ئەیلول 21, 2019

دوای پێنج ساڵ بێدەنگی و دوورە پەرێزی خاتوو كەژاڵ ئەحمەدی شاعیر بە بەرهەمێكی شیعری جوان و بەرچاو هاتەوە مەیدان و خۆی پێمان ئاشنا كردەوە، ئەویش چاپ و بڵاوكردنەوەی كتێبی (زمانی باڵندەم دەزانی) بوو كە بریتیە لە كۆمەڵە شیعرێكی تەڕ و ناسك و ناونیشانی ئەو كتێبەش سێیەمین شیعرە لە كتێبەكەدا، هەر لەمبارەیەوە دەزگای ڕۆشنبیری جەمال عیرفان لە سلێمانی كۆڕێكی بۆ ناساندنی ئەو كتێبە ساز كرد كە 1000 دانەی لە چاپخانەی كارۆ لە سلێمانی لێ چاپكراوە، كەژاڵ لە مبارەیەوە دەڵێ: خۆشحاڵم دوای پێنج ساڵ بێدەنگی دەستم پێكردەوە، چونكە كە باسی باڵندە دەكەین ئازادیمان بیر دەكەوێتەوە، پاكی و فڕین و میهرەبانیمان بیر دەكەوێتەوە ئەو 24 شیعرە لە كۆمەڵێ وێستگەدا ڕادەوەستن لە ژیان و دەوروبەر و ئینسانی كورد ڕادەمێنن، كەژاڵ دەڵێ: من بە زمانی كچێك قسە دەكەم كە لە وڵاتەكەی مندا دەكوژرێن یان بە كۆیلە دەبرێن وەك ژنە ئێزیدیەكان، دواتر سەبارەت بە گەورەیی شیعر دەڵێ: شیعر زۆر شتە بۆ من، دەتوانم بڵێم ژیانی منە، ئەگەر شیعرم لێ بسەنی واتە ژیانم لێ دەسەنی، بەڕاستی شتێكی زۆر گرینگە ئەو كاتەی شاعیرێك دێت و بە سووربوونێكەوە بەرەنگاری هەموو بارە باوەكان دەبێتەوە و پێمان دەڵێت كەس وەك خۆم مێژووی خۆم نانووسێتەوە، بۆیە كەژاڵ ئەحمەد ئەو خانمە شاعیرەیە خۆی خۆی پێدەگەیەنێت و دەبێتە دەنگێكی ڕاستەقینە و ڕەسەنی ژنی كورد، هەر بۆ مێژوو دەڵێین ڕۆژنامەیەكی ناوداری نەرویژی لەسەر خاتوو كەژاڵ دەنووسێت كەژاڵ ئەحمەد شیعری بەتوانا دەنووسێت كە كار لەسەر ژیان و ڕامیاری و مێژوو و ئایین و ئەڤین دەكات لەو كۆمەڵگەیەی كە تیایدا دەژی، شاعیر ئەگەر نەتوانێت بەردەوام خۆی نوژەن بكاتەوە و هەمیشە لەگەڵ ڕەوتە نوێیەكاندا گوزەر نەكات ئەوا هیچ گومانێكی تێدا نیە هەنگاوەكانی ڕووە و خانەی لەبیرچوونەوە دەنێت، بەڵام بۆ شاعیرێكی وەك كەژاڵ بەردەوام گیانی فیربوون و پەلهاویشتن بۆ نوێگەری و گەڕان بەدوای داهێناندا بەدی دەكرێت، ماوەتەوە بڵێین كەژاڵ ئەحمەدی شاعیر لە ساڵی 1968 لە شاری كەركوك لە دایك بوە و ساڵی 1986یەكەم شیعری خۆی بەناوی (لەلای ئێمە) بڵاوكردۆتەوە، جگە لە نووسنی شیعر ماوەیەكی زۆریش لە بواری ڕۆژنامەنووسیدا كاریكردوە و ماوەیەك سەرنووسەری گۆڤاری (پشوو) بوە و خاوەنی چەندین كتێبی چاپكراوی دیكەیە بەناوەكانی دەربەندی بەرمۆدا، وتەكانی وتن، قاوەیەك لەگەڵ ئەودا، ئاوێنەم شكاند، دیوانی كەژاڵ ئەحمەد، من دەبێت خۆم بسمیل بكەم، كتێبی ژن، ناسنامەی بكوژەكان، سەرباری هەموو ئەوانە شیعرەكانی ئەو شاعیرە بۆ چەندین زمانی بێگانە وەرگێردراون وەك زمانی ئینگلیزی و نەرویژی و عەرەبی و فارسی و ئەڵمانی و توركی و سویدی، ئەوە جگە لەوەی ژمارەیەكی بەرچاوی شیعری كەژاڵ وەرگێڕدراونەتە سەر شێوەزارەكانی دیكەی كوردی.

 

محەمەد سەعید - هه‌ولێر

© 2017 Hawler