نیسان 07, 2020

زۆرترین بینراو فه‌رهه‌نگ

Error: No articles to display

مستەفا غەفوور

 

ئێمە وافێربووین، یا هەر خەسڵەتی مرۆیی وایە، ئاو لەسەرچاوەكە دەخۆینەوە. بەو بڕوایە، تا دەگاتە جۆگەلە و لقەكانی، شلوێ دەبێ، لێڵ دەبێ، بە جۆرێك پیس دەبێ، كە بۆ خواردنەوە ناشێ. ئەمە بۆ هەر شتێك راست بێت بۆ بواری سیاسی و شۆڕشگێڕی هەڵەیە. راستە پرسەكان لای سەركردە و بڕیار بەدەستانن، بەڵام وردەكاری رووداوە مێژووییەكانیان لە خوارەوەن، ئەوان لەبەر ئەوەی راستەوخۆ لە مەیدانی روودەوەكان دانین، تەنیا بە گێڕانەوە و راپۆڕت هەواڵ و چۆنییەتی رووداوەكان وەردەگرن، كە زۆر جار دەبنە كەرەستەی سەرەكی بیرەوەرییەكانیان. بۆ سەلماندنی ئەم بۆچوونەش ئەگەر چاوێك بە بیرەوەری سیاسی و رۆژانی پێشمەرگایەتی و چەكداری گەلێك لەو سەردكردە و كادیرە باڵایانەی بزوتنەوەی ئازادیخواڤی كوردا بخشێنین، هەڵە و خراپ گواستنەوەی رووداوەكانمان بەرچاو دەكەوێ. ئەمەش كاردانەوە لای باشدارانی راستەقینە و مەیدانی رووداوەكانی لێدەكەوێتەوە. ئاشكرایە لە ركابەری سیاسیشدا، هەركەس و لایەنە پشكی گەورەی پاڵەوانەتییەكان دەگێرێتەوە بۆ خۆی. لە كاتێكدا كەسانی ناو مەیدانەكە باشتر ئاگادارن و وردەكارییەكان لای ئەوانە. ئەمەش بێ كەموكوڕی نییە، چونكە هیچ كەس هەموو لایەنەكانی رووداوێك نابینێ تەنانەت ئەگەر خۆشی تێیدا بەشدار بوو بێ، چونكە سەرەرای ئەوەی بیرتیژی و وردبینی گەرەكە، بەشەكەی تری رووداوەكە لای بەرامبەرەكەیە، كە رەنگە تا وەختێكی زۆری بەسەرنەچێ و ئاشكرا نەبێ.
لەبەرئەوە من گێرانەوە یا بیرەوەری كەسانێكی سادەش بەهەند وەردەگرم، بەو بڕوایەی دوور نییە لایەنێك تاریكی رووداوەكە هەرچەند بچووكیش بێ، رووناك بكاتەوە.
هەوری سەرگەردان، یەكێكە لەو بەرهەمانەی، نووسەر، وەرگێڕ و خۆشنووسی دەڤەری پشدەر كاك عومەری یوسفی. بەرهەمێكە نە ڕۆمانە نە داستانە نە تەنیا بەسەرهاتی خۆیەتی، بەڵكو تێكەڵەیەكە لە بەشێك لەو روودا و بەسەر هاتانەی كوردستان بەگشتی و خۆی و ناوچەی پشدەر بەتایبەتی. لەگەڵ ئەوەشدا دەكرێ بڵێم سەرنجراكێشە و هەموو خوێنەرێك بە تایبەتی خوێنەرانی ناوچەكە پتر پەلكێش دەكات تاكۆتایی بێخوێننەوە، ئەمەش بەو مانایە نییە تەنیا بۆ ناوچەكە نووسراوە و، بەشێك لە مێژووی سیاسی ناوچەكە لە كۆتای حەتاكانی سەدەی رابوردووە تا دەهەی یەكەمی سەدەی بیست و یەك، دەگێرێتەوە، نەخیر گەلێك پرسی گشتی و تایبەت بە لایەن و كۆڕ و كۆمەڵەكانی تێدایە، كە روونكردنەوەن و بۆ هەر كەسێك لەو بوارەدا ئیش بكات پێویستی پێی دەبێ.
