کانونی یەکەم 10, 2019

زێرەڤانی پێشەنگە و سێشه‌ممه‌ پاڵه‌وانی ئه‌م وه‌رزه‌ی خولی نایاب ئاشكرا دەبێت

ته‌نیا یه‌ك گه‌ڕ ماوه‌و یارییه‌كانی ئه‌م وه‌رزه‌ی خولی نایابی كوردستان كۆتاییان دێت، یانه‌كانی زێره‌ڤانی و برایه‌تیش شه‌ڕی بوون به‌ پاڵه‌وان ده‌كه‌ن، هه‌ردوو یانه‌ 28 خاڵیان هه‌یه‌ و زێره‌ڤانی به‌ جیاوازیی چوار گۆڵ له‌ پله‌ی یه‌كه‌م دێت، سێشه‌ممه‌ له‌ دوایین گه‌ڕدا پاڵه‌وانی ئه‌م وه‌رزه‌ ده‌رده‌كه‌وێت، وه‌ك ڕۆژنامه‌ی هه‌ولێر تیشك ده‌خه‌ینه‌ سه‌ر ئه‌گه‌ره‌كانی بوون به‌ پاڵه‌وانی هه‌ردوو یانه‌.

كێ ده‌بێته‌ پاڵه‌وانی ئه‌م وه‌رزه‌؟
به‌ ئه‌نجامدانی 4 یاری ڕۆژی سێشه‌ممه‌ كۆتایی به‌ یارییه‌كانی ئه‌م وه‌رزه‌ی خولی نایاب دێت، تیایدا هه‌ردوو یانه‌ی زێره‌ڤانی و برایه‌تی له‌دواین گه‌ڕدا ڕكه‌به‌ری له‌سه‌ر ناسناوی خوله‌كه‌ ده‌كه‌ن كه‌ تا ئێستا له‌ پله‌كانی یه‌كه‌م و دووه‌می خوله‌كه‌ دێن، زێره‌ڤانی به‌ جیاوازی 4 گۆڵ له‌ پله‌ی یه‌كه‌مه‌، له‌ دواین یاریدا میوانداری پێشمه‌رگه‌ی هه‌ولێری پاڵه‌وانی وه‌رزی ڕابردووی خوله‌كه‌ ده‌كات كه‌ به‌ 16 خاڵ خانه‌ی حه‌وته‌می گرتووه‌، زێره‌ڤانی به‌ بردنه‌وه‌ به‌ هه‌ر ئه‌نجامێك ده‌بێته‌ پاڵه‌وان به‌ مه‌رجێك برایه‌تی به‌ بردنه‌وه‌ له‌ نه‌ورۆز له‌ 5 گۆڵ زیاتر تۆمار نه‌كات، یه‌كسان بوونی زێره‌ڤانی له‌گه‌ڵ پێشمه‌رگه‌ و بردنه‌وه‌ی برایه‌تی له‌ نه‌ورۆز یانه‌ی برایه‌تی ده‌بێته‌ پاڵه‌وانی خوله‌كه‌، ئه‌گه‌ر زێره‌ڤانی و پێشمه‌رگه‌ و نه‌ورۆز و برایه‌تی یه‌كسان بوون، جیاوازی گۆڵ پاڵه‌وان دیاری ده‌كات، یانه‌ی هه‌ندرێنیش كه‌ به‌ 25 خاڵ له‌ پله‌ی سێیه‌م دێت هیوایه‌كی زۆر كه‌می ماوه‌ تا ناسناوی ئه‌م وه‌رزه‌ مسۆگه‌ر بكات، بردنه‌وه‌ی هه‌ندرێن له‌ شێروانه‌ به‌ زیاتر له‌ 9 گۆڵ و دۆڕانی برایه‌تی و زێره‌ڤانی هه‌ندرێن ده‌بێته‌ پاڵه‌وان، ئه‌مه‌یش تاڕاده‌یه‌كی زۆر ئه‌سته‌مه‌. ‌

