نیسان 07, 2020

لە راپۆرتێكی مەیدانیدا لە چالاكی و گرفتەكانی ناوەندی وەرزش و لاوانی هەولێر دەكۆڵێتەوە

لە ماوەی ڕابردوو دا بەهۆی بوونی گرفتی دارای لە زۆربەی ناوەندەكانی وەرزش و لاوان، تا رادەیەكی زۆر چالاكییەكان كەم ببونەوە و گەیشتە رادەیەك بەشێكیان لە كارەكانیان بوەستن، كەچی لە ساڵانی پێشوودا شوێنی پێگەیاندنی دەیان یاریزانی باش و بەتوانابووە لە یارییە جۆراو جۆرەكان دا، كە هەندێك جار سەرچاوەی سەركی دابینكردنی یاریزانان بووە بە تایبەت لە سەر ئاستی لاوان، بەڵام بەهۆی كەمی توانای دارای و نەبوونی كادری پێویست لەم دوایانە نەتوانراوە وەك پێویست بەرهەمیان هەبێت، بەڵام ناوەندی وەرزش و لاوانی هەولێر، نمونەیەكی جوانی پێگەیاندنی لەو ماوەیەدا پێشكەش كردووە، رۆژنامەی هەولێر لەم راپۆرتە دا لە سەرجەم چالاكی و كێشە و گرفتەكانی ئەم ناوەندە دەكۆڵێتەوە.

لە ڕووی دەروونی و پەروەردەییە و فێر دەكرێن
ئەحمەد شوكر ناوەندی وەرزش و لاوانی هەولێر و هەڵگری بڕوانامەی ماستەرە و یاریزانی پێشووی یانەی هەولێر بووە لە بەشێك لە یانەكانی دیكەی كوردستانیش یاری كردووە، لەمبارەیەوە دەڵێت: من ماوەی شەش مانگە ئەم ئەركەم پێسپێردراوە، لە ئێستا دا و چەند ساڵێك پێش ئێستاش بەهۆی نەبوونی پاڵپشتی دارایی نەتوانرا وەك ساڵانی زووتر كار بكرێت، بەڵام ئێمە بە هەوڵی خۆمان و خۆشەویستیمان بۆ بەشداربووان و یاریزانانی ئەم ناوەندە درێخیمان نەكرد و بەردەوام بووین بە پێی توانای خۆمان خولمان بۆ كردوونەوە، تاوەكو گەنج و لاوەكانی هەولێر پەناگەیەك هەبێت تیادا خەونەكانیان بهێنە دی، بێ وەچان لەو ماوەیە كارمان كردووە، زۆرترین بەشداربوومان هەبووە لە ناوەندەكە دا.
ئەحمەد شوكر دەشڵێت: جگە لە لایەنی فێركاری زۆرر گرینگی بە لایەنی پەروەردەی و دەروونی دەدەین، تاوەكو گەنج و لاوی كوردستان بۆكاری خراپە و توندوتیژی فریو نەدرێن و نەبنە جێبەجێكاری پلانە خراپەكانی توندڕەوەكان بۆ كاری خراپ بەكار بهێنرێن.

ئامارەكانی شەش مانگی ڕابردووی ئەم ناوەندە سەرسوڕهێنەرە
ئەحمەد شوكر سەرجەم ئەم داتا و ئامار و زانیارییانەی 6 مانگی رابردووی بۆ هەولێر خستە ڕوو، لەمبارەیەوە دەڵێت: نزیكەی (800) بەشداربوومان هەبووە لە سەرجەم خولەكان، بۆ نمونە (تۆپی پێ) لە سێ تیپ پێكهاتووە، فێرگەی ناوەند و تازەپێگەشتووان و لاوان، (جیمناستیك) هەیە بۆ هەردوو رەگەزەكە، (تایكواندۆ)، یاری (مشتەكۆڵە) كە پاڵەوانی عێراق لە ساڵی (2018) لەسەر ئاستی لاوان یاریزانی ئێمەبوو بەناوی ( بەهێز ئیسماعیل)، ( تێنسی سەر زەوی)، یاری (پاركۆر و فڕی ڕەن) كە یارییەكی تازەیە و یەكەم هۆلی ئەم یارییەمان هەیە لەسەر ئاستی هەولێر، جگە لەو چالاكییە وەرزشیانە ئێمە خولی فێربوونی زمانیشمان هەیە، بەتایبەت بۆ زمانەكانی (ئینگلیزی، عەرەبی و كوردی) هەتا خولی نەخوێندەواریشمان كردۆتەوە، خولی سەرتاشین و كۆمپیۆتەر و میوزیك و وێنەكێشیمان هەبووە، دەیان لاوی ئەم شارە سوودمەند بوونە.
ئەحمەد شوكر گوتیشی: سەرەرای ئەوەی ئێمە بەردەوام خەریكی كردنەوەی خولی جۆراو جۆرین، بەڵام كێشەی كەمی كادری وەرزشی و تایبەتمان هەیە، بەڵام پەنا بەخوا بەردەوام دەبین لە خزمەتكردنی كور و كچە نازدارەكانی شاری هەولێر.

یەیوەندی ناوەندی هەولێر لەگەڵ رێكخراوەكانی دیكە
ئەحمەد شوكر ناوەندی وەرزش و لاوانی هەولێر لە بەشێكی دیكەی قسەكانی جەختی لەوە كردەوە كە ناوەندەكەیان پەیوەندییەكی بەهێزی لەگەڵ زۆربەی رێكخراوە مەدەنیەكان هەیە، بەتایبەتی لەگەلأ رێكخراوی (یونسێف)، بەوپێیەی لە هەندێ چالاكی و خول دا هاوكارییان دەكات بەتایبەت بە بڕێكی كەمی مادی، كە لەم كاتە دا بۆ ئەوان زۆر گرینگە.

