ئەیلول 21, 2019

ئاریان فەرەج

 

فەرید ئەسەسەردی یەكێتی دەڵێت: بارزانی كە خوێندنەوەی هەڵەی بۆ روداوەكان هەبوو، لەهەر ووڵاتێكی تر بوایە هەڵوێستێكی تریان بەرامبەر دەنواند نەك هەروا بە ئاسانی دەستلەكاربكشێنێتەوە و بۆ خۆی دانیشێت و قسەی خۆی بكات.
فەرید لەو كەسانەیە كە حەزی لێیە ببێتە جێی باس، جا ئەو باسكردنە بە باش بێت یان خراپ، لەو پێناوەشدا هەمیشە ئامادەیە قسەی ئەوتۆ بكات كە مەحاڵە خەڵكی دیكە روویان هەبێت بیكەن. ئاخر ئەو جۆرە قسانە رووقایمی و بێشەرمییەكی بێوێنەی دەوێت. بە كەسێك دەكرێ هیچ سڵ لە شەرمەزاری و بەخۆداشكانەوە و حەیاچوون نەكات.
راستترین لۆژیك ئەوەیە: ئەگەر لە كۆمەڵگە و ووڵاتێكدا تاوان و خراپەكاری چاویان لێ بپۆشرێ یان لانی كەم لێپێچانەوە و سزادانیان دوابخرێ، پیاوچاكی و پیاوخراپی تێكەڵ دەبن. ئەو بنەما و پرنسیپ و دەرسە ئەخلاقییانە بێ ئەرزش دەبن كە كۆمەڵگە و ووڵاتیان لەسەر دامەزراوە، ئیتر مەعلوم نابێ كوردایەتی باشە یان جاشایەتی، دڵسۆزی بۆ گەل و خاك پەسەندە یان خیانەت و ناپاكی، كامیان شەرمەزارییە و كامیان شانازی، دواجاریش دەگات بەو نەتیجەیەی كە دیفاع لە ناپاكی پەسەند و رەوا بێ و نیشتمانپەروەری تاوان بێ و شایستەی لێپرسینەوە بێت. ئەوەی فەرید هەوڵی بۆ دەدات، دروست تیۆریزەكردنی ئەو لۆژیكە ئاوەژووەیە.
ئەسەسەرد خیانەت و خاكفرۆشیی گروپەكەی شازدەی ئۆكتۆبەری نێو حزبەكەی كە كوردی بەم نەهامەتییە گەیاند بە حەرفێكیش بە شایانی رەخنە نازانێ و بەڵكو تا دەتوانێ ئاراییش و پەسەندی دەكات، لەبەرامبەردا خەباتی كورد بۆ ئازادی و سەربەخۆیی، هەوڵدان بۆ ئەوەی كورد وەك بەشەر بژی، بە تاوان و جینایەت دەزانێ، بۆیەش پێی وایە بارزانی كە رابەرایەتی ئەو خەباتەی كرد شایانی لێپێچانەوەیە و نابێ بێ لێپرسینەوە دەرچێت.
فەرید نمونەی ئاوەژووبونەوەی ئەخلاقیاتی نیشتمانپەروەری و ناپاكییە، دەنگێكی بێ شەرم و شكۆیە بۆ هەڵگێڕانەوەی تەواوی مێژووی خەباتی میللەتێك كە لەسەر بنەمای ستایشی نیشتمانپەروەری و سزادانی نیشتمانفرۆشی دامەزراوە. ئەو دەنگێكە زادەی سەرلێشێوان و پەرتەوازەیی فكری و تەنزیمی حزبێك كە خەرێكە سەرەداوەكانی تێدا وون دەبێ. خەریكە نیشتمانپەروەری و كوردایەتی و ئازادیخوازیی تێدا دەبنە یاساغ و جینایەت و عەیب و عار، خیانەت و خاكفرۆشی لە بابەتی شازدەی ئۆكتۆبەری تێدا دەبێتە نەبەردی و سەروەری و شانازی.
لە هەر وڵاتێكی تر بوایە خیانەتكارانی شازدەی ئۆكتۆبەر دەكرانە پەند و عیبرەت بۆ هەر كەسێك گەر رۆژێك بیر لە ناپاكی بكاتەوە، بەڵام كاتێك خیانەتكار و نیشتمانفرۆش سزانەدرێن، دەبێ چاوەڕوانی دەركەوتنی فەریدێك بین داوای سزادانی نیشتمانپەروەران بكات.

© 2017 Hawler