کانونی یەکەم 08, 2019

ئافرەتی كورد هەمیشە دەست ڕەنگین بوە لە هەموو كار و بارێكی ژیاندا، بە تایبەتی لە كاری هەوریكاری و دروستكردنی شیرینی و كولیچەی بە تامو چێژدا، چونكە هەموو ساڵێك كە لە جەژن نزیك دەبینەوە ئیدی هەموو ماڵێك دەكەوینە خۆیان و پێداویستیەكانی ئەو بۆنە ئامادە دەكەن بۆ ئەوەی ئەو كات و ساتانە بە خۆشیەوە بەسەر ببەین و دڵی هەموو لایەك خۆش بكەین، جا یەكێك لەو پێویستیانەی كە هەموو ماڵێك دابینی دەكات بۆ ئەوەی لە جەژن پێشكەشی میوانانی بكات كولیچە و شیرینی جەژنە، بۆیە یەكێك لە كابانی ماڵەكان پێی ڕاگەیاندین كولیچە بە چەند جۆر و شێوەیەك دروست دەكرێت ئەویش بە خورما و گوێز و فستق و هیند قۆزی و زۆر شتی دیكە، چونكە هەر یەكێك حەز بە جۆرێك لەوانە دەكات، بۆیە ئەو كارە بە هەرەوەزی و كۆمەكی چەند ڕۆژێك پێش هاتنی جەژن دروست دەكرێت، ئێستا لە شوێنی تایبەتی لە بازارەكانیش هەن ئەو كارە دەكەن، بەڵام خۆشیەكە زیاتر لەوەدایە كە لە ماڵەوە بكرێت و چەند ساتێكی خۆشی لەگەڵدا بەسەر ببەین، هەر بۆ زانیاریش دەڵێین ماڵی وا هەیە لە جەژندا بە دەگمەن كولیچەی تێدا نەبێت، چونكە دەتوانین بڵێین بۆتە مۆدە و باو كە خەڵكی بە بێ ئەو شیرینیە جەژن بەسەر نەبات، بەو ئومێدەی هەموو لایەك بەدەم خواردنی شیرینی و چەرەزات و كولیچەی خۆش و بەتام جەژن و خۆشی و شادی دوور لە كێشە و گرفت بەسەر ببات و ئاشتی و ئارامی باڵ بكێشێ بەسەر هەموو لایەكدا.

 

محەمەد سەعید كوردە - هه‌ولێر

© 2017 Hawler