کانونی دووەم 18, 2022

زۆرترین بینراو بۆچوون

Error: No articles to display

ئەندازیاری ردم شكاندن

سنور دەونی

 

گەلی كوردستان لە پێناو گەیشتن بە ئامانجە نەتەوەیی و چارەنوسسازەكانی هەموو ڕێگایەكی تاقیكردۆتەوە، هەر لە تێكۆشانی شارستانی و سەردەمیانە تا دەگاتە چەكداری قوربانیدان لەم پێناوەدا، هیچ ئایدۆلۆژیا و بیرۆكەیەك نەما بە جەستەی خۆی نەیدوورێت و نمایشی پێنەكات بەرامبەر نەیارانی تاوەكو بتوانێ بگات بە سەربەخۆیی، مێژوو شاهێدی ئەو دەرگایانەیە كە پەنجەی كوردی بەر كەوتووە، لە كاتی گەڕان بە دوای ئازادی و مافی چارەی خۆنووسین، سیڤەر و لۆزان وەك دوو قردێلەی شێوە پەپولە لە سەر پرچی كچی كورد نیشتن، نەوەك بایی شەماڵی سەربەستی تاڵە پرچە خوناوییەكان وەك ئاڵا بشەكێنێتەوە، لەولاشەوە كۆمەڵەی گەلان وەك كۆتێك كران بە قاچی ماندوویی كوردایەتی نەوەك هەنگاوێك كەم بێتەوە لە گەیشتن بە هەنگاوەكانی ڕێگای ئازادی، دواهەمینیان نەتەوە یەكگرتووەكان بوو كە وەك تەوقێك كرا بە بەڵای زامداری كوردان نەوەك ڕۆژگار هەڵە بكات و ڕۆژی ساڕێژی برینەكان دیاریبكات.
كۆتا داوی گەلی كوردستان سەربەخۆیی بوو ئەویش لە ڕێگەی ئەنجامدانی پرۆسەیەكی دیموكراسی و سەردەمیانە بۆ داوا كردنی مافە ڕەواكان، بەڵام هەر زوو دوژمن و نەیارانی گەلەكەمان بە بەرچاوی جیهانی دیموكراسی كەوتنە بەر دژایەتی كردنی هەرێمی كوردستان بە سزادان و ئابلۆقە دان و برسی كردن! هێزی هەموو وڵاتانی نەیارمان لە یەك گورزدا كۆ بوونەوە و ئاڕاستەی دڵی كوردستان كرا، ئەهلایمەنەكان خۆیان ئەندازیارە بە تواناكانیان بڕیاری دروستكردنی (ردم)یاندا بە ئاسۆیی كوردستان بۆ ئەوەی جارێكی تر گەلی كورد تیشكی خۆر نەبینێت، بەڵام باهۆزی سەردانەكانی دەوڵەتمەدار نێچیرڤان بارزانی هەمووانی تووشی شۆك كرد لە هەر هەنگاوێكدا چاوی ناحەزان ئەبڵەق تر دەبوون.
پیلان و خەونە گڵاوەكانیان لە ئاست حیكمەت و هزری ئەقڵمەندانەی دەوڵەتمەدار وەكو شێرە بەفرینە دەستیان كرد بە توانەوە، ترس و دڵەڕاوكێ گەیشتە قوڵایی دڵە ڕەشەكان و بە دەست و پەنجەی لەرزۆك و بە ناچاری هێدی هێدی نەخشەی پیلانەكانیان پێچایەوە .
بەڵێ ئێستا بە شاهێدی دۆست و دوژمنان دەوڵەتمەدار بە (ردم) شكێن ناو دەبەن، هەروەك چۆن باوكی لە شاخدا بە ئەندازیاری ئاشتەوایی ناو دەبرا، بەڕێزیشیان لە شاردا بە ئەندازیاری ئاوەدانی ناوەدەبرا، بەڵام ئێستا گەورەترین و قورسترین ئەركی گەلەكەی لە كۆڵی خۆی ناوە بە هێز و بازووی دامەزراوەی بە دروشمی بەرخودانی بۆ ماوەیی بڕیاریدا (ردمی) سەر كوردستان بشكێنێت و بە دڵە گەرم و خۆنەویستەكەی سەرجەم بەستەڵەكە چەق بەستووەكان بتوێنێتەوە، بەڵێ ئەوە پایەدار نێچیرڤان بارزانیە لە پێناو بەرژەوەندی هاووڵاتیانی كوردستان هەموو سنوورەكانی مامەڵەی دیبلۆماسی و بنەماكانی بە هێزی و لاوازی بەزاندووە، تەنیا ئامانج و كۆتا ئاوات گەڕانەوەی ئارامی و دابین كردنی بژێوی سەربەرزانەیە بۆ هەرێمی كوردستان با قەڵەم خوار و ئەقڵ بچووكەكان چۆن لێكی دەدەنەوە درێغی نەكەن، چونكە بەری خۆر بە بێژەنگ ناگیرێ، بەرزی و بەهێزی شەپۆلە گەورەكانی دەریای ئاشتی خوازی و بەرهەمداری دەوڵەتمەدار زۆر بێ باكە لە دارێكی ڕزیوی ووشك بووی بەردەمی، ئەوەتا سیاسەتی حەكیمانە و ژیرانەی بەڕێزیان زۆر سەرکەوتووانە توانی تەونە چڕ و پڕەكەی ناو گوێچكەی عەبادی خاپوور بكات و جارێكی تر وشەی كوردی پەردەی گوێچكەكانی عەبادی زرنگاند..
بەڵێ ئەوەتا هەر ئەندازیارە (ردم) شكێنەرەكە بوو توانی خۆی لە قەدی لوتكەی هیلالی شیعی بدات و جاڕێكی پەیامی دۆستایەتی كوردانی بۆ تاران دووپات كردەوە، بەڵێ ئێستا كلیلی هەموو چارەسەری و پەیوەندیەكان لە دەستێكی پاكدایە، تاكە هێزی كردنەوەی دەرگاكان بە دەستی دەوڵەتمەدار بژێوی خەڵك و خەم و ئازارەكانی هاوڵاتیانە دڵنیا بن بڕیاری گۆڕینی هاوكێشەكان لە بەرژەوەندی كورد دا دەست پێدەكاتەوە لێرەوە ڕوو دەكەمە دەوڵەتمەدار نێچیرڤان بارزانی و پێدەڵێم نەك تەنها تۆماری مێژوو نووكی قەڵەمی هاوتا كردووە لە گەڵ هەنگاوەكانت، بەڵكو تۆماری ڕێختەریش لەرەلەرەكانی هاوتا كردووە لەگەڵ هەنگاوەكانت، چونكە نەك تەنها بینەری شاشەكان، بەڵكو عەدەسەی كامیراكانیش درك بە ڕووخساری پڕ هیوات دەكەن، خوا بتانپارێزێت و میللەت چاوی لێتانە ئەی ڕزگاركەری شەوە زەنگ و تاریكیەكان.

© 2017 Hawler