ناوبراو بە زمانێكی پاراو، رەوان و شیرینی تا رادەیك پەتی ناوچەی پشدەر، لە روودا و پرس و بابەتەكان دەدوێ، هەروەك خۆی، راستگۆیانە و لەسەرەخۆ، بە بۆچوونێكی واقعیی و تارادەیەك دیدی ئسلامییانە پەردە لەسەر بەسەرهاتەكان لادەدات. بەڵام ئەوەی پێویستە بگوترێ ئەوەیە، كە كاك عومەر بە بیروباوڕێكی ئیسلامی كوردپەروەرانە مامەڵە لە گەڵ واقعی رووداوەكان و تەنانەت واقعی ئەمڕۆی كوردستانیش دەكات. بێ غەڵ و غەش بێ ئەوەی تەشهیر بە هیچ كەس و لایەنێك بكات تەنانەت لایەنی سیكۆلاریستیش، بێ ئەوەی خاتری ئەم و ئەو بگرێت، بێ ئەوەی چاو لەكەموكوڕی كەسایەتی و لایەنەكان بپۆشی، راست و رەوان رووداوەكان بەو دیوەدا دەگێڕێتەوە دەگێڕێتەوە، كە خۆی دیویەتی و بەسەری هاتووە، دوور لە پەیوەندی حیزبایەتی و ئایدۆلۆجی وشك. پرسەكان تاوتوێ دەكات و بە نەزاكەتەوە رەخنەیان لێدەگرێت، تەنانەت لەو هێزو لایەنە ئیسلامی سیاسییەش كاری لەگەڵ كردوون. نەك هەرئەوە، لە هێندێك شوێن لە بێئومێد بوونی خویدا، سیمای پەیوەندی دەرەكی ئەو ئیسلامەوییانە نیشان دەدات، كە بە داردەست و پاڵپشتی وڵاتانی دەوروبەر خۆیان بەسەر پێوە راگرتووە، پتر لەوەی كار بۆ پرسە نەتەوەییەكە بكەن، بە ئامانجی بەئیسلامكردنی كۆمەڵگەی كوردی كار دەكەن، وەك ئەوە كورد تائێستا كافر بووبێ و ئەوان دەیانەوێ موسوڵمانی بكەن.
لە هێندێك شوێنیشدا وەك شاعیر یا پەخشاننووسێكی بەرجەستە، لە وەسفی كەش و هەوای سازگاری كوردوستان و دیمەنە جوانەكانی رادەچێت، گەرم و گوڕی پەیوەندی كۆمەڵایەتی و هاوپەیوەندی تاكی كورد دەخاتە روو. بە تەواوی دابەزیوە بۆ ناو نەریتە كۆمەڵایەتییەكانی خوارەوەی كۆمەڵگا و هەڵسوكەوتی تاكی دڵسافی كورد بە جوانی نیشان دەدات.
 ئەوەی پتر جێگای سەرنجە بێ ئەوەی خۆی هەست پێبكات، وەك دەروونناسێك تیشك دەخاتە سەر ژیانی خێزانیی و رادەی فیداكاری لە پێناوی چارەسەری نەخۆشی دەروونی خێزانە بەڕێزەكەی، كەمن پێموایە بەشێكی دەگەڕێتەوە بۆ رەوشی سەقەتی ژن و ژنخوازی كلاسیكی و، سووڕانەوە لە بازنەیەكی داخراوی دینیدا سەبارەت بە ئافرەت. لەگەڵ ئەوەشدا دانیانپیادا نانێت و بە شتێكی ئاسایی دەزانێ، لە كاتێكدا دەرئەنجامەكەی ئەوەیە، پتر لە (20) بیست ساڵە نەیتوانیووە كچەكەی ببینێت، كە یەكێكە لە ئاواتە هەرە گەورەكانی.

© 2017 Hawler