كام یانه‌ داده‌به‌زێت بۆ ڕیزی یانه‌ پله‌ یه‌كه‌كان؟
ڕكه‌به‌ری دابه‌زینیش بۆ ڕیزی یانه‌ پله‌ یه‌كه‌كان له‌ نێوان 3 یانه‌ ماوه‌، زاخۆ به‌ بردنه‌وه‌ی له‌ ئارارات و به‌ كۆكردنه‌وه‌ی 18 خاڵ و به‌فه‌رمی مانه‌وه‌ی خۆی له‌ خوله‌كه‌ ڕاگه‌یاند، ئه‌گه‌رچی له‌ دواین گه‌ڕیشدا یاری ناكات و پشووه‌، ڕكه‌به‌رییه‌كه‌ له‌ نێوان یانه‌كانی شێروانه‌ و نه‌ورۆزه‌ به‌ ڕێژه‌یه‌كی زیاتره‌ له‌ پێشمه‌رگه‌ كه‌ 16 خاڵی هه‌یه‌ و بارودۆخی له‌ هه‌ردوو یانه‌كه‌ باشتره‌، نه‌ورۆز له‌ خانه‌ی هه‌شته‌مه‌ و 15 خاڵی هه‌یه‌، له‌ دوایین یاریدا له‌گه‌ڵ برایه‌تی پێویستی به‌ 1 خاڵه‌ تا له‌ خوله‌كه‌ بمێنێته‌وه‌، له‌م یاریه‌یشدا ئه‌ركی ئاسان نابێت، چونكه‌ برایه‌تی شه‌ڕی ناسناوه‌كه‌ ده‌كات و گه‌ره‌كیه‌تی به‌ جیاوازی ژماره‌یه‌كی زۆری گۆڵ له‌ نه‌ورۆز بباته‌وه‌، دۆڕانی نه‌ورۆز و بردنه‌وه‌ی شێروانه‌ له‌ هه‌ندرێن نه‌ورۆز داده‌به‌زێ بۆ ڕیزی یانه‌ پله‌ یه‌كه‌كان، یانه‌ی شێروانه‌یش كه‌ به‌ 13 خاڵ خانه‌ی كۆتایی گرتووه‌ له‌ دۆخێكی خراپدایه‌ و له‌ دواین یاریدا پێویستی به‌وه‌ هه‌یه‌ كه‌ به‌ ئه‌نجامێكی گه‌وره‌ له‌ هه‌ندرێن بباته‌وه‌ و به‌ سوود وه‌رگرتن له ئه‌نجامی یارییه‌كانی تر مانه‌وه‌ له‌ خوله‌كه‌ مسۆگه‌ر ده‌كات، پێشمه‌رگه‌ی هه‌ولێریش ئه‌گه‌ر له‌گه‌ڵ زێره‌ڤانی بدۆڕێت و شێروانه‌ به‌ زیاتر له‌ 8 گۆڵ له‌ هه‌ندرێن بباته‌وه‌ پێشمه‌رگه‌ داده‌به‌زێت كه‌ ئه‌مه‌یش تا ڕاده‌یه‌كی زۆر ئه‌سته‌مه‌.‌

ئه‌نجامی یارییه‌كانی گه‌ڕی حه‌ڤده‌هه‌م
پێشمه‌رگه‌ی هه‌ولێر × شێروانه‌ (2-0)
هه‌ولێر × زێره‌ڤانی‌ (1-3)
هه‌ندرێن × نه‌ورۆز (0-0)
زاخۆ × ئارارات (4-3)
یانه‌ی برایه‌تی چاوه‌ڕوان بوو

