تشرینی یەکەم 17, 2019

ژیان چەند هەناسەیەکا کوژەکە
*
تو چەند زەلامەکێ ئاشۆپی بووی
نە تە ڕەنگێ بارانێ دا و نەیێ ئاخێ!
*
من دلێ خوە
ب چوار پەیڤێن عەشقێ و هەمبێزەکێ فرۆت.
*
ل هەر جهەکی خەمەک یا هەی
*
ل سەر هەر کاغەزەکێ مۆرا ژانەکێ یا هەی
*
ئەز ئەو ژنم
یا ب پەیڤان زەلامەکی دئافرینیت.
*
ئەزەکا فریشتە
ل پشت تەیەکێ خودا، خوە ناڤەشێریت
*
ل ژڤانێ چ قەهوەیان نینم
دێ هەردوو لێڤێن تە ڤەخۆم
*
بۆ من بە
وەکو وان دەمێن تو یێ من و ئەز نەی!
*
عەشقا تە خەونەکە
ژ هەر تشتی درەڤیت و قەستا من دکەت!
*
ئەو. کوشتاران ب سەرێ مە دئینن و
ئەم. خوە دئازادیێدا دهەتکینن!
*
عەشقا زەلامەکی
شیا من بکەت عاشقا رۆژێ و چیا!
*
ل پشت هەر چیایەکێ ب تنێ..
حەسرەتێن من دبنە داستان.
*
رێکەکێ ئەز ئینامە ژیانێ و
ژانەکێ ئەز هاڤێتمە رێکەکێ!
*
ئەز ئەوم، ئەوا ل داوی یا هەمی چوونێن تە
ب ژڤانێ هاتنا تە، چاڤەرێ دمینیت.
*
ئەو چما ئەم ژیانێ ب کوشتنێ دفرۆشین!؟
*
دێ وەغەرەکێ ب بێدەنگیا مەزن دگەل تە خوازم!
*
نە تو وێرانکەری د چوونا خوەدا
نە ژی ئاڤاکەری د هاتنا خوەدا
ئەڤجا بۆچییە ببم شەرکەر!
*
نە تو ب هاتنا خوە دبیە پەیامبەر
نە ژی ب چوونا خوە دبیە رزگارکەر
*
ئەز نە هند یێ وێرەکم
ژ تە برەڤم و بەرەف تە بهێم.
*
ئەو رێکێن ئەز بۆ چوونا تە دگرم
هەمی دچنە هاتنێ!
*
عەشق نە پێکڤە مانە، بەلکی پێکڤە مرنە!
*
بسکێن من یێن سۆر
ب رەنگێ خەنایێ رەنگ نەبووینە
ئەو پەلێن بیردانکەکا تژینە ژ برینێن من.
*
ئەز ژنەک بووم ژ نفشێ خەونان
*
بەرێ خوە بدە روویێن من یێن قورمچی
ئەو ب بۆرینا رۆژان تێک نەچووینە
بەلکی ب حەسرەتا ماچەکا ب ڤیان ژ نافچوون.
*
عەشق ژانە ب رەنگێ ژیانێ
عەشق مرنە ب روویێ مانێ
*
ئەگەر عەشقا تە وێستگەهەک نەبیت
ژبۆ چاڤەرێبوونێ. چەوا عەشقە؟!
*
ئەی جوانترین داگیرکرنا بێ شەر
تە ل ناڤ وەڵاتێ من چەند گاڤ هاڤێتینە؟
*
ئەز نزانم کیژان رۆژێ
خاترا خوە ژ هەلاتنا من خواستن
*
رێڤینکەکم ب سەربۆرەکا سادە و چانتکەکێ ڤاڵا
ل رێکا ژانان ل مانێ دگەڕم.
*
عەشق ئازادییە نەک بەندایەتی.
*
ئەز گازندا ژ چ بکەم
ئەگەر من تو کربیە خودا
*
وەرە دا د هەمبێزا تەدا
ل خودایێ مرۆڤان بگەڕم!
*
من قەت نەبهیستیە
ل سەمتا شەڕی، هیڤی شین ببن!
*
عەشقێ ئەز یا بێنڤێژ کریم!
*
عەشقا من بۆ چییە
ئەگەر شفشێن قەفەسا نە بژکینیت و
ل پەی مامزان ل چیایان نەبەزیت!؟
*
پەیامبەرووو.. هێدی گاڤێن خوە پاڤێژە
ل شوینا گاڤێن تە، گیایێ ئاشتیێ شین دبیت!
*
تو ئەو پەیامبەری
یێ ژپێخەمەت عەشقەکێ، عاشقەکێ دسوژی!
*
تژی چانتا من تۆڤێ گولایە
لێ ل پەی وەڵاتێ گولستانان نابەزم
*
ئێدی دیتنا گولان ژی
هاتنان. ل من دکەنە چوون!
*
دەمێ تو ڤەدگەری، ئاگری دگەل خوە بینە.

 

کەوسەر شەوکەت
هەلبژاردن: عارف حیتۆ

© 2017 Hawler