کانونی یەکەم 09, 2019

ئۆزیلی ئه‌مساڵ ئۆزیلێكی جیاواز له‌ وه‌رزی ڕابردوو

ئۆنای ئێمرێی ڕاهێنه‌ری ئیسپانی یانه‌ی ئه‌رسناڵ له‌ ئاستی مه‌سوت ئۆزیلی به‌ڕه‌گه‌ز كورد گه‌شبینه‌ و له‌و باوه‌ڕه‌دایه‌ ئه‌مساڵ باشترین یارییه‌كانی بۆ یانه‌ی ئه‌رسناڵ ئه‌نجام ده‌دات.
ئاستی ئه‌م ئه‌ستڕه‌یه‌ی تۆپی پێ له‌ وه‌رزی رابردوودا به‌رزی و نزمییه‌كی زۆری به‌ خۆیه‌وه‌ بین و هه‌ر بۆیه‌ له‌ لایه‌ن هانده‌ران و راگه‌یاندنكارانه‌وه‌ ره‌خنه‌یه‌كی زۆری لێ گیرا و ته‌نانه‌ت هه‌واڵی جێهێشتنی یانه‌ی ئه‌رسناڵیشی لێ بڵاو بوویه‌وه‌. به‌ڵام ئۆنای ئێمرێ ئومێدی ئه‌وه‌ی له‌ده‌ست نه‌داوه‌ كه‌ ئۆزیل یه‌ك له‌ باشترین یاریزانه‌كانێتی و له‌م وه‌رزه‌دا ئاستی راسته‌قینه‌ی خۆی پێشكه‌ش ده‌كات و ده‌بێته‌ هۆكارێكی گه‌وره‌ بۆ بردنه‌وه‌كانی تیمه‌كه‌ی.
ئۆنای ئێمرێ له‌و باره‌یه‌وه‌ وتوویه‌تی: ئێمه‌ به‌ شێوه‌ی گشتی چ وه‌كوو یانه‌ و چ وه‌كوو یاریزانه‌كان وه‌رزێكی پڕ له‌ رووداومان هه‌بووه‌ و به‌یه‌كه‌وه‌ هه‌موو هه‌وڵی خۆمان دا بۆ ئه‌وه‌ی باشترین ئاست پێكه‌ش بكه‌ین و دڵی هانده‌رانمان خۆش بكه‌ین. جاری وایه‌ یانه‌یه‌ك كه‌ له‌و باوه‌ڕه‌دای به‌ چه‌ند گۆڵێك به‌ڕێیده‌كه‌یه‌وه‌، كه‌چی به‌ جۆرێك به‌ره‌وڕووت ده‌بێته‌وه‌ كه‌ له‌ چاوه‌ڕوانیتدا نییه‌، یان گۆڵێكی كۆتایی یارییه‌كه‌ هه‌موو ریسه‌كانت لێ ده‌كاته‌وه‌ به‌ خوری.
ئێمرێ له‌ باره‌ی مه‌سوت ئوزیله‌وه‌ وتوویه‌تی: مه‌سوت ئه‌و یاریزانه‌ی پێشوویه‌ و له‌ سه‌ره‌تا مه‌شق و راهێنانه‌كاندا قسه‌م له‌گه‌ڵیدا كردووه‌ وداوام لێی كردووه‌ باشترین ئاستی خۆی پێشكه‌ش بكات، چونكه‌ باش ده‌زانم تواناكانی ئۆزیل زۆر له‌وه‌ زیاتره‌ كه‌ وه‌رزی رابردوو پێشكه‌شی كرد. ڕێگه‌ی باشتربوون و پێشكه‌شكردنی باشترین ئاست له‌ یارییه‌كان به‌ گۆڕه‌پانی مه‌شق و ڕاهێنانه‌كاندا تێ ده‌په‌ڕێت و پێویسته‌ ڕۆژانه‌ به‌شداری مه‌شق و ڕاهێنانه‌كان بكه‌ی و له‌ ڕاهێنه‌ره‌كه‌ت تێ بگه‌ی كه‌ چی لێت ده‌وێت. له‌ ڕاستیدا ئۆزیل له‌م چه‌ند ڕۆژه‌دا ئاستێكی باشی پێشكه‌ش كردووه‌ و به‌ ته‌واوی به‌ڵێنه‌كه‌ی بردووه‌ته‌سه‌ر.
مه‌سوت ئۆزیل یه‌ك له‌ باشترینه‌كانی یانه‌ی ئه‌رسناڵه‌ و ته‌نانه‌ت یه‌ك له‌ كاپتنه‌كانی یانه‌ی ئه‌رسناڵیشه‌ له‌گه‌ڵ گرانیت ژاكا و ناچۆ مۆنرئال. هه‌ر بۆیه‌ من چاوه‌ڕوانی باشترین ئاستی مه‌سوت ئوزیلم و هانده‌رانیش له‌وه‌ دڵنیا ده‌كه‌مه‌وه‌ كه‌ له‌م وه‌رزه‌دا ئۆزیلێكی جیاواز له‌ ئۆزیلی وه‌رزی ڕابردوو ده‌بینن.

 

محەمەد شهەدی- هەولێر

© 2017 Hawler