تشرینی یەکەم 17, 2019

گوناحن پیاوە چاو بزەکان                 
ژنە شەرمنەکان و
منداڵە هار و هاجەکان
گوناحن بێوژنە ڕەشپۆشەکان و
گەورە کچە بێ ئومێدەکان
گوناحن ئەو شاعیرە شێتانەی
دیوانەکانیان پڕە لە شیعری عەشق و
تامی عەشقیشیان نەکردووە
گوناحن ئەو کچ و کوڕانەی
شەو تا بەیانی و
بەیانیش تا ئێوارە
بە خەیاڵی ماچی دڵدارەکانییان مەستن و
دەمیشیان ناگاتە لێوی یار
مرۆڤەکانی ئەم نیشتیمانە
لەناو گۆمی گوناحبووندا
گەمە دەکەن
هەمیشە دەمی نزایان کراوەیە و
دەستی دووعایان ڕوو لە ئاسمانە
تا خودا لە گوناحەکانیان خۆش بێت
ئەوان،
پیاوە چاو بزەکان و
ژنە شەرمنەکان و
منداڵە هارو هاجەکان و
بێوەژنە ڕەشپۆشەکان و
شاعیرە شێتەکان و
کچ و کوڕە عاشقەکانیش
نازانن
ئەوان هیچیان گوناحکار نین
نازانن
هەر هەموویان گوناحن و
لەناو گۆمی گوناحیدا ونبوون
ون ون ون ون ون ...!

                       ٣٠/٩ ٢٠١٩

 

 خولیا حوسێن

© 2017 Hawler