ئاب 18, 2019

دیدار حامید، دوای 22 ساڵ وازهێنانی له‌ یاریكردن ڕاگه‌یاند

دیدار حامید، گۆڵپارێزی ناسراوی كوردستان و عێڕاق و یانه‌ی هه‌ولێر دوای یاریكردنی بۆ ماوه‌ی 22 ساڵ دواجار بڕیاری دا به‌یه‌كجاری واز له ‌یاركردن بهێنێت و چیتر ئه‌و گۆڵپارێزه‌ له‌ لاكێشه‌ی سه‌وزی یاریگه‌كان نابینینه‌وه‌، دیدار دوای ئه‌وه‌ی له‌ ناوه‌ڕاستی وه‌رزی ئه‌مساڵ له‌گه‌ڵ سه‌رهه‌نگ موحسینی گۆڵپارێز له‌ لایه‌ن ڕاهێنه‌ر  له‌ پێكهاته‌ی یانه‌ی هه‌ولێر دورخرانه‌وه‌، بڕیای دا واز له‌ یاریكردن بهێنێت، وێستگه‌ی داهاتووی دیدار ڕاهێنه‌ری گۆڵپارێزان ده‌بێت له‌ یانه‌ی هه‌ولێر.

حه‌زمكرد به‌ ئاست به‌رزی وازبهێنم
ده‌رباره‌ی بڕیاری وازهێنانی له‌ یاریكردن و وێستگه‌ی داهاتووی خۆی (دیدار حامد) به‌مجۆره‌ قسه‌ی بۆ ڕۆژنامه‌ی هه‌ولێر كرد و گووتی: ژیان هه‌مه‌ڕه‌نگه‌ و به‌رده‌وامه‌ منیش ده‌مه‌وێت دوای زیاتر له‌ 22 ساڵ یاریكردنم كۆتایی به‌كاروانی وه‌رزشیم وه‌ك گۆڵپارێز بهێنم و ئه‌زموونێكی نوێ تاقی بكه‌مه‌وه‌، ئه‌گه‌رچی له‌ ئێستادا گرێبه‌ستێكی زۆرم له‌ زۆر یانه‌ له‌سه‌ر ئاستی كوردستان و عێڕاق پێگه‌یشتووه‌ و داوا ده‌كه‌ن كه‌ گرێبه‌ستیان له‌گه‌ڵ واژووبكه‌م و له‌ یاریكردن به‌رده‌وام بم،  به‌ڵام به‌باشم زانی به‌یه‌كجاری واز له‌یاریكردن بهێنم، وه‌كو توانای یاریكردن توانام هه‌یه‌ بۆ دوو تا سێ ساڵی تریش یاری بكه‌م، به‌ڵام به‌باشم زانی لێره‌ كۆتایی به‌ یاریكردنم بهێنم دوای ئه‌و ماوه‌ زۆره‌ له‌ یاریكردن بۆ چه‌ندین یانه‌ گه‌ره‌كمه‌ به‌ ئاستی به‌رز وازبهێنم.

باسی له‌ هۆكاری وازهێنانی كرد
گۆڵپارێزه‌ 41 ساڵیه‌كه‌ی هه‌ولێر زیاتر قسه‌ی كرد و گووتی هه‌روه‌ك چۆن له‌ماوه‌ی چه‌ند ساڵه‌ی كاروانی وه‌رزشیم وه‌كو گۆڵپارێز به‌ ئاستێكی به‌رز یاریم كردووه‌، ویستم هه‌ر به‌ ئاستێكی به‌رز و به‌ سه‌ربه‌رزی و له‌ كاتێكی گونجاو واز له‌ یاریكردن بهێنم و ئه‌و ڕێز و خۆشه‌ویستیه‌ی له‌لای خه‌ڵك هه‌مه‌ هه‌ر به‌وشێوه‌یه‌ بمێنمه‌وه‌.
ده‌توانم یاری بكه‌م له‌ تواناشمدا هه‌یه‌، به‌ڵام وازهێنانم له‌ ئێستادا به‌ گونجاو زانی، سه‌رۆكی یانه‌ی هه‌ولێریش قسه‌ی له‌گه‌ڵ كردوم به‌باشی زانی كه‌ هه‌ر له‌ یانه‌ی هه‌ولێر كاربكه‌م و ببم به‌ ڕاهێنه‌ری گۆڵپارێزان، ئه‌و هانده‌رو پاڵپشتی زۆری كردم قسه‌یه‌كی دكتۆر عه‌بدوڵڵا زۆر كاری لێكردم، به‌ منی گوت بۆ‌ دوای چه‌ند ساڵێكی تر به‌كه‌رش و قه‌ڵه‌وی ببیه‌ ڕاهێنه‌ر، ئێستا به‌ له‌ش و لارێكی ڕێك  وه‌ك ڕاهێنه‌ر كاربكه‌م و تواناكانی خۆت وه‌ك ڕاهێنه‌ری گۆڵپارێزان نیشان بده‌.