ڕیزبه‌ندی یانه‌كان دوای یارییه‌كانی گه‌ڕی حه‌ڤده‌یه‌م
1- زێره‌ڤانی 28 خاڵ
2- برایه‌تی 28 خاڵ
3- هه‌ندرێن 25 خاڵ
4- ئارارات 20 خاڵ
5- هه‌ولێر 19 خاڵ
6- زاخۆ 18 خاڵ
7- پێشمه‌رگه‌ی هه‌ولێر 16 خاڵ
8- نه‌ورۆز‌‌ 15 خاڵ
9- شێروانه‌ 13 خاڵ
ڕیزبه‌ندی گۆڵكارانی خوله‌كه‌ دوای یارییه‌كانی گه‌ڕی حه‌ڤده‌هه‌م
‌1- تیاگۆ ئه‌میڕاڵ یانه‌ی زێره‌ڤانی 10 گۆڵ
2- ئامانج ئه‌كره‌م یانه‌ی هه‌ندرێن 7 گۆڵ
3- ئه‌یوب ئه‌یاد یانه‌ی زێره‌ڤانی 5 گۆڵ
4- عه‌لی عه‌زیز یانه‌ی ئارارات 5 گۆڵ
5- ئیفا ئیمانیۆل یانه‌ی ئارارات 5 گۆڵ
6- دانا عوسمان یانه‌ی هه‌ولێر 4 گۆڵ
خشته‌ی یارییه‌كانی گه‌ڕی هه‌ژده‌هه‌م و كۆتایی
شێروانه‌ × هه‌ندرێن ـ یاریگه‌ی شێروانه‌
ئارارات × هه‌ولێر ـ یاریگه‌ی ئارارات
نه‌ورۆز × برایه‌تی ـ یاریگه‌ی زانكۆ
زێره‌ڤانی × پێشمه‌رگه‌ی هه‌ولێر ـ یاریگه‌ی زێره‌ڤانی
یانه‌ی زاخۆ چاوه‌ڕوانه
ئاماره‌كانی گه‌ڕی حه‌ڤده‌یه‌م
له‌م گه‌ڕه‌دا له‌ كۆی 4 یاریدا 13 گۆڵ تۆمار كران، به‌ ڕێژه‌ی 3،2 گۆڵ بۆ هه‌ر یارییه‌ك، ئه‌م ڕێژه‌یه‌یش ڕێژه‌یه‌كی زۆره‌و زیاتره‌ له‌ گه‌ڕه‌كانی ڕابردوو، نزیك بوونه‌وه یش‌ له‌ كۆتای خوله‌كه‌ هۆكار بوو بۆ ئه‌وه‌ی یانه‌كان زیاتر به‌ كراوه‌ی یاری بكه‌ن و هه‌وڵی بردنه‌وه‌ بده‌ن، ئه‌مه‌یش وایكرد ژماره‌ی گۆڵه‌كان زیاتر بێت.
له‌ كۆی 4 یاریشدا 18 كارتی زه‌رد به‌ ڕووی یاریزانان به‌رزكرایه‌وه‌، ‌ئه‌مه‌یش زۆرترین ڕێژه‌ی كارتی زه‌رده‌ له‌ چه‌ند گه‌ڕی ڕابردوودا، زۆرترین كارتیش له‌ یاری نێوان (هه‌ولێر و زێره‌ڤانی، زاخۆ و ئارارات) بوو كه‌ له‌ هه‌ر یاریه‌كیان 7 كارتی زه‌رد به‌ ڕووی یاریزانان به‌رزكرایه‌وه‌، له‌م گه‌ڕه‌یشدا هیچ كارتێكی سور به‌ڕوی یاریزانان به‌رزنه‌كرایه‌وه،‌ له‌م گه‌ڕه‌دا بۆ یه‌كه‌مین جار له‌ یاری نێوان (هه‌ندرێن × نه‌ورۆز) هیچ كارتێك نه‌بوو، هه‌ردوو یانه‌ی برایه‌تی و زێره‌ڤانی تا ئێستا له‌ كۆی هه‌ر 9 یانه‌كه‌ زۆرترین سه‌ركه‌وتنیان تۆمار كردووه‌، كه‌ هه‌شت جاره‌ هه‌روه‌ها له‌ هه‌موو یانه‌كانی تریش كه‌متر تووشی شكست هاتوون‌ كه‌ 3 جاره‌، دوای تێپه‌ڕبوونی 17 گه‌ڕیش یانه‌ی زێره‌ڤانی خاوه‌نی زۆرترین گۆڵه‌و 22 گۆڵی هه‌یه‌، یانه‌ی زاخۆیش له‌ شازده‌ یاریدا 22 گۆڵی لێكراوه‌ و خاوه‌نی لاوازترین هێڵی به‌رگریه‌، له‌ ئامارێكی تردا یانه‌ی نه‌ورۆز زۆرترین جار كه‌ 9 جاره‌ یه‌كسان بووه‌، یانه‌ی پێشمه‌رگه‌ی هه‌ولێری پاڵه‌وانی وه‌رزی ڕابردووی خوله‌كه‌ له‌ قۆناخی دووه‌مدا هیچ یارییه‌كی نه‌بردبۆوه‌ و دوای 10 یاری له‌سه‌ر یه‌ك توانی یه‌كه‌م سه‌ركه‌وتن تۆمار بكات، تا ڕاده‌یه‌ك له‌ ناوچه‌ی مه‌ترسی دابه‌زین دوور كه‌وێته‌وه

 

هێمن ئەسكەندەر - هەولێر

© 2017 Hawler