کانونی یەکەم 12, 2019

هاودەنگ فاروق

 

ریفراندۆم بووە سەنەدی تاپۆی خاک و سەربەخۆیی گەلی کوردستان، وەک چۆن سەرۆک مەسعود بارزانی لە ژێر هیچ هەرەشەو گوشارێکی ناوخۆیی، عێراقی، ئیقلیمی و نێودەوڵەتی لە ڕیفراندۆمی ٢٥ ئەیلوول پاشەکشێی نەکرد و ئەمانەتی ئەنجامی ڕیفراندۆمی وەک بەڵگەننامەیەکی مێژوویی پێشکەشی خەڵکی کوردستان کرد، سەرۆکوەزیرانی کوردستانیش بە سیاسەتی سەبری ئەیوب، نەچوە ژێر باری هیچ داواکاریی وگوشارێک بۆ هەڵوەشاندنەوەی ئەنجامی ریفراندۆم، دوای ڕووداوەکانی ١٦ی ئۆکتۆبەر ئەمە گەورەترین سەرکەوتن و دەستکەوتی گەلی کوردستان بوو، کە قەوارەی سیاسیی کوردستان و ئەنجامی ڕیفراندۆم پارێزران وهەربەهێزی زیندوویی یاسایی ودەستووری مانەوە.
دوای ئەم هەموو پیلانگێرییە ناوخۆیی و دەرەکییە، کاراکتەر سەرەکییەکانی پارتی دیموکراتی کوردستان بە تایبەت سەرۆکوەزیرانی کوردستان توانی بە سیاسەتی پشودرێژی وپێداگری لە سەر ستراتیژی ئاشتیانە، دەرگای خەفەکراوی ئابلوقەدانی سەرکوردستان بشکێنی و جارێکی دی باری سەرنجی کۆمەڵگەی نێونەتەوەیی بۆسەر کوردستان وەرگێڕێتەوە، لە پێشدا لە سەر تەوەری هەر سێ ستوونە بەهێزەکەی داڕێژەرانی سیاسەتی یەکێتی ئەوروپا، فەرەنسا، ئەڵمانیاوئیتاڵیا دەستی پێکرد، ئینجا ئەمریکاو بەریتانیاو دواتریش ئانکەرەو بەغداو تاران.
ئاسۆی هەموو ئەم هەنگاوانەش بە قازانجی سەرکەوتنی ئیرادەی گەلی کوردستان زوو دەرکەوت کە دروستکردنی گوشاری نێودەوڵەتی بوو لە سەر بەغداو پابەندکردنی بە دیالۆگ و جێبەجیکردنی مافە دەستوورییەکانی کوردستان، کە بەغدای ناچار بە کردنەوەی دەرگای دیالۆگ ودانوستان لە گەل هەولێر کرد.
لە سیاسەتی ژیرانەدا ئەنجام گرنگە، هەنگاوی ریالیستی وهەڵویستی بەهێزولۆژیکی کاریگەرە، ئەوەی بارزانی لە سێ مانگی ڕابردوودا کردی بەرهەمەکەی دوو شت بوو: هەم بردنەوەی ئەنجامی یارییەکان بوو، هەمیش بەتڵکردنەوەی خەونی پیلانگێران بوو، بە پێچەوانەی ئەوانەی لە دوای ڕیفراندۆمەوە گرەوی خیانەتکاری و سەفەقاتی پیلانگیرییان لە سەر نەمانی قەوارەی سیاسی کوردستان و سرینەوەی پارتی دیموکراتی کوردستان کردبوو.
لەم یارییەدا سەرۆکوەزیران بارزانی بە پلان و بەرنامە و تاکتیکی نوێوە، لە سەر بنەمای سیاسەتی دانوستان و ئاشتیانە ڕووی لە مەیدانی سیاسەتی ناوچەیی و نێودەوڵەتی وجارێکی دی داڕشتنەوەی پەیوەندییە دیبلۆماسییەکان کردەوە، نەیهێشت دوای گەلەکۆمەکێ و گۆڕینی هەندێ لە هاوکێشە سیاسییەکان، کوردستان بۆ بگەڕێتەوەوە دواوەو بە بێ دەسکەوتی بەرچاویش لێی دەرچێ.
لەم ڕوانگەیەوە نێچیرڤان بارزانی توانی یاریکارێکی سەرنجڕاکێشی نێودەوڵەتی و کاریگەر بێت، کاریک بکات، لە چاو ئەو زیانانەی کە پێشبینی کرابوون، کوردستانی دوای ڕیفراندۆم، بە کەمترین زیان لێی دەرچێ و قۆناغەکە تێپەڕێنێ،یەکەم: بەهێزی بمێنێتەوە، هەمیش خۆێ بپارێزێ، ‌ڕاستە هێشتا بە تەواوی کوردستان لە قەیرانەکان دەربازی نەبووە، بەڵام زۆر زۆر باشی هێناوە، تا ئێستا بە کۆمەڵێک دەسکەوتێ بە نرخ گەیشتوە، لە راستیدا کورد لە هەرێمی کوردستاندا ئێستاش ئاکتەرێکی کاراو گرنگە هەموو لایەک بە دۆست و دوژمنەوە حیسابی سەنگ و پێگەی دەکەن.

© 2017 Hawler