ئاب 13, 2020

بە گریانەوە
لە گۆشەی چامەیەكمەوە
بێدار بوومەوە
نە باوكم بینی و
نە دایكم و
نە براكانم
باران شەست دایدابوو
جلەكانم تەڕبوون
پەنام بەر ئاوازێكی ڕێتمی چامەكە بردو
ئاگرێكم لەژێر دەوارێكدا كردەوە
هەر ئێستە لە كانتینی دوایەمین ڕستەی
چامەكە لەگەڵ خۆم هێنابووم
خۆم پێ گەرم كردەوە
چوست و چالاك بوومەوەو
ویستم بڕۆم
ترس لە تاریكی ڕێگەكە دایگرتم
ئەوەند واقم وڕمابوو
لە هاواری یەكێك لە وشەكانی چامەكە
بەئاگەهاتم‌
نە باوكم بینی
نە دایكم
نە براكانم
نە دەوارەكەو
نە چامەكەو وشەكانیشی
ئەو كات زانیم شەمەندەفەری بەیانی
بەجێی هێشتووم
چونكە دەڕۆیشتم
ئامادەی ئاهەنگێك ببم
پەردەیان تێدا لەسەر پەیكەرێكی شیعر لادەدا!!
19/11/2018
***

درۆم نەكردووەو
سواری پشتی ئەسپی درۆیش نابم
ناتوانم پشت بە گوریسگەلێكی كورت ببەستم
كە ناگەنە كەناری ڕاستی!!

شمشێرگەلی ژەنگاوی

شمشێرگەلی ژەنگاوی دەبینم
ڕدێنگەلی فێڵاوی دەبینم
مێشكگەلی شێواوی دەبینم
هەڕەشە لە هێشووەكانی سروودی ویژدان دەكەن
خوێنی بێ تاوان دەبینم
شمشێرگەلی بێ بەشی دەیڕێژن
منداڵانی بێ باوك دەبینم
جورجگەلی دڕندە لە پێش خۆیان دەدەن
كەنیشكەیلی پاگیزەو لاواز دەبینم
دەستگەلی خەڵتان بە خوێنی ڕۆژگار
دەستگیریان دەكەن
لە زیندانیان توند دەكەن
ئابڕوویان دەبەن
با ئەو شمشێرانە تێكشكێن
با ئەو ڕدێنانە بسووتێن
با ئەو مێشكانە لەناو بچن
با ئەو دەستانەیش ئیفلیج بن!!
16-11-2013

شمشێرگەلی ژەنگاوی

دواترین دەستکاریکردن لەسەر دوو شەممە, 09 کانونی یەکەم 2019 11:29
© 2017 Hawler