کانونی دووەم 25, 2021

جاڕنامەیەک بۆ مۆزەخانەی شەرمەزاری

شۆڕش خالید ئاژگەیی

 

ڕۆژئاواییەکان هەر کاتێ هەستیان بە مەترسی لە دەست دان یا هەڕەشە لەسەر بەرژەوەندیە ئابووری و ستراتیژیەکانیان لە هەر شوێنێکی ئەم جیهانە پان و بەرینە کرد، پەنا بۆ دەرهێنانی کارتی " پێشێل" کردنی مافەکانی مرۆڤ، نەبوونی" دیموکراسی" و "تاکڕەویی" و "دیکتاتۆری"ەوە دەبەن.
بەر لە ڕووخانی رژێمی گۆڕبەگۆڕی سەدام، دەهۆڵی هەناردەکردنی دیموکراسیان لێدەدا. دواتر کە سەدامیان دەربەدەر و دامودەزگاکەشیان تەفرو تونا کرد و بۆیان دەرکەوت وڵاتێک بە درێژایی زەمەن خۆری ئازادی و دیموکراسی و ڕێزگرتنی لە مافەکانی مرۆف بە چاوی خۆی نەبینیوە، مەحاڵە بتوانێ خۆی لەگەڵ چەمکەکانی دیموکراسی و پڕەنسیپەکانی مافی مرۆڤ (بە پێوەری ڕۆژئاو) ڕابێنی و پایەکانی بەهێز بکات.
دواتر هەروەک بینیمان لە بانگەشەکانیان پاشگەز بوونەوەو ئێستاکە دەهۆڵی دڕاوی " پاراستنی یەکپارچەیی" وڵاتێکی نەریتگەرای خێڵەکی، دواکەتوو لە ڕووی فکرو مەعریفە و جیهانگەرایی و تایفی، پڕاوپڕ لە شۆفینیزمی نەتەوەیی و خۆسەپێن، دەکوتن و هەمیسان دەیانەوێ وەک سەد ساڵی رابردوو کردیان، بە گرتنەبەری سیاسەتێکی فاشل و شە‌ق و هەڕەشە و گوڕەشە و چاوسوورکردنەوە، نەتەوەکانی ئەم وڵاتە نەگبەتە ناچاری پێکەوە ژیانێکی ناچاری و جەبری و نەخوازراوەو بکەن.
بەردەوام بوون لەسەر هەمان ڕێچکەی سەد ساڵی ڕابردوو و خەون و خولیای خۆسەپاندن و داگیرکاری (هەر قۆناغە و بە ناوێک) نەک دادی ئەمانەی ئێستای بەغدا نادات تا سەر درێژە بە سیاسەتە شۆفینیە دەمارگیریە قێزەوەنەکانیان بدەن، بەڵکوو بە پێچەوانەی لێدوانی هەندێک بەرپرسی کوردی بەغدا، سیاسەتی پەراوێز خستن و برسی کردنی هاونیشتیمانیانی لە کوردستانی باشور، کوردستانیان زیاتر لە سەر بیری جیابوونەوە و سەربەخۆیی ڕشت دەکات و لە (عێراقی) بوونی خۆیان زیاتر بێزراویان دەکات.
بەڵام دیارە دوای ئەبوبەکر بەغدادی هەنووکە نۆرەی (بەغدادیە) ملهور و لەخۆباییەکانی ئێستای بەغدایە، خۆیان لە ڕەتکردنەوە و پێشێلکردنی مافەکانی کورد تاقی بکەنەوە. بەڵام با دڵنیابن ئەم دۆخە نەخوازراوەی دوای شازدەی ئۆکتۆبەرەوە هاتۆتە کایەوە، دۆخێکی کاتیە و بۆ هیچ دەسەڵاتدارێکی بەغدا نەچۆتە سەر لە دژایەتیکردنی کورد سەرکەوتوو بێت. (بەو مەرجەی کورد لە ناوەخۆیدا یەکگرتوو بێت..کە بەداخەوە نیە).
مێژووی ڕووداوەکانی سەدەی رابردوو سەلمێنەری ئەو راستیە حاشاهەڵنەگرەیە، کەوا تا کورد نەبێتە خاوەن قەوارەی سیاسی خۆی، ڕۆژهەڵاتی ناوەراست ئارامی و سەقامگیری بەخۆیەوە نابینێ. ئەشێ بە ئامانج گەیشتنی ئەم خۆلیاو خواستە نەتەوەییە بەرحەق و ڕەوایە، لە بەرکەماڵ بوونیدا دوا بکەوێ، بەڵام مەحاڵە لە مێشک و زاکیرە و دڵ و دەروونی تاکی کورد بسرێتەوە و لە گۆڕ بنرێ.
تا ئەوان بەردەوام بن لە سەر پەراوێز خستن و ڕەتکردنەوە، بە هەر بڕو بیانوویەک بێت، بیری جیابوونەوە و سەربەخۆیش دە ئەوەندە لای تاکی کورد چەکەرە دەکات و بە بەهێزی و نەمری و زیندوویی خۆی دەنوێنێ.
بۆیە واباشترە جاڕنامەی مافەکانی مرۆڤ و دیموکراسی و ئازادی و لیبڕالیزمی نەژادی و....بخرێتە مۆزەخانەی پڕ لە شەرمەزاری ڕۆژئاواوە. چونکە دەرکەوت ئەم جاڕنامەیە تەنیا دەسکەڵایەکی یاسایی و پڕ لە پێوەری مەزاجیە بۆ مسۆگەرکردنی بەرژەوەندیە کانیان و بەرەو پێشەوەبردنی ستراتیژیە درێژخایەنەکانیان لەو شوێنانەی بەرژەوەندیەکانیان دەکەونە بەر مەترسی لە ناوچوون و کاڵ بوونەوەی ڕۆڵ و پێگەی ستراتیژیان.

© 2017 Hawler