30 سالأ كارمەندی ئەو ناوەندەیە و گلەیی لە نەبوونی كاردی تایبەت دەكات
عەبدولرەحمان ئادەم نزیكەی (30) ساڵە كارمەندی ئەم ناوەندەیە و بەرپرسی كارگێڕیە، دەرباری گرفتەكان و بەراوردكردنی چالاكیەكان بە رۆژنامەی هەولێری راگەیاند كە كێشەی سەركی ئەوان نەبوونی كادری تایبەتە لە ناوەدەكەیان.
دەشڵێت: زۆر جار تیپەكان بێ راهێنەر و سەرپەرشتیار دەمێنەوە، پێشی ئەم قەیرانە دارایە لە لایەن حكومەتەوە، بە كادری وانەبێژ پاڵپشتیمان دەكرا، بەڵام لەوەتەی (2014) ئەوەش راگیراوە ئەمەش بە كێشە و خراپ بەسەرماندا شكایەوە، بەڵام بە هیمەتی خوای گەورە بەردەوام بووینە لە چالاكیەكان، هەرچەند وەك سەردەمانی زوو نابێت، چونكە پێشووتر پاڵەوانیەتی وەرزشی گەورە دەكرایەوە لەسەر ئاستی شارەكان و بەشێوەی فەرمی بەرێوە دەچوون، چەندین یاریزانمان لە یانەكان وەردەگیران، ساڵی وا هەبووە تیپێك بە تەواوی ستافی یاریزان و راهێنەرانەوە چوونەتە یانەكان.

پێویستیان بە راهێنەری تایبەتە بۆ یەكە وەرزشیەكان
سیپان غازی، بەرپرسی بەشی چالاكییەكانی ناوەندی وەرزش و لاوانی هەولێر، دەربارەی جۆر و چۆنیەتی چالاكییەكانی ناوەند بە رۆژنامەی هەولێری راگەیاند كە ئەوان رۆژانە بە هەر شێوەیەك بێت مەشق و راهێنانەكانیان دەكەن، دەشڵێت: بەڵام ئەگەر بمانەوێ بە شێوەیەكی باشتر و چاكتر كارەكان ئەنجام بدەین پێویستمان دابینكردنی راهێنەرە بۆ تیپە وەرزشیەكان، هەرچەند هەوڵمان داوە بە پێی توانای خۆمان پێداویستی رۆژانە و راهێنەر دابین بكەین، بەڵام بەشێوەیەكی بنەڕەتی كێشەكانمان چارەسەر نابن، ئاستی چالاكیەكانیش لەنێو سنووری بەرێوەبەرایەتی لاوانی هەولێرە، وە ماوەكەشی كەمە، لە چەند رۆژێك تێپەر ناكات، ئەمەش حەزو ئامانجی ئێمە نیە، چونكە دەمانەوێی زۆر بەشێوەیەكی باشتر و فراوانتر كارەكانمان ئەنجام بدەین.

عەلی پشتیوان، دەمەوێت لەم ناوەندەوە بگەمە خەونی خۆم
عەلی پشتیوان یەكێكە لە بەشداربووەكان، لە لێدوانێكدا بۆ رۆژنامەی هەولێر ئاماژەی بۆ ئەوە كرد كە ئەم شوێنە تاڕادەیەكی زۆر خولیایەكانی ئەوی هێناوەتە دی، دەشڵێت: من گەنجێكی ئەم وڵاتەم زۆر خولیای هونەریم هەبووە، بەڵام هیچ شوێنێك نەبووە تا ڕووی تێبكەم و تا پەرە بە هونەرەكەم بدەم، سوپاس بۆ خوا ئێستا ئەم شوێنەم دەستكەوت، كە بتوانم خەونەكانم لێبهێنەم دی، كە ناوەندی وەرزش و لاوانی هەولێرە، وە زۆر هاوكاریان كردووم، شتی زۆریان فێركردووم، بەراستی هیچ كەمتەرخەمیان نەبووە بەرامبەر لاو گەنجانی هەولێر، زۆر سوپاسیان دەكەم، هیوادارم بەردەوام بن لە خولەكان، چونكە سوودی زۆرە بۆ گەنجانی وڵات.

دەیەوێت بە بێتە شانۆكارێكی مەزن
ئەحمەد كاوە یەكێك لە بەشداربووانی خولەكانی ئەم ناوەندە ناخی خۆی بۆ رۆژنامەی هەولێر هەڵرشت و هێمای بۆ ئەوە كرد كە خەونی بۆ بوون بە شانۆكارێكی گەورە هەیە، دەشڵێت: دەمەوێت لە رێگای ئەم ناوەندەوە زۆر شت فێربوومەوە و دەمەوێت بە ئاوات و خەونەكەم بگەم و بەرەو فێستیڤاڵە نێودەوڵەتییەكان هەنگاو بنێم، حەزدەكەم لە رێگای بەهرەكەمەوە، سەرجەم ئاواتەكانی ژیانم بێنمەدی، سوپاسی مامۆستایانی ناوەندی هەولێر دەكەم، كە زۆر لەگەڵمان هیلاك و ماندوون.

 

بارزان ئەكرەم - هەولێر

© 2017 Hawler