Hawler