تشرینی دووەم 15, 2019

ئه‌مڕۆ زاخۆ له‌ یارییه‌كی گرینگ رووبه‌ڕووی كاره‌با ده‌بێته‌وه

ئه‌مڕۆ چوارشه‌مه‌ له‌ گه‌ڕی سێیه‌می خولی نایابی عێراقی زاخۆ له‌ یاریگای خۆی میوانداریی كاره‌بای شاری به‌غدا ده‌كات، ئه‌م یارییه‌ بۆ زاخۆییه‌كان چاره‌نووسسازه‌، چونكه‌ دوو گه‌ڕی رابردوو ته‌نها شكست به‌شی زاخۆ بووه‌.

زاخۆ بارودۆخی باش نییه‌، له‌به‌ر ئه‌وه‌ی كێشه‌یه‌ك له‌ نێو یاریزانانه‌كان هه‌یه‌، به‌هۆی ئه‌وه‌ی به‌شێك له‌ یاریزانه‌ كورده‌كان به‌دیاری كردنی ئه‌و كاپتنه‌ بۆ تیپه‌كه‌ رازی نینه‌، كه‌ ئه‌وانیش بارزان ئه‌حمه‌د و دلۆڤان ساڵح بوون، ده‌سته‌ی كارگێڕی یانه‌كه‌ش هۆكاری دۆڕانیان له‌ یارییه‌كان بۆ ئه‌و یاریزانه‌ یاخیبووانه‌ ده‌گێڕنه‌وه‌، كه‌ ئه‌م بارودۆخه‌ نه‌خوازراوه‌یان له‌ یانه‌كه‌ دروستكردووه‌.
زاخۆ چه‌ند رۆژێكه‌ مه‌شقه‌كانی چركردۆته‌وه‌، تا ئه‌مڕۆ له‌ یانه‌ی كاره‌با بباته‌وه‌، كێشه‌كه‌شی تا راده‌یه‌كی زۆر له‌گه‌ڵ ئه‌م دوو یاریزانه‌ چاره‌سه‌ر كردووه‌، بۆیه‌ به‌ته‌واوی یاریزانه‌كانی بۆ یاریی ئه‌مڕۆ ئاماده‌یه‌.
زاخۆ له‌ دوو یاریی رابردوو دوو دۆڕانی هه‌بووه‌، دوو گۆڵی لێكراوه‌ و هیچ گۆڵێكی نه‌كردووه‌، له‌ كۆی ده‌ یاریی رابردوو نێوان زاخۆ و كاره‌با، زاخۆ چوار یاریی بردۆته‌وه‌، 17 گۆڵی له‌ نوێنه‌ره‌كه‌ی به‌غدا كردووه‌، كه‌چی كاره‌با دوو یاریی له‌ زاخۆ بردۆته‌وه‌، نۆ گۆڵیشی له‌ زاخۆ كردووه‌، چوار یاریش به‌ یه‌كسان بوون كۆتایی هاتووه‌.
زاخۆ له‌ خانه‌ی بیسته‌م و كۆتایی ریزبه‌ندی خولی نایابی عێراقی دێت، چونكه‌ هیچ خاڵێكی نییه‌، كاره‌باش به‌ دوو یه‌كسان و تۆمار كردنی سێ گۆڵ، خانه‌ی دوازده‌یه‌می ریزبه‌ندییه‌كه‌ی گرتووه‌. ‌

 

بارزان ئەكرەم - هەولێر

دواترین دەستکاریکردن لەسەر چوار شەممە, 02 تشرینی یەکەم 2019 11:09
© 2017 Hawler