نیسان 01, 2020

سیروانی نوێ و ده‌ربه‌ندیخان پێشه‌نگیان گرتووه‌ و له‌ گه‌یشتن به‌ خولی نایاب نزیكن

به‌ ئه‌نجامدانی 2 یاری یارییه‌كانی گه‌ڕی دووه‌می قۆناخی كۆتایی خولی لاوانی پله‌ یه‌كی كوردستان كۆتاییان هات، تیایدا یانه‌ی ئاراراتی كه‌ له‌ یاری یه‌كه‌مدا توشی شكست هاتبوو له‌سه‌ر یاریگه‌ی خۆی به‌ سێ گۆڵ به‌رانبه‌ر به‌ دوو گۆڵ له‌ یانه‌ی هه‌ڵۆی برده‌وه‌ و گه‌ڕایه‌وه‌ ڕكه‌به‌ری یانه‌كانی تر، له‌ یاری لوتكه‌یدشدا هه‌ردوو یانه‌ی ده‌ربه‌ندیخان و سیروانی نوێ له‌سه‌ر یاریگه‌ی زانكۆی جیهان له‌ هه‌ولێر به‌بێ گۆڵ یه‌كسان بوون و به‌ كۆكردنه‌وه‌ی 4 خاڵ پله‌كانی یه‌كه‌م و دووه‌میان گرتووه‌ و ئه‌مڕۆیش به‌ ئه‌نجامدانی دوو یاری یارییه‌كای گه‌ڕی سێیه‌م و كۆتایی به‌ڕێوه‌ده‌چێت ناسنامه‌ی پاڵه‌وانی خوله‌كه‌ ئاشكرا ده‌بێت.

دوای ته‌واو بوونی یارییه‌كانی قۆناخی یه‌كه‌م هه‌رچوار یانه‌ی (ئارارات، سیروانی نوێ، ده‌ربه‌ندیخان، هه‌ڵۆ) گه‌یشتنه‌ قۆناخی كۆتایی، دوای ئه‌نجامدانی كۆبونه‌وه‌ی هونه‌ریش بڕیاردرا یارییه‌كان له‌ شارۆچكه‌ی پیرمام و هه‌ولێر دوو ڕۆژ جارێك به‌ڕێوه‌بچن، دوو گه‌ڕ له‌ یارییه‌كان به‌ڕێوه‌چووه‌ و تیایدا یانه‌كانی سیروانی نوێ و ده‌ربه‌دیخان 4 خاڵیان هه‌یه‌ و پله‌كانی یه‌كه‌م و دووه‌میان گرتووه‌ و ئه‌مڕۆیش یارییه‌كانی گه‌ڕی سێیه‌م به‌ڕێوه‌ده‌چێت و كۆتاییی به‌ یارییه‌كانی چوارگۆشه‌ی زێڕین دێت و ناسنامه‌ی پاڵه‌وانی خوله‌كه‌یش ئاشكرا ده‌بێت، هه‌روه‌ها ئه‌و دوو یانه‌یه‌ ده‌ناسرێن كه‌ له‌ وه‌رزی داهاتوودا ده‌گه‌نه‌ ڕیزی لاوانی نایابی كوردستان.
ئه‌نجامی یارییه‌كانی گه‌ڕی یه‌كه‌م
ئارارات ×سیروانی نوێ(0-2)
هه‌ڵۆ × ده‌ربه‌ندیخان (2-3)
ئه‌نجامی یارییه‌كانی گه‌ڕی دووه‌‌م
سیروانی نوێ × ده‌ربه‌ندیخان (0-0)
ئارارات × هه‌ڵۆ (3-2)
ڕیزبه‌ندی یانه‌كان دوای ئه‌نجامدانی دوو گه‌ڕ له‌ قۆناخی كۆتایی
1- سیروانی نوێ 4 خاڵ
2- ده‌ربه‌ندیخان 4 خاڵ
3- ئارارات 3 خاڵ
4- هه‌ڵۆ 0 خاڵ
خشته‌ی یارییه‌كانی گه‌ڕی سێیه‌م و كۆتایی
هه‌ڵۆ × سیروانی نوێ
ئارارات × ده‌ربه‌ندیخان
یانه‌ی سیروانی نوێ نزیكترین یانه‌یه‌ بۆ ئه‌وه‌ی ببێته‌ پاڵه‌وان و به‌ كۆكردنه‌وه‌ی 4 خاڵ و به‌ جیاوازی گۆڵ له‌گه‌ڵ یانه‌ی ده‌ربه‌ندیخان له‌ پله‌ی یه‌كه‌م دێت، ئه‌گه‌ر ئه‌مڕۆ ‌سیروانی نوێ له‌ هه‌ڵۆ بباته‌وه‌ و ئارارات و ده‌ربه‌ندیخان یه‌كسان بن یان ئارارات براوه‌ بێت سیروانی نوێ ده‌بێته‌ پاڵه‌وان، ئه‌گه‌ر سیروانی نوێ و هه‌ڵۆ یه‌كسان بن ئارارات یان ده‌ربه‌ندیخان كامیان بیباته‌وه‌ ده‌بێت به‌ پاڵه‌وان، ئه‌گه‌ر ئارارات له‌ ده‌ربه‌ندیخان بباته‌وه‌ به‌ مه‌رجێك سیروانی نوێ له‌ هه‌ڵۆ نه‌باته‌وه‌ ئارارات ده‌بێته‌ پاڵه‌وان، له‌ ئه‌گه‌ری یه‌كسان بوونی هه‌ردوو یارییه‌كه‌یش جیاوازی گۆڵ ناسنامه‌ی پاڵه‌وان ئاشكرا ده‌كات، هه‌روه‌ها هه‌ردوو یانه‌ی خاوه‌ن پله‌كانی یه‌كه‌م دووه‌م سه‌رده‌وكه‌ن بۆ ڕیزی لاوانی یانه‌ نایابه‌كان بۆ وه‌رزی 2018- 2019
بۆ زانین یارییه‌كانی خولی پله‌ یه‌كی لاوان به‌شێوازی خول و به‌ یه‌ك قۆناخ به‌ به‌شداری 12 یانه‌ به‌ڕێوه‌ چوو، كه‌ به‌ پێی ناوچه‌ی جوگرافی به‌سه‌ر دوو كۆمه‌ڵه‌ دابه‌ش كرابوون، له‌ هه‌ر كۆمه‌ڵه‌یه‌كیش دوو یانه‌ سه‌ر‌كه‌وتن بۆ قۆناخی كۆتایی.
 له‌ چوار گۆشه‌ی زێڕین هه‌ر چوار یانه‌كه‌ به‌ یه‌ك قۆناخ و به‌ شێوه‌ی خول له‌گه‌ڵ یه‌كتر یارییان كرد و كام یانه‌ زۆرترین خاڵ كۆبكاته‌وه‌ ده‌بێته‌ پاڵه‌وانی خوله‌كه‌، دوای دورخستنه‌وه‌ی یانه‌ی شه‌هیدانیش له‌لایه‌ن یه‌كیه‌تی تۆپی پێی كوردستان، یانه‌ی سیروانی شاره‌زوور هاته‌ جێگه‌ی یانه‌ی شه‌هیدان و له‌ جێگه‌ی ئه‌و یانه‌یه‌ یاری ده‌كات.

 

هێمن ئەسكەندەر - هەولێر

© 2017 Hawler