کانونی یەکەم 12, 2019

ب چ رەنگ كورد سەنگا خوە دێ ل بەغدا ڤەگەرینن؟

رەوان نهێلی

 

دیدارا نێچیرڤان بارزانی سەرۆك وەزیرێن هەرێمێ و حەیدەر عەبادی سەرۆك وەزیرێن عیراقێ، پەیامەكا ئاشكرا و دیاربوو بۆ هەمی وان لایەنێن ناڤخویی یێن كوردستانێ كو ڤێ حوكمەتێ سەرەرای خوەڤەكێشانا گۆڕان و كومەل و یەكگرتوو، شەرعیەتا خوە یا هەی و یا مای و ئەڤ دیدارە و بزاڤێن نێچیرڤان بارزانی بۆ چارەكرنا كێشێن هەرێمێ ژ ئەنجامێ چەندین هەولێن وی یێن دبلوماسی بوویە، ب تایبەت كومبوونا وی ل گەل سەرۆكێ فرەنسا و بزاڤێن سەرۆكێ فرەنسا بۆ چارەكرنا كێشێن هەرێمێ و پەیوەندیكرنا وی ب سەرۆكێ ئەمریكا، ئانكو بەغدا ژبەر سەركەفتنا هەولێن دبلوماسی یێن كوردان و فشارێن نێڤدەولەتی دێ یا بەرهەڤ بیت كێشێن هەرێمێ چارە بكەت و پێشوازی ل سەرۆك وەزیرێن هەرێمێ هاتە كرن، د ماوێ بهێت دا، ئەگەر د ئێكگرتی بین هەمی پێشهات دێ د بەرژەوەندا كوردستانێ دابن، ژبەر كو سەرەرای فشارێن نێڤدەولەتی یێن سەر بەغدا، نوكە عیراق یا بەرەڤ هەلبژارتنان ڤە دچیت و كێشێن هەڤپەیمانیا شیعان زور بووینە و عەبادی پێدڤی ب دەنگێ كورد و سونان هەیە ژبەر كو عەبادی ژی دترسیت كورد و سونە خوە نێزیكی نەیارێن وی بكەن، وی دەمێ چانسێ وی و لایەنێن شیعی دێ گەلەك لاواز بیت كو جارەكادی پۆستی سەرۆك وەزیرێن عیراقێ وەرگرن، نموونا ترسا عەبادی ژ كورد و سونان د ماوێ سێ هەیڤێن بوری دا گەلەك ئاشكرا بوو كو كورد و سونان دپرسا پرۆژە بودجێ عیراقێ یێ سالا 2018 ئێك گرتن و هەتا نوكە ژی ئەڤ پرۆژە ل پەرلەمانی یە، بەلێ ژبەر كو كورد و سوننان ب سەدان تێبینی ل سەر هەنە و نە ب خواستان وانە، دەرباز نەبوویە و دەرباز ژی نابیت، هەروەسا د پرسا هەلبژارتنێن عیراقێ دا كو ل بەرە هەیڤا 5 یا ئەڤ سالە بهێتە كرن، كورد تا رادەیەكێ ل گەل سونانە وەكو كارتەكا فشارێ كو نابیت، هەلبژارتن بهێتە كرن و لایەنەكی د ڤێ عیراقێ دا دژیت یێ نەرازی بیت، ژبەركو هەلبژارتن وەكو فیستەڤالەكا خوەشیێ یە، دڤێت هەموو لایەن تێدا دپشكداربن و گوهرینەك بیتبەر ب باشیێ، لەوما ئەڤرۆ سیاسەتا شاش یا بەغدا بوویە ئەگەرێ ژ ناڤ چوونا پرانیا دەڤەرێن سوونی و هەروەسا پتر ژ سێ سالە سیاسەتا برسیكرنێ ل گەل خەلكێ كوردستانێ بكار دئینیت، چاوان ئەڤ هەردو لایەنە بەرهەڤ بن بچنە هەلبژارتنان و كێشێن وان چارە نەبن، لەومان ژی ئەگەر خوە هەلبژارتن دوەختێ خوەدا ژی بهێنە كرن، بەلێ كورد و سوونە ڤێ جارێ د ئێكگرتی بن، بێی ڤان دو لایەنان چو لایەنەك نەشێت حوكمەتێ پێك بینیت و وی دەمی ژی دێ هەر پێدڤی ب كورد و سونان بن، بەلێ هەر چاوابیت دڤێـت ئەم كورد د هەر پێنگاڤەكێ دا د هەستیار بن و هەمی بزاڤێن مە ئەو بن كو ئەڤ قەوارێ كوردستانێ و ئەزموون و دەستكەفتێن مە هەی ب پارێزین ژبەر كو هەردەم عیراق ژ بجهئینانا برگێن دەستوورێ عیراقێ رەڤیایە و خوەڤەدزیە و یا د بەرژەوەندا وێ دا بكار دئینیت و نموونە ژی دزورن وەكو بجه نەهاتنا مادێ 140 و گەلەك مادێن دی یێن دستوری كو گرێدای ب كوردان ڤەنە، لێ چەند كورد ل سەر ئاستێ جیهانی،دبلوماسیەتا وێ یا سەركەفتی بیت، ئەم هەر پێدڤی ب ئێكگرتنا ناڤخویی نە، لەوما كومبوونا عەبادی و نێچیرڤان بارزانی دەستپێكەكا باش بوو بۆ چارەكرنا كێشێن هەرێمێ، لێ ئەگەر هەموو پارت و لایەنێن كوردی ڤێ جارێ د ئێكگرتی بن، دێ پتر مافێن خوە بدەست ڤەئینن و ئەو بارێ گرانێ پتر ژ چار سالە كەتیە سەر ملێ وەلاتیێن بێ گونەه یێن هەرێمێ دێ سڤك بیت بگرە ژ دابینكرنا مووچێ وان یێ دروست و دابینكرنا خزمەتگوزان و جارەكادی ئاڤەدابوونا وەلاتی و پەیدابوونا ب دەهان هزار دەلیڤێن كاری كو ئەڤەژی پێدڤی ب پێكولا هەموو لایەنێن كوردی یە.

© 2017 Hawler