به‌شداری له‌ خولی ڕاهێنه‌رایه‌تی ده‌كات
ئه‌و گۆڵپارێزه‌ ئاماژه‌ی به‌وه‌یش كرد كه‌ ئه‌و بڕیاره‌ بۆ ئه‌و قورس بووه‌ و زۆر بیری لێكردۆته‌وه‌ تا بتوانێت بڕیار له‌سه‌ر چاره‌نووسی خۆی بدات، چونكه‌ تۆپی پێی له‌گه‌ڵ خوێنی تێكه‌ڵ بووه‌ و جیابونه‌وه‌ لێی ئاسان نیه‌، به‌ڵام دوای بڕیاردانی وازهێنانی ئه‌و له‌ یاریگه‌ و تۆپی پێ دوورناكه‌وێته‌وه‌ و وه‌ك ڕاهێنه‌ری گۆڵپارێزان خزمه‌ت به‌ به‌ تۆپی پێ ده‌كات، گوتیشی له‌ ئێستادا كارله‌سه‌ر ئه‌وه‌ ده‌كه‌م دوای جه‌ژنی قوربان به‌شداری له‌ خولی ڕاهێنه‌رانی ئاستی سی ئاسیاوی بكه‌م و به‌فه‌رمی بڕوانامه‌ی باوه‌ڕپێكراوی ئاسیام هه‌بێت ئینجا ده‌ست به‌كاری ڕاهێنه‌رایه‌تی بكه‌م، له‌ وڵاتی ئه‌ڵمانیاش به‌شداری خولێكی بواری ڕاهێنه‌رایه‌تیم كردووه‌، به‌ڵام لێره‌ باوه‌ڕپێكراو نیه‌.

یاری بۆ چه‌ند یانه‌ كردووه‌؟
دیدار حامد به‌یه‌كێك له‌ كۆنترین ئه‌و یاریزانانه‌ داده‌ندرێت كه‌ ماوه‌ی زیاتر له‌ 20 ساڵه‌ به‌بێ پچڕان وه‌ك گۆڵپارێز له‌ یاریكردن له‌ خولی عێڕاق و كوردستان به‌رده‌وامه‌ و له‌ ماوه‌ی یاریكردنی جگه‌ له‌ یانه‌ی هه‌ولێر كه‌ زۆرترین یاری بۆ سه‌رجه‌م ئاسته‌كانی هه‌ولێر كردووه‌، له‌ یانه‌كانی زاخۆ و برایه‌تی و ئاراراتیش یاری كردووه‌، هه‌روه‌ها دیدار ساڵی 2005 پێنج یاری بۆ هه‌ڵبژارده‌ی عێڕاقیش كردووه ئه‌مه‌ جگه‌ له‌ یاریكردنی بۆ هه‌ڵبژارده‌ی لاوان و ئۆڵۆمپی عێڕاقیش هه‌روه‌ها‌ له‌ هه‌ڵبژارده‌ی كوردستانیش یاریكردووه‌.

شانازی به‌ كام ده‌ستكه‌وتی خۆیه‌وه‌ ده‌كات؟
دیداری گۆڵپارێز له‌ كۆتایدا گوتی ده‌مه‌وێت له‌ ڕێگه‌ی ڕۆژنامه‌ی هه‌ولێره‌وه‌ په‌یامێك ئاڕاسته‌ی هه‌موو ئه‌و یانه‌و یاریزانانه‌ بكه‌م كه‌ یاریم له‌گه‌ڵ كردووه‌ن و سوپاسی تایبه‌تیان بكه‌م هه‌موو ئه‌و كه‌سانه‌ی له‌ ماوه‌ی چه‌ند ساڵی یاریكردنم هاوكارو پاڵپشتم بوون، گوتیشی زۆر یادگاری خۆش و ناخۆشیم له‌ كاروانی وه‌رزشیی هه‌ن و زۆر ده‌ستكه‌وتم به‌ده‌ست هێناون، به‌ڵام ئه‌و ناسناوه‌ی كه‌ زۆر شانازی پێوه‌ده‌كه‌م، بوون به‌باشترین گۆڵپارێزی كوردستان بوو له‌ وه‌رزی 2017 – 2018 قه‌ت له‌ بیری ناكه‌م، چونكه‌ بۆ من زۆر دڵخۆشی بوو كه‌ له‌ ته‌مه‌نی 40 ساڵی ببم به‌باشترین گۆڵپارێزی كوردستان.

 

هێمن ئەسكەندەر - هەولێر

© 2017 Hawler