تشرینی دووەم 15, 2019

دوای پێنج ساڵ دابڕان، (شیلان عوسمان) گەڕایەوە نێو كایەی هونەر

هونەر و بواری هونەری لای زۆرێك لە هونەرمەندان هێندە شیرینە، بۆیە ئەستەمە هونەرمەندان هەروا بە ئاسانی دەست بەرداری بن و پشتی تێ بكەن و ئیدی نەگەڕێنەوە سەری، بۆیە دەبینین زۆرێك لە هونەرمەندان دوای وازهێنانیان لە بواری هونەر كەچی بەهەر بیانوویەك بێت جارێكی دیكە دەگەڕێنەوە و قۆڵ و باسكی مەردانەی لێ هەڵدەماڵن و بە گووڕتر لە جاران خزمەت دەكەن.

 ئەوەتا خانمە هونەرمەندی دەنگخۆش (شیلان عوسمان) كە لە ماوەی ڕابردوو خزمەتێكی زۆری بواری هونەری كرد، كەچی دوای پێنج ساڵ دابڕان جارێكی دیكە گەڕایەوە نێو كایەی هونەر و دەستی بە گۆرانی گوتن كردەوە، وەك خۆی دەڵێ زۆرم پێ خۆش بوو گەڕامەوە نێو كایەی هونەری و حەزیشم كرد بە گۆرانیەكی هونەرمەندی كۆچكردوو عەباسی كەمەندی دەست پێ بكەمەوە و گۆرانیەكەش وەكو ئەو بڵێمەوە و بەبێ دەستكاری بۆ ئەوەی هەموو لایەك تاموچێژی لێوەربگرن و گلەیم لێ نەكەن، وەك چۆن دایكێك هەوڵ دەدات كۆرپەكەی بە جوانترین شێوە پەروەردە بكات، هونەرمەندی ئافرەتیش دەبێ خزمەتی خودی خۆی و هونەرەكەی بكات، لەلایەكی دیكەوە ئەو هونەرمەندە دەڵێ من بە هیچ شێوەیەك لەگەڵ ئەوەدانیم كلتووری وڵاتان تێكەڵ بە كلتووری خۆمان بكەم، ماوەتەوە بڵێین خانمە هونەرمەندی دەنگخۆش (شیلان عوسمان) لە ساڵی 1980 لە شاری سلێمانی لە دایك بوە و لە ساڵی 1994 دەستی بە گۆرانی گوتن كردوە و لە ساڵی 1997 یەكەم بەرهەمی بەناوی (عەشق باران) تۆمار كردوە و تا ئێستا خاوەنی 23 كلیپە.

 

محەمەد سەعید كوردە - هه‌ولێر

© 2017 Hawler