ئەیلول 21, 2019

متمانه‌م به‌ ئاست و توانا و جه‌سته‌ی خۆم هه‌یه‌، پابه‌ندی ڕێنماییه‌ ته‌ندروستییه‌كانم

كریستیانۆ رۆناڵدۆ هێرشبه‌ری یانه‌ی یوڤینتۆس له‌ دیمانه‌یه‌كی ته‌له‌ڤزیۆنیدا واده‌ی وازهێنانی له‌ یاریكردن ئاشكرا كرد و جه‌ختیش له‌وه‌ ده‌كاته‌وه‌ كه‌ زۆر ئازاری چه‌شتووه‌ به‌هۆی ئه‌وه‌ی خه‌ڵكانێك گومانی له‌ ڕه‌وشتی كردووه‌، ده‌شڵێت: له‌گه‌ڵ ئه‌و هه‌موو گرێبه‌سته‌ گرانبه‌هایانه‌ی ئه‌م سه‌رده‌مه‌ نیم.

كریستیانۆ دوێنێ له‌گه‌ڵ جۆنیۆری كوڕی سه‌ردانی ماڵه‌ كۆنه‌كه‌ی له‌ لیشبۆنا كرد كه‌ تێیدا ژیاوه‌، له‌مباره‌یه‌وه‌ ده‌ڵێت: كه‌ گه‌ڕامه‌وه‌ پۆرتوگال بۆ ئه‌وه‌ی وانه‌یه‌ك پێشكه‌شی جۆنیۆری كوڕم بكه‌م و ئاره‌زووم ده‌كرد جۆنیۆر به‌ره‌و ئه‌و شوێنه‌ كۆنانه‌ به‌رم كه‌ پێشتر تێیدا ژیاوم.
له‌مباره‌یه‌وه‌ كریستیانۆ ده‌ڵێت: له‌گه‌ڵ كوڕه‌كه‌م چووینه‌ ماڵه‌ كۆنه‌كه‌مان، جۆنیۆر پێی گوتم باوكه‌ تۆ لێره‌ ده‌ژیایت؟ باوه‌ڕی نه‌ده‌كرد كه‌ ئه‌و شوێنه‌ ماڵی ئێمه‌ بووه‌، هه‌وڵمداوه‌ وانه‌یه‌ك به‌ كوڕه‌كه‌م بڵێم كه‌ خۆشی و ئۆتۆمبێل و سامانه‌كه‌م به‌ رێكه‌وت به‌ده‌ست نه‌هاتوون وله له‌ ئاسمانه‌وه‌ به‌ دیاری بۆم نه‌هاتوون، به‌ڵكو به‌ كاری گه‌وره‌ و ناخۆشی زۆر و به‌ ماندووبوبون به‌ده‌ستهاتوون.
له‌ به‌شێكی دیكه‌ی قسه‌كانیدا كریستیانۆ رۆناڵدۆ ئه‌ستێره‌ی پورتوگالی یانه‌ی یوڤێنتۆس ئاماژه‌ بۆ ئه‌وه‌ ده‌كات به‌هۆی تۆمه‌تباركرانی به‌ده‌ستدرێژی سێكسی ساڵی‌ 2018 سه‌ختترین ساڵ بووه‌ بۆ ئه‌و، ده‌شڵێت: ئه‌و كاته‌ی خه‌ڵكانێك گومان له‌ ڕه‌وشتت ده‌كه‌ن بریندار ده‌بیت، ئه‌م رووداوه‌ بۆ من زۆر به‌ ئازار بوو كه‌ تۆمه‌تباركرام به‌ ده‌ستدرێژی، من خێزان و منداڵی گه‌وره‌م هه‌یه‌ و له‌ هه‌موو شتێك تێده‌گه‌ن.
كریستیانۆ له‌ میانه‌ی دیمانه‌كه‌یدا سه‌رسوڕمانی خۆی له‌ بازاری گواستنه‌وه‌ی ئه‌م سه‌رده‌مه‌ ده‌ربڕی و پێیوایه‌ زۆرجار پاره‌یه‌كی خه‌یاڵی به‌ یاریزانێك ده‌درێت و ئاستیشی وه‌ك پێویست نییه‌.
كریستیانۆ له‌مباره‌یه‌وه‌ ده‌ڵێت: له‌م سه‌رده‌مه‌ی ئێستا هه‌ر یاریزانێك ده‌توانێت به‌رامبه‌ر 100 ملیۆن یۆرۆ یان زیاتر بچێته‌ یانه‌یه‌كی دیكه‌ بێ ئه‌وه‌ی تایبه‌تمه‌ندییه‌كی گه‌وره‌ی هه‌بێت، بۆ كڕینی گۆڵپارێز یان به‌رگریكارێك 70 یاخود 80 ملیۆن خه‌رج ده‌كرێت، هه‌رگیز له‌گه‌ڵ ئه‌م شته‌ نیم به‌ڵام له‌گه‌ڵ ئه‌وه‌شدا ده‌بێت رێز له‌م جیهانه‌ی ئێستا بگرین.
كریستیانۆ له‌ كۆتایی دیمانه‌كه‌یدا له‌ باره‌ی واده‌ی وازهێنانی یه‌كجاره‌كی له‌ یاریكردن گوتی: ره‌نگه‌ كه‌سانێك پێیانوا بێت ساڵی داهاتوو پێویسته‌ واز له‌ یاریكردن بهێنم، به‌ڵام پلانی من ئه‌وه‌یه‌ تا ته‌مه‌نی 40 ـ 41 ساڵی له‌ یاریكردن به‌رده‌وام بم.
كریستیانۆ ده‌شڵێت: متمانه‌م به‌ ئاست و توانا و جه‌سته‌ی خۆم هه‌یه‌، من به‌ ته‌واوه‌تی پابه‌ندی ڕێنماییه‌ ته‌ندروستییه‌كانم و مه‌شقه‌كانم به‌ باشی ده‌كه‌م و نیازم نییه‌ ئاوها زوو واز له‌ یاریكردتن بێنم.
كریستیانۆ رۆناڵدۆی ته‌مه‌ن 34 ساڵ، له‌ هاوینی 2009 له‌ مانچێسته‌ر یونایتده‌وه‌ به‌ به‌های 94 ملیۆن یۆرۆ روویكرده‌ ریال مه‌درید، دوای تێپه‌ڕكردنی 9 وه‌رز له‌ لالیگا، له‌ هاوینی ساڵی رابردوو به‌رامبه‌ر 100 ملیۆن یۆرۆ په‌یوه‌ندی به‌ یوڤێنتۆس كرد، له‌ یه‌كه‌مین وه‌رزی له‌گه‌ڵ یوڤی به‌ باشترین یاریزانی سێریا ئه‌ی ده‌ستنیشان كرا.

 

ئەسعەد ئیسماعیل- هەولێر

© 2017 Hawler