تشرینی یەکەم 17, 2019

رێكس تیله‌رسۆسنی بۆچی په‌یوه‌ندی ب نێچیرڤان بارزانی كر

به‌ده‌ل گابێركی

 

 

 

 

پشتی رودانێن 16 ئۆكتۆبه‌رێ سه‌رۆكێ حكومه‌تا هه‌رێما كوردستانێ یێ به‌رده‌وامه‌ ل سه‌ر بزاڤێن خوه‌ بۆ زڤراندنا پێگه‌هه‌كێ بهێزتر بۆ هه‌رێما كوردستانێ و ئه‌ڤ چه‌نده‌ژی دێ ب بۆرینا ده‌می بۆ هه‌موو وه‌لاتیان باشتر دیاربیت، بارزانی ژ فه‌ره‌نسا ده‌ستپێكر و به‌ره‌ڤ ئه‌لمانیا چوو و ل جه‌م پاپایێ كاسولیكێن جیهانێ و ئه‌ڤ كاروان خه‌باتا دبلوماسی دێ یا به‌رده‌وام بیت تا هه‌رێما كوردستانێ ژ پیلانێن به‌غدا و دۆژمنێن كوردان بهێته‌ پاراستن.
هه‌ر به‌رده‌وامییا پشته‌ڤانیكرنا مانا هه‌رێمه‌كا بهێز د چارچوڤێ ده‌ستۆرێ عیراقێ دا رێكس تیله‌رسوسن وه‌زیرێ ده‌رڤه‌ یێ ئه‌مریكا په‌یوه‌ندییه‌كا تله‌فونی یا گرنگ لگه‌ل نێچیرڤان بارزانی سه‌رۆكێ حكومه‌تا هه‌رێما كوردستانێ ئه‌نجامدا ئه‌ڤێ په‌یوندیێ چه‌ندین مفایێن خوه‌ هه‌نه‌ هه‌م ل سه‌ر ئاستێ جیهانێ و هه‌م ل سه‌ر ئاستێ ناڤخوه‌یا عیراقێ، ژبه‌ركو ئه‌ڤه‌ په‌یامه‌كا گرنگه‌ژ ئه‌مریكا بۆ هه‌موو جیهانێ و ب تایبه‌تی بۆ ئیران و عیراقێ كو ئه‌م پشتا خوه‌ ناده‌ینه‌ كوردان و دڤێت هوین سنۆرێن خوه‌ بزانن و كورد هه‌ر دۆستێن مه‌ یێن گرنگن و ئه‌گه‌ر ئه‌م به‌رێ خوه‌ بده‌ینێ دێ بینی عیراق ژی هێدی هێدی یا دهێته‌ دانوستاندنان و ئه‌و باش دزانیت نه‌شێت هه‌رێما كوردستانێ ب هه‌لوه‌شینیت و یا نه‌چاره‌ مافێن كوردان بده‌تێ.
ئه‌مریكا دڤێت ب رێكێن خوه‌ یێن تایبه‌ت به‌غدا نه‌چار بكه‌ت هه‌موو مافێن كوردان بده‌تێ ب ته‌مامی هه‌موو ده‌ستۆرێ عیراقێ بهێته‌ جێبه‌جێكرن و بۆڤێ پێنگاڤێ ئه‌مریكا به‌رده‌وام گشڤاشتنكرینه‌، به‌س وه‌كو پێدڤی نه‌بووینه‌، به‌لێ نوكه‌ بۆ ئه‌ورۆپا و ئه‌مریكا و ب تایبه‌تی ئه‌مریكا مانا هه‌رێمه‌كا بهێز یا تایبه‌تی بیت ب كوردانڤه‌ یا گرنگه‌ و ئه‌سته‌مه‌ ئه‌مریكا ده‌ستان ژ كوردان به‌ربده‌ت و ئه‌ڤ په‌یوه‌ندییا رێكس تیله‌رسوسن لگه‌ل نێچیرڤان بارزانی به‌لگه‌یه‌ بۆ هندێ كو ئێدی ئه‌مریكا دێ پتر گڤشاتنان ل به‌غدان كه‌ت و ناهێلیت به‌غدا ب كه‌یفا خوه‌ یاریا ب ژیانا ملله‌تێ كورد بكه‌ت كو ب درێژاهییا مێژوویێ قوربانیداینه‌ بۆ ئازادبوونێ.
به‌رده‌وام و هه‌موو ده‌مان سه‌رۆكێ حكومه‌تا هه‌رێما كوردستانێ یا دوپاتكری كو ئه‌و لگه‌ل دانوستاندنانه‌ و دژی هه‌ر توندوتیژیه‌كێنه‌ و گرنگییا ڤێ په‌یوه‌ندیێ ژی ئه‌و كو ئه‌مریكا ژی دڤێت هه‌موو كێشه‌ و ئاریشێن هه‌رێم و به‌غدا ب رێكا دانۆستاندنێ بهێنه‌ چاره‌سه‌ركرن و دنوكه‌ دا پشته‌ڤانیكرنا واشنتۆن بۆ هه‌رێما كوردستانێ یا گرنگ و كاریگه‌ره‌ و دێ چه‌ندین ده‌ستكه‌فتن بۆ هه‌رێما كوردستانێ هه‌بن و ل داهاتی ژی دێ ڤان ده‌ستكه‌فتنان ب چاڤێن خوه‌ بینین.
بێگومان دڤێ قوناغا هه‌ستیاردا ئه‌ڤ په‌یوندییا تله‌فونی هاته‌ ئه‌نجامدان و ئه‌مریكا باش دزانیت نوكه‌ ب شێوه‌یه‌كێ جدی هه‌رێما كوردستانێ و به‌غدا یێن ل سه‌ر چه‌ندین ئاستان دانۆستاندنێ دكه‌ن و ئه‌ڤ په‌یوه‌ندییه‌ پتر بۆگڤاشتنایه‌ ل سه‌ر به‌غدا و عه‌بادی و زێده‌كرنا بۆدجه‌یا هه‌رێما كوردستانێ و دانا مووچێن فه‌رمانبه‌رێن هه‌رێمێز
ل دوماهیكێ ئه‌ڤ په‌یوه‌ندییه‌ بۆ دوپاتكرنێ یه‌ ل سه‌ر بهێزكرنا په‌یوه‌ندیێن دناڤبه‌را واشنتۆن و هه‌رێما كوردستانێ و نێچیرڤان بارزانی ژی روله‌كێ سه‌ره‌كی یێ دیتی د بهێزكرنا ڤان په‌یوه‌ندییاندا و ل رۆژێن داهاتی ژی دێ چه‌ندین په‌یوه‌ندیێن گرنگ یێن دبلوماسی و گرنگ بۆ هه‌رێما كوردستانێ ب چاڤێن خوه‌ بینی ب تنێ دڤێ قوناغێ دا یا گرنگ ئه‌وه‌ كورد به‌رده‌وام بن ل سه‌ر ژناڤبرنا گه‌نده‌لیێ و سه‌ر ئێخستنا پرۆژێ چاكسازیێ.

 

 

 

 

 

 

 

 

© 2017 Hawler