ئەیلول 19, 2021

مەشخەڵ کەوڵۆسی

 

لەدوای زنجیرەیەك گۆڕانكاری لە سنووری پارێزگای سلێمانیدا، هەندێك لە ڕۆشنبیران و سیاسیییەكان گەشبینییەكی گەورەیان پیشاندا بەوەی ئیدی كۆتایی سەردەمی شەڕە جنێودەبێت لە فەزای مەجازی و میدیای كوردیدا.
ئەو گۆڕانكارییانە هەرچی ببن و تا هەرسنورێك بڕۆن، دواجار لەوە ناترازێن كە گۆڕانكاری ناو حیزبێكی
كوردین، نەكەمتر نەزیاتر.
بۆیە ئەگەر واز لە مشتومڕی سیاسیی بهێنین و بەدیدێكی زانستی كۆمەڵناسی و سایكۆلۆژی كۆمەڵایەتی سەرنج بدەین، دەبێ بەرلەهەموو شتێك بپرسین: ئایا دیاردەی جنێودان كەلەم ساڵانەی دواییدا بەشێوەیەكی سەیر و سەرنجڕاكێش بڵاوبووەتەوە، هۆكارە ڕاستەقینەكەی چییە؟ پاشان چارەسەریشی چۆنە؟. ئەوەیان گومانی تێدانیە كە بەرپرسە سیاسییەكان زۆرجار
ئەو ئامادەباشییەی خەڵكیان بۆ جنێودان قۆستۆتەوەو لەگەمە سیاسییەكانیان بەكاریان هێناوە.
حیزبەكان هیچ كەمتەرخەم نەبوون لەوەی زمانی بێ ئەتەكێت و داڕوخاو لە پەیوەندییەكانیان بەكاربهێنن. هەندێك زیاتر قووڵ بوونەوە، بەهەزاران دۆلاری مانگانەیان خەرجكرد بۆ ئەوەی ژینگەی مەجازی و میدیایی كورد زیاتر وێران بكەن و، بیكەنە كەلاوەیەكی پیس بۆ مەعریفە و زمانی هاوچەرخ. سۆسیالمیدیایان پڕكرد لە سەدان پەیچ و ئەكاونتی فەیك بۆ جنێودان، بۆ تەشهیر و ناو زڕاندن و سیخوڕی.
بەڵام لە قووڵترین واتادا، ئەوەی ئەو سەركردە سیاسییانە كردوویانە، وەبەرهێنانی جنێو بووە لەنێو پرۆسەی جەنگی سایكۆلۆژی دژ بەیەكتر، نەك بەرهەمهێنانی دیاردەەكە.
چونكە بەبڕوای من، ئەو سەركردە سیاسیانە، تەنانەت توانای بەرهەمهێنانی جنێویشیان نەبووە، نەك ئەوەی ڕەحمیان بە كورد كردبێت یان نەیان ویستبێت جنێو دابهێنن.
بەڵكو ئەوان جنێوە ئامادەكانیان بەكارهێناوە!. لێرەدا ئێمەلەبەردەم هەردوو پرۆسەی "بەرهەمهێنان و بەكارهێنان"داین، ئەو سەركردە سیاسییانە ئەگەرچی نەیانتوانی جنێو بەرهەمبێنن و خۆیان خاوەنی بەرهەمهێنانەكە نین، بەڵام بەڕاستی بەرپرسن لە بەكارهێنانی ئەو بەرهەمە بێ كوالێتی و بێ ئامانجە بەشێوەیەك كە تا ڕادەی شكاندنی ئێسقانەكانی كورد و شكۆی كورد و كۆمەڵگە و میدیای كوردی و مێژووی كورد ڕۆشت!. لەڕاستیدا پەنجا ساڵێك دەبێت لەم ناوچەیەدا كار دەكرێت بۆ تێكدانی فەزای گشتی دەكرێت، ژەهر دەڕێژرێت، دژایەتی بڵاودەكرێتەوە، ڕق و خەشم دروست دەكرێن.
زۆرێك لەسەركردەكانیش هاتوون ئەو كەشەیان قۆستۆتەوەو لەخزمەتی گەورەبوونی خۆیاندا بەكاریان هێناوە. لەوانەیە هەر سەردەمێك مۆركێكی تایبەت و پێوەری تایبەتی هەبێت، بەڵام لەجەوهەردا لەو فەزایە نەترازاوە كەپێشتر بۆی دیاری كراوە. تەنانەت بووەتە بەشێك لە پەروەردەی تاك.
سەقافەتی گشتی لەسەر ئەو ڕیتمە لەئیرهابی فیكری و جنێودان و دابەزینی ئاستی زمان و مەعریفەت بۆ ئاستی بازاڕ و لاكۆڵان، تەنانەت لای نوسەران و میدیاكاران و ئەكادیمییەكانیش!. بۆیە من ئەگەرچی پێم وایە گۆڕانكارییەكانی ئەم دواییە سلێمانی، كاریگەریی كاتی دەبێت لەسەر هێواش بوونەوەی بازاڕی جنێودان، بەڵام هێندە نابات، فەزاكە وەك خۆی لێدێتەوە.
وەك حەربا خۆی دەگۆڕێت و جنێو بە شێوازێكی تر دەبینین، چونكە لەبنەڕەتدا ئەمانە عەڕابی جنێودان بوون، نەك ئەندازیار و بەهەرمهێنەری جنێو!. بەشبەحاڵی خۆم چاوەڕوان دەكەم ئەم فەزای جنێودانە درێژە بكێشێت تاكو چەند دەیەیەكی تر. تاكو نەوەیەك دروست دەبێت، تێكدانی فەزاری پەروەردەیی و رۆشنبیری كورد، وەك تێكدانی ئاسایشی كۆمەڵگە بەتاوان بزانێت، تا ئەو كاتەی یاسایەك دەبێت بۆ سزادانی جنێودەر و باوكەكانی ئیرهابی فیكری. دەنا بەهاتن و چوونی كەسێك یان چەند كەسێك ئەم پرۆسەیە شكست ناهێنێت.

© 2017 Hawler